އިބްތިހާލްގެ މަރުގެ މައްސަލައިގެ އަޑުއެހުމެއް މާދަމާ
ވ. ރަކީދޫގައި ރަޙުމްކުޑަ ގޮތަކަށް މަރާލި އުމުރުން އެންމެ ތިން އަހަރުގެ މުޙައްމަދު އިބްތިހާލްގެ މަރުގެ މައްސަލައިގެ އަޑުއެހުމެއް މާދަމާއަށް ތާވަލު ކޮށްފިއެވެ.
އިބްތިހާލް މަރާލި މައްސަލައިގެ ތުހުމަތު އުފުލާފައި ވަނީ އޭނާގެ މަންމަ އާފިޔާ މުޙައްމަދުގެ މައްޗަށެވެ. މިމައްސަލައިގައި އެންމެ ފަހުން ބޭއްވި އަޑުއެހުމުގައި އާފިޔާ ހާޒިރުވެފައި ވަނީ ދައުލަތުގެ ފަރާތުން އޭނާއަށް ހަމަޖައްސައިދިން ވަކީލަކާއެކުގައެވެ.
އެދުވަހުގެ އަޑުއެހުމުގައި އާފިޔާގެ ވަކީލާ ވިދާޅުވެފައި ވަނީ އެމައްސަލަ އަލުން ބަލާ ދިރާސާކޮށް ޚުލާސާ ބަޔާނެއް އިއްވަން ބޭނުންވާ ކަމަށެވެ. އެހެންކަމުން މައްސަލަ ދިރާސާ ކުރުމަށް ޝަރީޢަތުން ވަނީ ވަކީލާއަށް 10 ދުވަހުގެ މުއްދަތެއް ދެއްވާފައެވެ.
މިމައްސަލައިގައި ކްރިމިނަލް ކޯޓުގައި މާދަމާ ބޭއްވުމަށް ހަމަޖެހިފައިވާ ޝަރީޢަތް ތާވަލު ކޮށްފައި ވަނީ މެންދުރު 2:00 އަށެވެ.
ރަކީދޫގައި އިބްތިހާލް މަރާލާފައި އޮއްވާ ފެނިފައި ވަނީ 2015 ވަނަ އަހަރުގެ ޖެނުއަރީ މަހުގައެވެ. މިމައްސަލައިގައި ދައުލަތުން އާފިޔާ ގެ މައްޗަށް އުފުލާފައިވަނީ ދެ ދައުވާ އެކެވެ. އެއީ އަމުރަށް ނުކިޔަމަންތެރިިވުމުގެ ދައުވާއާއި ގަސްދުުގައި ކުއްޖަކު މެރުމުގެ ދައުވާއެވެ.
