މުއްދަތު ހަމަވެފައިވާ އައިޑީކާޑު، ލައިސެންސް ދައްކައިގެން ދެންދަތުރު ނުކުރެވޭނެ
މުއްދަތު ހަމަވެފައިވާ އައިޑީކާޑު، ޑްރައިވިން ލައިސަންސް ދައްކައިގެން ދަތުރު ނުކުރެވޭ ގޮތައް އޭވިއޭޝަން ސެކިއުރިޓީ ކޮމާންޑުން ނިންމައިފިއެވެ.
އޭވިއޭޝަން ސެކިއުރިޓީ ކޮމާންޑުން ވިދާޅުވީ ޖެނުއަރީ 01 ވަނަ ދުވަހުން ފެށިގެން މުއްދަތު ހަމަވެފައިވާ އައިޑީކާޑާއި ޕާސްޕޯޓް އަދި ޑްރައިވިން ލައިސަންސް ބަލައިނުގަންނާނެ ކަމަށެވެ.
ކޮވިޑް -19 އާ ގުޅިގެން މުއްދަތު ހަމަވެފައިވާ ޑޮކިއުމެންޓް ބޭނުން ކޮށްގެން ދަތުރު ކުރެވޭ ގޮތަށް ހަމަޖެއްސީ އޮގަސްޓް މަހުގެ ނިޔަލަށެވެ. ނަމަވެސް މުއްދަތު ހަމަވާ އައިޑީ ކާޑު މި އަހަރުގެ ޑިސެމްބަރު މަހުގެ ނިޔަލަށް ބޭނުން ކުރެވޭނެ ކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން ވަނީ މީގެ ކުރިން ވިދާޅުވެފައެވެ. މިހާރު ޑޮމެސްޓިކް ދަތުރުތައް ކުރާ ދިވެހިންނަށް ވެސް ދަތުރު ކުރެވޭނީ މުއްދަތު ހަމަނުވާ ލިޔުމެއް އޮވެގެންނެވެ.
ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ސަރުކާރުން އަޅަމުންދާ އެކި ފިޔަވަޅުތަކާ އެކު އައިޑީ ކާޑު ހެދުމުގެ ހިދުމަތް ދެމުން ދިޔައީ އޮންލައިން ކޮށެވެ. އެހެންނަމަވެސް އައިޑީ ކާޑު ގެހިދުމަތް ދެވުން ލަސްވުމާ ގުޅިގެން ގިނަ ފަރާތްތަކެއްގެ ޝަކުވާ ދިޔައީ ލިބެމުންނެވެ. އެއާއި އެކު މުއްދަތު ހަމަވެފައިވާ އައިޑީ ކާޑު ބޭނުން ކުރެވޭނެ ކަމަށް ވަނީ ނިންމާފައެވެ.
