ބަންކަރިންގެ ހިދުމަތަކީ ޕޯޓަކާ ދިމާލަށް އެޅުނު ރަނގަޅު ފެށުމެއް: ވިޓޯލް

ރާއްޖޭގެ އެންމެ އުތުރުގައިވާ އިހަވަންދިއްޕޮޅުގައި މިއަދު ފެށި ބަންކަރިންގެ ހިދުމަތަކީ ބައިނަލްއަގުވާމީ ޕޯޓަކާ ދިމާލަށް އެޅުނު ރަނގަޅު ފެށުމެއް ކަމަށް އެ މަސައްކަތުގައި އެސްޓީއޯއާއެކު ޕާޓްނާޝިޕް ހެދި ދުނިޔޭގެ ހަކަތައިގެ ވިޔަފާރީގައި އެންމެ ބޮޑު ކުންފުނި، ވިޓޯލް އިން ބުނެފި އެވެ.

ވިޓޯލްގެ މެނޭޖިން ޑިރެކްޓަރު ރިޝަބް ބަލް މިއަދު ވިދާޅުވީ ރާއްޖެ އޮތީ ވަރަށް މުހިންމު ޝިޕިން ލޭންގެ ސަރަހައްދެއްގައި ކަމަށާއި އެހެންވެ އެއިން ރާއްޖެއަށް ފައިދާ ނެގެން އެބައޮތް ކަމަށެވެ.

އަދި ބަންކަރިންގެ ހިިދުމަތް ދެވޭނީވެސް ޝިޕިން ލޭންއަކާ ވަރަށް ކައިރީގައި އޮވެގެން ކަަމަށް އޭނާ ވިދާޅުވި އެވެ. އޭގެ މިސާލެއްގެ ގޮތުގައި ނެދެލެންޑްސްގެ ރޮޓަޑާމްއާއި ސިންގަޕޫރު ފަދަ ތަންތަން ފާހަގަ ކުރެއްވި އެވެ.

ރިޝަބް ވިދާޅުވީ ރާއްޖޭގެ މައިގަނޑު އަމާޒަކީ ބައިނަލްއަގުވާމީ ޕޯޓެއް ގާއިމުކުރުން ކަމަށް ގަބޫލުކުރައްވާ ކަމަށެވެ. އެހެންވެ މިއީ އެ އަމާޒަށް ދިއުމަށް ވަރަށް ރަނގަޅު ފެށުމެއް ކަމަށް ވެސް ރިޝަބް ވިދާޅުވި އެވެ

ހަމަ އެހެންމެ ދުނިޔޭގެ މަޝްހޫރު ޕޯޓުތަކުގައިވެސް ބަންކަރިންގެ ހިދުމަތް ދެމުންދާތީއާއެކު ލިބިފައިވާ ތަޖުރިބާއާއެކު ރާއްޖޭގައި ބަންކަރިންގެ ހިދުމަތް ދޭ މިންވަރު އިތުރުކުރޭވޭނެ ގޮތްތައް އެނގޭ ކަމަށް އޭނާ ވިދާޅުވި އެވެ.

އޭނާ އިތުރަށް ވިދާޅުވީ ހަމައެކަނި ބަންކަރިންގެ ހިދުމަތް ކާމިޔާބު ހިދުމަތަކަށް ވަނީ ހަމައެކަނި އަގަށް އެކަނި ނޫން ކަމަށާއި އަދި އެތަކެއް ކަމެއް ހިމެނޭ ކަމަށެވެ.

އަދި އަހަރުގެ ކޮންމެ ދުވަސް ވަރަކުވެސް އެ ހިދުމަތް ދިނުމަށް ރާއްޖޭގެ މޫސުން ތަންދޭތީ އެ ހިދުމަތް ހޯދަން ބޭނުންވާ މީހުންނަށް ކޮންމެ ދުވަސް ވަރަކުވެސް ހިދުމަތް ލިބޭނެ ކަމަށެވެ.