އިގްތިސާދީ ގޮތުން ދިމާވެފައިވާ ގޮންޖެހުންތަކުން އަރައިގަތުމަށް ގައުމުތަކުގެ އެހީ ބޭނުންވޭ : ރައީސް
އިގްތިސާދީ ގޮތުން ދިމާވެފައިވާ ގޮންޖެހުންތަކުން އަރައިގަތުމަށް ބައިނަލްއަގްވާމީ ގައުމުތަކާއި ގުޅުންތަކުގެ އެހީތެރިކަން ބޭނުންވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އިންޑިޔާގެ ނޫހަކަށް ރައީސް ދެއްވި ބަސްދީގަތުމެއްގައި ވިދާޅުވީ، އިގްތިސާދީ ގޮތުން ދިމާވެފައިވާ ގޮންޖެހުންތަކުން އަރައިގަތުމަށް ބައިނަލްއަގްވާމީ ގައުމުތަކާއި ގުޅުންތަކުގެ އެހީތެރިކަން ބޭނުންވާ ކަމަށާއި އެކްޝަން ޕްލޭން ތަންފީޒުކުރުން އަވަސް ކުރަން ޖެހޭ ކަމަށެވެ.
ރާއްޖެ ފަދަ ގައުމުތަކަށް ކޮވިޑާ ގުޅިގެން ދިމާވެފައިވާ ގޮންޖެހުންތަކަށް ރިއާޔަތްކޮށް ދަރަނި މައާފްކޮށްދީ، އިގްތިސާދީ ހާލަތު މިއަށްވުރެ ރަނގަޅު ހާލަތަކަށް ގެންދިޔުމަށް އެހީތެރިކަން ފޯރު ކޮށްދިނުމަށް ބައިނަލްއަގްވާމީ މުޖުތަމައަށް ރައީސް ވަނީ ގޮވާލާފައެވެ.
ރައީސް ވިދާޅުވީ ބައެއް އުސޫލުތަކަށް ބަދަލު ގެނެސް ދަނޑުވެރިކަމާއި މަސްވެރިކަމުގެ ދާއިރާ ތަރައްގީކޮށް، އެދާއިރާތަކަށް އިންވެސްޓްކުރާ މިންވަރު އިތުރުކުރުމަށް މަސައްކަތް ކުރަމުންދާ ކަމަށެވެ.
މީގެ އިތުރުން ރައީސް ވިދާޅުވީ ކޮވިޑްގެ ބަލިމަޑުކަމުގެ ސަބަބުން ބޯޑަރުތައް ބަންދުކުރުމާއެކު އެކަމުގެ ނޭދެވޭ އަސަރު ފަތުރުވެރިކަމަށް އަދި ޚާއްސަކޮށް ރާއްޖޭގެ އިގްތިސާދަށް ވަރަށް ބޮޑަށް ކުރިކަމަށެވެ. ހުސްވި އަހަރު، ރާއްޖެއަށް ލީޑިން ޑެސްޓިނޭޝަންގެ އެވޯޑު ލިބިފައިވާކަން ވެސް ރައީސް ވަނީ ފާހަގަ ކޮށްފައެވެ.
މިހާތަނަށް ފަތުރުވެރިކަން ކުރިއެރުވުމަށް ކުރެވުނު މަސައްކަތްތަކުގެ ސަބަބުން ރާއްޖެއަށް ގިނަ އެވޯޑުތަކެއް ވަނީ ލިބިފައެވެ. ވޯލްޑް ޓްރެވަލް އެވޯޑްސްއިން ދޭ އެންމެ ޝަރަފުވެރި އެވޯޑުކަމުގައިވާ "ވޯލްޑްސް ލީޑިން ޑެސްޓިނޭޝަން" އެވޯޑް ފުރަތަމަ ފަހަރަށް ރާއްޖެއަށް މިދިޔަ އަހަރު ވަނީ ލިބިފައެވެ. އަދި ފަތުރުވެރިންގެ އެންމެ މަގުބޫލުކަން ހޯދާފައިވާ 22 މަންޒިލަކާ ރާއްޖެ ވަނީ ވާދަކޮށްފައެވެ. އެހެން ގައުމުތަކުގެ ތެރޭގައި ދުބާއީ، މެލޭޝިޔާ، ސްޕެއިން، މޮރިޝިއަސް އަދި ސްރީލަންކާ ހިމެނެއެވެ.
