ރައްޔިތުންނަށް އަޅުގަނޑު ޚިދުމަތް ދޭނީ ސިޔާސީ ފިކުރު ތަފާތު ކުރުމެއް ނެތި: ޑރ. މުޢިއްޒު
މޭޔަރު ކަމަށް ވަޑައިގެން ޚިދުމަތް ދެއްވާނީ ސިޔާސީ ފިކުރު ތަފާތު ކުރުމެއް ނެތި ކަމަށް، މާލެ ސިޓީ މޭޔަރު ކަމަށް ވާދަ ކުރައްވާ ޕީޕީއެމްގެ ކެންޑިޑޭޓް އަދި ކުރީގެ ހައުސިންގ މިނިސްޓަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީޕީއެމް/ޕީއެންސީ ކޯލިޝަން އޮފީހުގައި ރޭ ބޭއްވި ޖަލްސާގައި ވާހަކަ ދައްކަވަމުން ޑރ. މުޢިއްޒު ވިދާޅުވީ، މޭޔަރުކަމަށް ވަޑައިގަތުމަށްފަހު އެމަނިކުފާނާ ހަވާލުވާ މަސައްކަތް ފުރިހަމަ ކުރާނެ ކަމުގެ ޔަގީންކަން މާލޭގެ ރައްޔިތުންނަށް އޮންނާނެ ކަމަށެވެ. އަދި މިސަރުކާރަށް މިވީ ދެ އަހަރު ދުވަހުގެ ތެރޭގައި މާލެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ބޭނުންތެރި އެއްވެސް ކަމެއް ކުރެވިފައި ނުވާކަން ވެސް ޑރ. މުޢިއްޒުގެ ވާހަކަފުޅުގައި ފާހަގަ ކުރައްވާފައިވެއެވެ.
އެގޮތުން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގެ ވެރިކަމުގައި، "ހިޔާ" މަޝްރޫޢުގެ ދަށުން ހުޅުމާލޭ ދެވަނަ ފިޔަވަހީގައި ތަރައްޤީކުރި ފްލެޓުތައް، އޭގެ ޙައްޤުވެރީންނަށް ދިނުން ލަސްކަން ވެސް ޕީޕީއެމްގެ ނައިބު ރައީސްގެ މަގާމު ވެސް ފުރުއްވާ ޑރ. މުޢިއްޒު ފާހަގަ ކުރެއްވިއެވެ.
ޑރ. މުޢިއްޒު ވިދާޅުވީ ކުރީ ސަރުކާރުން ފްލެޓްތައް ދޭނެ ބަޔަކު ކަނޑައެޅުމަށް ގެންދިޔައީ ހާމަކަން ބޮޑު ދެފުށް ފެންނަ އުސޫލެއްގެ ތެރެއިން ކަމަށެވެ. ނަމަވެސް މިސަރުކާރުން އެ ފްލެޓްތައް ލިބުނު ބައެއް ފަރާތްތައް އަތުން ފްލެޓްތައް އަތުލާފައި އެހެން ބަޔަކަށް ދިނީ، އެއްވެސް ބަޔަކަށް ސާފު ނުވާ އުސޫލެއްގެ ތެރެއިން ކަމަށް ވިދާޅުވެ ޑރ. މުއިއްޒު އެ އަމަލު ސިފަ ކުރެއްވީ އަނިޔާއެއްގެ ގޮތުގައެވެ.
"ރައީސް ޔާމީންގެ ސަރުކާރުން އަޅާފައި ހުރި ފްލެޓްތައް، އަޅުގަނޑުމެން ވަރަށް ހުޅުވާލާފައިވާ ޕްރޮސެސްއެއްގެ ތެރެއިން ހޮވި ރައްޔިތުން އެ ތިބީ ނިކަމެތި ކޮށްފައި، މި ފްލެޓްތައް އަތުލާފައި ހުރި މީހުންގެ ހާލަތު ހުރީ ވަރަށް ދަށްކޮށް. (ސަރުކާރުން) ހާލަތު މަތިވި ކަމަށް ބުނާ ގޮތެއް ނުވިސްނޭ، މިއީ ހާދަ އަނިޔާވެރި ސަރުކާރެކޭ. އެ ރައްޔިތުންގެ އޮތް ކުށަކީ ކޮބައިބާ،" ޑރ. މުއިއްޒު ވިދާޅުވިއެވެ.
Ads by STO
