މިދިޔަ އަހަރު ޕާސްޕޯޓު ހެއްދީ އެންމެ 13،600 މީހުން
މޯލްޑިވިސް އިމިގްރޭޝަނުން ހާމަކޮށްފައިވާ ތަފާސް ހިސާބުތަކުން ދައްކާ ގޮތުގައި ނިމިދިޔަ 2020 ވަނަ އަހަރު ޕާސްޕޯޓު ހައްދައިފައި ވަނީ އެންމެ 13،600 މީހުންނެވެ. އެއީ މާލެއިން 9،800 މީހުންނާއި، ސ. ހިތަދޫ، ފުވައްމުލަކު، ކުޅުދުއްފުށީގެ އިތުރުން ހއ ދިއްދޫ އިން ވެސް ޕާސްޕޯޓު ޕްރޮސެސް ކުރެވިގެންނެވެ.
2019 ވަނައަހަރާއި އަޅާބަލާއިރު، 2020 ވަނަ އަހަރު ޕާސްޕޯޓު ހައްދައިފައިވާ މިންވަރަކީ 70 އިންސައްތަ ދަށް މިންވަރެކެވެ. 2019 ވަނަ އަހަރު ޖުމުލަކޮށް 51،900 ޕާސްޕޯޓު ހެއްދިފައިވެއެވެ. އިމިގްރޭޝަނުން ބުނީ ޕާސްޕޯޓު ހެއްދި މިންވަރު އެހާ ދަށްވެފައި ވަނީ ކޮވިޑާއި ގުޅިގެން ދަތުރު ފަތުރު ކުރުން ހުއްޓި ސަރުކާރު އޮފީސްތައް ބަންދު ކުރެވުމާ ގުޅިގެން ކަމަށެވެ.
މިދިޔަ އަހަރު ޕާސްޕޯޓުގެ އިތުރުން 39 ޕާސްޕޯޓް ކާޑު ވެސް ހައްދައިފައިވާއިރު، ރާއްޖޭގައި މިހާރު ބޭނުން ކުރާ ޕާސްޕޯޓަކީ މި ސަރަހައްދުގައި ވެސް އެންމެ ވަރުގަދަ އެއް ޕާސްޕޯޓެވެ. ސަބަބަކީ ވިސާ ހޯދުމެއް ނެތި ރާއްޖޭގެ ޕާސްޕޯޓުގައި 85 ގައުމަށް މިހާރު ދަތުރު ކުރެވުމެވެ.
