އެސްވާޓީނީގެ ބޮޑު ވަޒީރު އަވަހާރަވުމާ ގުޅިގެން ރައީސް ޞާލިޙު ތަޢުޒިޔާ ވިދާޅުވެއްޖެ
ކިންގްޑަމް އޮފް އެސްވާޓީނީގެ ބޮޑުވަޒީރު އެމްބްރޯސް މަންޑްވުލޯ ޑްލަމިނީ އަވަހާރަވުމާ ގުޅިގެން އެސްވާޓީނީގެ ރަސްގެފާނު މުސްވަޓީ III އަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަޢުޒިޔާ ވިދާޅުވެ، މެސެޖެއް ފޮނުއްވައިފިއެވެ.
ރައީސް ޞާލިޙު ގެ މެސެޖުގައި، ބޮޑުވަޒީރު އެމްބްރޯސް މަންޑްވުލޯ ޑްލަމިނީ އަވާހަރަވުމުގެ ޚަބަރު އެއްސެވީ ފުން ހިތާމަޔާއެކު ކަމުގައި ވިދާޅުވެ، އެސްވާޓީނީ ގެ ތަރައްޤީއާއި ހަމަޖެހުމަށް ބޮޑުވަޒީރު ކޮށްދެއްވާފައިވާ އަގުހުރި މަސައްކަތްޕުޅު ފާހަގަ ކުރެއްވިއެވެ.
ރައީސް ޞާލިޙުގެ މެސެޖުގައި އެސްވާޓީނީގެ ބޮޑުވަޒީރު އަވަހާރަވުމުގެ ހިތާމައިގައި ދިވެހި ރައްޔިތުންނާއި ސަރުކާރާއި އެ މަނިކުފާނުގެ އަމިއްލަ ނަންފުޅުގައި އެސްވާޓީނީގެ ރަސްގެފާނަށާއި، ރައްޔިތުންނަށާއި، ޚާއްޞަކޮށް ބޮޑުވަޒީރުގެ ޢާއިލާގެ ބޭފުޅުންނަށް އިޚްލާޞްތެރި ތަޢުޒިޔާ ފޮނުއްވާފައިވެއެވެ.
އެސްވާޓީނީގެ ބޮޑު ވަޒީރު އަވަހާރަވީ ކޮވިޑް-19 އަށް ފައްސި ވެގެން ކަމަށް މައުލޫމާތު ލިބިފައިވެއެވެ. އަވަހާރަވީއިރު އުމުރުފުޅުން 52 އަހަރެވެ. ކޮވިޑް-19 އަށް ފައްސި ވެގެން އެމަނިކުފާނަށް ހޮސްޕިޓަލުގައި ފަރުވާ ދެމުންދާތާ ދެ ހަފްތާ ފާއިތުވި ކަމަށް ވެސް މައުލޫމާތު ލިބިފައިވެއެވެ.
