އައްޑޫގެ ތަރައްގީއަކީ މުޅި ރާއްޖެއާއި މުޅި ސަރަހައްދުގެ ތަރައްގީ: އަސްލަމް
އައްޑޫގެ ތަރައްގީއަކީ މުޅިރާއްޖެއާއި މުޅި ސަރަހައްދުގެ ތަރައްގީ ކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވެފައިވަނީ ގދ. ތިނަދޫއާއި އައްޑޫސިޓީއާ ދެމެދު މިއަދު ފެށުނު އިންޓަރނޭޝަނަލް ކާގޯ ފެރީގެ ޚިދުމަތް ފެށުމާއެކު، ފުރަތަމަ ބޯޓު 2700 ޓަނަށް ވުރެ ގިނަ މުދަލާއެކު މިއަދު އައްޑޫ ސިޓީ ޕޯޓަށް ދަތުރުކުރުމުން އެކަމާ ގުޅިގެން ބޭއްވި ރަސްމިއްޔާތެއްގައެވެ.
އޭނާ ވިދާޅުވީ އައްޑޫގެ ތަރައްގީއަކީ މުޅި ރާއްޖޭގެ އަދި މުޅި ސަރަހައްދުގެ ތަރައްގީ ކަމަށާއި އެކަން ކުރެވޭނީ އެންމެން އެކުގައި ތަރައްގީ ވުމުގެ ވިސްނުމާއެކުގައި ކުރިއަށް ދިއުމުން ކަމަށެވެ. އަދި ވަކިތަނެއްގައި ވަކި ކަމެއް ކުރެވުނީމަ ތިމަންނަމެންނަށް ވަކި ކަމެއް ނުވާކަމުގައި އަޅުގަނޑުމެން ވެސް ދެކިގެން ނުވާނެ ކަމަށާއި، އެހެން ބަޔަކުވެސް އެކަން އެގޮތަށް ދެކިގެން ނުވާނެކަމަށް ވެސް އަސްލަމް ވިދާޅުވެފައި ވެއެވެ.
އެތައް ޒަމާންތަކަކަށް ރައްޔިތުން ކުރަމުން އައި އުއްމީދުތައް ހުއްޓި ވަޅުޖެހިފައި އޮތް އޮތުމުން، ނުކުމެވޭނީ ވެސް އާ ވިސްނުމަކާއެކުގައި، ގުޅިގެން މަސައްކަތްކޮށްގެން ކަމަށާއި، އެއިރަށް ރާއްޖެ ތަރައްގީ ކުރެވޭނެ ކަމަށް ވެސް އޭނާ ވިދާޅުވެފައި ވެއެވެ.
އޭނާ ވިދާޅުވީ، އައްޑޫ ބަނދަރު ހުޅުވާލެވި ބައިނަލްއަގްވާމީ ބަނދަރެއްގެ ގޮތުގައި މަސަައްކަތް ކުރިއަށް ގެންދިޔުމަށް އައްޑޫގެ ރައްޔިތުން ގޮވާތާ އެތަކެއް ދުވަސްވީފަހުން، އައްޑޫގެ ބަނދަރު މިވަރަށް ހަދާލެވުނީ އައްޑޫ ރީޑެވެލޮޕްމެންޓް ޕްރޮޖެކްޓްގެ ތެރެއިން ކަމަށާއި، މި ބަނދަރު ނިމިގެން، މި ބަނދަރު ވެސް ކިރިޔާ ހިނގައިގަތީ އެމްޑީޕީގެ 2008 ވަނަ އަހަރުގެ ސަރުކާރުގައި ހަމައެކަނި ސިޔާސަތަކަށް ގެނެވުނު ބަދަލަކާ އެކުގައި ކަމަށެވެ.
