އިބްތިހާލްގެ މަރުގެ މައްސަލައިގައި އާފިޔާއަށް ހުލާސާ ބަޔާން ހުށަހަޅަން އިތުރު ފުރުސަތެއް
ވ. ރަކީދޫގައި ރަޙުމްކުޑަ ގޮތަކަށް މަރާލި އުމުރުން ތިން އަހަރުގެ މުޙައްމަދު އިބްތިހާލްގެ މަރުގެ މައްސަލައިގެ ތުހުމަތު ކުރެވޭ އޭނާގެ މަންމަ، އާފިޔާ މުހައްމަދު މަނިކަށް ހުލާސާ ބަޔާން ހުށަހަޅަން އިތުރު ފުރުސަތެއް ދީ ހުކުމް ކުރަން މިމަހުގެ 28 ވަނަ ދުވަހަށް ތާވަލް ކުރަން ނިންމައިފި އެވެ.
އިބްތިހާލް މަރާލި މައްސަލައިގެ ތުހުމަތު އުފުލާފައި ވަނީ އޭނާގެ މަންމަ އާފިޔާ މުޙައްމަދުގެ މައްޗަށެވެ. މިމައްސަލައިގައި ހޯމަ ދުވަހު ބޭއްވި އަޑުއެހުމަކީ، ގާނޫނީ ވަކީލަކާއެކު، އިތުރު އަޑުއެހުމެއް ބާއްވާ ދެއްވުމަށް އާފިޔާ އެދިފައިވާތީ، ބޭއްވި އަޑު އެހުމެކެވެ.
މިމައްސަލައިގައި ހޯމަ ދުވަހު ބޭއްވި އަޑުއެހުމުގައި އާފިޔާ ހާޒިރުވެފައި ވަނީ ދައުލަތުގެ ފަރާތުން އޭނާއަށް ހަމަޖައްސައިދިން ވަކީލަކާއެކުގައެވެ. މި އަޑުއެހުމަށް ވަޑައިގެންނެވި އާފިޔާގެ ގާނޫނީ ވަކީލު ވިދާޅުވީ، އޭނާ މިމައްސަލައާ ހަވާލުވީ މުޅިން އަލަށް މިމަހުގެ 9 ވަނަ ދުވަހު ކަމަށާއި މިމައްސަލައިގައި ހިމެނޭ ލިޔެކިޔުންތައް ވެސް ހަމައަށް ލިބިފައި ނުވާތީ ހުލާސާ ބަޔާން ހުށަހެޅުއްވުމަށް އިތުރު ފުރުސަތެއް ދެއްވުން އެދޭ ކަމަށެވެ.
ދައުލަތުގެ ވަކީލު ވިދާޅުވީ، އެކަމަށް ދައުލަތުން އިއުތިރާޒު ނުކުރާ ކަމަށެވެ. އަދި ދައުލަތުން މި އަހަރުގެ ފެބްރުއަރީ މަހުގެ 26 ވަނަ ދުވަހު ބޭއްވި އަޑު އެހުމުގައި ހުލާސާ ބަޔާން ހުށަހަޅާފައިވާތީ މިމައްސަލައިގައި ދައުލަތުން އިތުރަށް ދައްކާނެ ވާހަކައެއް ނެތް ކަމަށެވެ.
މި މައްސަލަ ބައްލަވާ ގާޒީ މުހައްމަދު ސަމީރު ވިދާޅުވީ އާފިޔާ ވެސް ހުލާސާގޮތެއްގައި ވަރަށް ކުރު ބަޔާނެއް ދީފައިވާ ކަމަށެވެ. ނަމަވެސް އަނެއްކާވެސް ގާނޫނީ ވަކީލެއްގެ އެހީތެރިކަން ބޭނުންވާ ކަމަށް ބުނެ، ވަކީލެއް ހަމަޖެހިފައިވާތީ، ހުލާސާ ބަޔާން ހުށަހެޅުމަށް އިތުރު ފުރުސަތެއް ދެއްވާ ކަމަށެވެ. އެގޮތުން އާފިޔާގެ ފަރާތުން ހުލާސާ ބަޔާން ހުށަހެޅުމަށް ދެއްވާނެ ފަހު ތާރީހަކީ މިމަހުގެ 24 ވަނަ ދުވަސް ކަމަށާއި އެދުވަހު މިމައްސަލައިގެ އަޑުއެހުމެއް ބާއްވާނެ ކަމަށާއި ދެން އިތުރު ފުރުސަތެއް ނުދެއްވާނެ ކަމަށްވެސް ގާޒީ ވިދާޅުވިއެވެ.
މިމައްސަލާގައި ހުކުމް ކުރުމަށް މިމަހުގެ 28 ވަނަ ދުވަހު ނުވަތަ 29 ވަނަ ދުވަހަށް ތާވަލް ކުރެވޭނެ ކަމަށް ގާޒީ ވިދާޅުވިއެވެ.
