ފަޒޫގެ ގެއަށް އެންމެ ފުރަތަމަ ދިޔަ ދުވަހު އަޅުގަނޑު ހުއްޓާނުލާ ރުއިން : ރައީސް ޞާލިޙު
ފަސްޓް ލޭޑީ މެޑަމް ފަޒްނާ އަހުމަދުގެ ގެއަށް އެންމެ ފުރަތަމަ ވަޑައިގަތް ދުވަހު ހުއްޓާނުލާ ކީރިތި ކުރެއްވި ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ދިވެހިރާއްޖޭގެ އަޑުން މިއަދު ގެނެސްދިން "ބާއްޖަވެރި ހެނދުނާ" ޕްރޮގްރާމުގައި ބައިވެރިވެ ވަޑައިގެން ރައީސް ޞާލިޙު ވަނީ އެމަނިކުފާނުގެ ބައެއް ވާހަކަފުޅު އެހުންތެރިންނާ ޙިއްސާ ކުރައްވާފައެވެ.
އެގޮތުން ރައީސް ޞާލިޙު ވިދާޅުވީ އެމަނިކުފާނު މާލެ އަންނަން ޖެހުނީ ކިޔަވާ ވިދާޅުވުމަށް ކަމަށެވެ. އެއިރު އުމުރުފުޅުން 10 އަހަރު ކަމަށް ވެސް ރައީސް ޞާލިޙު ވިދާޅުވިއެވެ.
ރައީސް ވިދާޅުވީ، އެމަނިކުފާނާއި އަނބިކަނބަލުން ފަޒްނާ ބައްދަލުވީ 1980 ވަނަ އަހަރުގެ ކުރީކޮޅުގައި ކަމަށެވެ.
"އަޅުގަނޑު މާލެ އައިސް އެންމެ ފުރަތަމަ ކިޔަވަން ބެހެއްޓީ ފަޒޫގެ ގޭގައި، އަޅުގަނޑުގެ ބައްޕަ އާއި ފަޒޫގެ ބައްޕައާ އެއީ ވަރަށް ގާތް ދެ ރަހުމަތްތެރިން، ވިޔަފާރީގައިވެސް ވަރަށް ގުޅުން އޮންނާނެ އަޅުގަނޑު މާލެ އައީ މާމައާއެކު، އައިސް ބޮޑުބޭބެ ކައިރީގައި ހުރެފައި މާމަ ފުރަންވީމަ އަޅުގަނޑު އެގޭގައި ބެހެއްޓީ، އަޅުގަނޑުގެ ދެ ދައްތައިން ތިބީ އެގޭގައި، އަޅުގަނޑު އެގެއަށް ގެންދިޔައީމަ އަޅުގަނޑު ނުހުރިން އެގޭގައި، ރޯން ފެށީ، ރޯން ފެށި ގޮތަށް އެރޭ 12 ޖަހަންދެން ހުއްޓާ ނުލާ ރުއީ" މެޑަމް ފަޒްނާއާ އެންމެ ފުރަތަމަ ބައްދަލުވީ ކޮންއިރަކުތޯ ޕްރެޒެންޓަރު ސުވާލު ކުރުމުން ރައީސް ޖަވާބު ދެއްވިއެވެ.
ރައީސް ޞާލިޙު ވިދާޅުވީ އެމަނިކުފާނު ދެން ބަދަލު ކުރެއްވީ ބޮޑުބޭބެ ގެއަށް ކަަމަށާއި ކިޔެވުން ނިންމާލީ އެގޭގައި ހުންނަވައިގެން ކަމަށެވެ.
މިވާހަކަތަކަކީ މީގެ ކުރިން އެމަނިކުފާނު ހިއްސާ ކުރައްވާފައިވާ ވާހަކަތަކެއް ނޫން ކަމަށް ވެސް ރައީސް ޞާލިޙު ވިދާޅުވިއެވެ.
