ކޮވިޑު-19 އިން ސަލާމަތް ވުމަށްޓަކައި ސައިބޯނި ލައިގެން އަތް ދޮންނަން ބުނަނީ މިހެންވެ!
މުޅި ދުނިޔެއަށް ފެތުރިފައިވާ މި ބިރުވެރި ކޮވިޑު-19 އިން ރައްކާތެރި ވުމަށް ޓީވީ ތަކުންނާއި އެކި އިސްތިހާރުތަކުގެ އިތުރުން އެކި ޅެންތަކާއި ލަވަތަކުން ވެސް ސައިބޯނި ލައިގެން އަތް ދޮންނަން ބުނަނީ ކީއްވެކަން އެނގޭ ހެއްޔެވެ؟
އަތް ދޮވުމަށް ޓަކައި ކޮންމެ ވައްތަރެއްގެ ސައިބޯންޏެއް ބޭނުން ކުރުމަކީ ވެސް މައްސަލައެއް ނޫނެވެ. އަޅުގަނޑުމެން ދިވެހިން ބައެއް ފަހަރު "އެންޓިބެކްޓީރިއާ" އެކުލެވޭ ސައިބޯނިން ނޫނީ އަތް ދޮންނަން ބޭނުން ނުވެއެވެ. އެހެންނަމަވެސް ދަންނަވަންތޯއެވެ؟ ކޮންމެ ކަހަލަ ސައިބޯންޏަކުން ވެސް ކޮރޯނާ ވައިރަސް ނައްތާލެވިދާނެއެވެ،
ކޮރޯނާ ވައިރަސް އުފެދިފައިވާ ގޮތުން އޭގެ ބޭރު ފަށަލައިގައި ވަރުގަދަ ތެޔޮ ފަށަލައެއް އެކުލެވިގެން ވެއެވެ. އެހެން ވުމުގެ ސަބަބުން ކިތަންމެ ގިނަ އިރެއް ވަންދެން ވެސް ހުސް ފެނުން އަތް ދޮވުނު ނަމަވެސް އެ ކޮރޯނާ ވައިރަހަށް ކުރާނެ އެއްވެސް އަސަރެއް ނުވެއެވެ. އެހެންނަމަވެސް ސައިބޯނީގެ ސަބަބުން ތެޔޮ ނައްތާލާކަން ސައިންސް ވެރިން އެވަނީ ސާބިތު ކޮށްދީފައެވެ.
ގަބޫލު ނުކުރެވެނީތޯއެވެ؟ ތަށްޓަކަށް ފެން އެޅުމަށް ފަހުގައި އެއަށް ތެޔޮ އަޅާ ބަލާލާށެވެ. ތެލާއި ފެން ވަކިވެފައި ހުންނަ މަންޒަރު ވަރަށް ރީތިކޮށް ފެނިގެން ދާނެއެވެ. ފެނުގެ މަތީގައި ތެޔޮތައް އޮންނަ މަންޒަރު ފެނިގެން ދާނެއެވެ. ކިތަންމެ ވަރަކަށް ތެޅުވި ނަމަވެސް އޭގައި އެވާ ތެލާއި ފެން އެކެއް ނުވާނެއެވެ، އެހެން ނަމަވެސް ދެން އެއަށް ސައިބޯނި ކޮޅެއް އެޅުމަށް ފަހު ގުޑުވާލަބަލާށެވެ. އިސާހިތަކު ތެޔޮތައް ފެނާ އެކުވެގެން ދާނެއެވެ.
ހަމަ އެބީދައިން އަތް ދޮންނައިރުގައި ކޮންމެ ކަހަލަ ސައިބޯންޏެއް ބޭނުން ކުރިކަމުގައި ވީނަމަވެސް ކޮރޯނާ ވައިރަސްގެ ބޭރުގައި އެވާ ތެލުގެ ވަރުގަދަ ފަށަލަ ހަލާކުވެގެން ގޮސް އަތް ދޮންނަން ބޭނުންކުރާ ފެނާ އެކުވެގެން ދާނެއެވެ. ނަމަވެސް މިއީ މަދުވެގެން 20 ސިކުންތު ވަންދެން އަތް ދޮންނަ ކަމުގައި ވާނަމަ އެވެ، އެހާ ވަރުގަދަ ތެލުގެ ފަށަލައެއް ހަލާކު ކޮށްލުމަށް 10 ސިކުންތު ނޫނީ 5 ސިކުންތުން ފުރިހަމައެއް ނުވާނެއެވެ، އެހެންކަމުން ސިއްޚީ މާހިރުން ވެސް އިރުޝާދު ދެއްވަނީ މަދުވެގެން 20 ސިކުންތު ވަންދެން އަތް ދޮވުމަށެވެ.
ސެނަޓައިޒާ ބޭނުން ކުރާނަމަވެސް އެ ބޭނުން ކުރާ ސެނެޓައިޒާއެއްގައި "އަލްކަހޯލް" އެކުލެވޭ މިންވަރު ވަރަށް މަތިވާން ޖެހެއެވެ. އަދި އަތް ނުދޮވެ އަތުގައިވާހާ ހަޑިތަކަކާއެކު ސެނެޓައިޒާ ބޭނުންކުރުމަކީ އޭގެން އެއްވެސް ރާހަތެއް ކުރާނެ ކަމެއް ނޫނެވެ. އެހެންކަމުން އަތް 20 ސިކުންތު ވަންދެން ސައިބޯނި ލައިގެން އަތް ދޮވުމަށް ފަހުގައި ސެނެޓައިޒާ ކޮށްލުމުން ކޮވިޑު ކީއްކުރަންތޯއެވެ؟ އެއްވެސް ޖަރރާސީމެއް އަތުގައި ނުހުންނާނެ ކަމަށް ދިރާސާ ތަކުން އެބަ ދައްކައެވެ.
އެހެންކަމުން ގިނަ ގިނައިން އަތް ދޮންނަން އާދަކުރާށެވެ. އަދި ކޮންމެ ކަހަލަ ސައިބޯންޏެއް ބޭނުންކޮށްގެން ވިޔަސް މަދުވެގެން 20 ސިކުންތު ވަންދެން އަތް ދޮންނަން އާދަ ކުރާށެވެ. މިބަލި ނައްތާލެވޭނީ އެންމެން އެކުގައި، އެއް އަޒުމެއްގައި ފަރުދީ ޒިންމާ އަދާ ކޮށްގެންނެވެ.
