ހިޔާ މަޝްރޫޢުގެ ވިޔަފާރި ޔުނިޓްތައް ބަލައިލުމުގެ ފުރުޞަތު ހުޅުވާލައިފި
ހިޔާ މަޝްރޫޢުގެ ވިޔަފާރި ޔުނިޓްތައް ބަލައިލުމުގެ ފުރުޞަތު އާންމުކޮށް ހުޅުވާލައިފިއެވެ.
އެޗްޑީސީން ވިދާޅުވީ ހިޔާ މަޝްރޫޢުގައި ހިމެނޭ ވިޔަފާރި ޔުނިޓުތައް ބަލައިލުމުގެ ފުރުޞަތު ހުޅުވާލެވުނު ކަމުގައިވީ ނަމަވެސް، ކޮވިޑް-19 ގެ ހާލަތާ ގުޅިގެން އެފުރުޞަތު ވަނީ ރަޖިސްޓްރީ ކުރިފަރާތްތަކަށް ނުދެވި ކަމުގައެވެ.
އެހެންނަމަވެސް، ހުޅުމާލެ ފޭސް 2 ގެ ހިޔާ މަޝްރޫޢުގައި ހިމެނޭ ވިޔަފާރި ޔުނިޓުތަކަށް ޕްރޮޕޯސަލް ހުށަހެޅުމުގެ ފުރުޞަތު ހުޅުވާލާފައިވާތީއާއި ކުރިއަށް އޮތްތަނުގައިވެސް ހިޔާ މަޝްރޫއުގެ އިތުރު ވިޔަފާރި ޔުނިޓުތަކަށް ހުށަހެޅުމުގެ ފުރުޞަތު ހުޅުވާލުމަށް ނިންމާފައިވާތީ، މިޔުނިޓްތައް ބަލައިލުމަށް ރަޖިސްޓަރކުރުމުގެ ފުރުޞަތު އަލުން ވަނީ ހުޅުވާލުމަށް ނިންމާފައިވާ ކަމަށެވެ.
މި ވިޔަފާރި ޔުނިޓްތައް ބެލުމަށް ޝައުގުވެރިވެލައްވާ ފަރާތްތަކުން 10 ޖަނަވަރީ 2021 ވަނަ ދުވަހުން ފެށިގެން 17 ޖަނަވަރީ 2021 ގެ މެންދުރު 12:00 ގެ ކުރިން އޮންލައިން ރަޖިސްޓްރޭޝަން ފޯމު ފުރިހަމަ ކުރެއްވުމަށް ވަނީ އެދިފަައެވެ.
އަދި ކޮވިޑް-19ގެ ހާލަތާ ގުޅިގެން، އެންމެހައި ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން، ކަނޑައެޅިފައިވާ ތާރީޚުގައި ރަޖިސްޓްރީ ނުކުރައްވާ ފަރާތްތަކަށާއި (ބަދަލުގައި ވަޑައިގެންފާނެ ފަރާތްތައް ހިމެނޭ ގޮތަށް) އަދި ރަޖިސްޓްރީކޮށްފައިވާ ފަރާތާއެކު ވަޑައިގަންނަވާ އިތުރު އެއްވެސް ފަރާތަކަށް މިޔުނިޓްތައް ބެލުމުގެ ފުރުޞަތު ނުދެވޭނެ ކަމަށް އެޗްޑީސީން ވިދާޅުވެއެވެ.
އަދި، ރަޖިސްޓްރީކުރައްވާ ފަރާތްތަކާއެކު ވިޔަފާރި ޔުނިޓްތައް ދެއްކުމުގެ އިންތިޒާމްތައް ހަމަޖެހިފައިވާގޮތުގެ ތަފްސީލު އެޗްޑީސީން ހިއްސާ ކުރައްވާނެއެވެ.
