އާއިލާއެއްގެ ހަގީގީ “ހީރޯ” އަކީ ތިބާގެ ބައްޕައެވެ.
އާއިލާއެއް އުފާވެރިކަމާއި އަރާމުގައި އުޅުމުގެ ފަހަތުގައި އެ އާއިލާއެއްގެ ބައްޕަގެ ދައުރު ވަރަށް ވެސް ބޮޑެވެ. ބައްޕަގެ މިންނެތް މަސައްކަތާއި ދަރިންނާއި މުޅި އާއިލާ އުފަލުގައި ބޭތިއްބުމަށް ބައްޕަ އެތަކެއް ޤުރުބާނީތަކެއް ވެފައިވެއެވެ. އަދި މިހާރު ވެސް އެތައް ބުރަ މަސައްކަތްތަކެއް ކުރަމުން ގެންދެއެވެ.
އެހެން ނަމަވެސް ހިތާމައަކީ ދިރިއުޅުމުގައި ވަކި ހިސާބަކަށް އައުމާއެކު، މައިންބަފައިން މަތިން ފޫހިވެ އެމީހުންނާ ދޭތެރޭ އިހާނެތިކޮށް ކަންކަން ކުރާ މަންޒަރު މަދުން ނަމަވެސް މި ކުޑަކުޑަ މުޖުތަމަޢުން ފެނިގެން ދިއުމެވެ. ބައްޕަ، ރޭގަނޑުގެ ނިންޖާއި އަރާމު ނަގާލާ އެތައް އިރެއް ވަންދެން މަސައްކަތް ކޮށް ލިބޭ މަދު ފައިސާ ކޮޅުން އެންމެ ފުރަތަމަ ވެސް ބަލަނީ ތިބާއަށް އުފާވެރި އަދި ހިތްހަމަޖެހޭ ދިރިއުޅުމެއް ހޯދައިދޭނީ ކިހިނެއްތޯއެވެ.
އެ ބައްޕަ ވެސް ވަރުބަލި ވާނެއެވެ. ރައްޓެހިންނާއެކު ހީ ސަމާސާ ކުރުމަށް ކޮފީތަކަށް ދާން ބޭނުންވާނެއެވެ. ރާއްޖެއިން ބޭރަށާއި ރާއްޖޭގެ އެކި ކަންކޮޅުތަކަށް “ޓްރިޕް” ދާ ހިތްވާނެއެވެ. އެހެންނަމަވެސް އެ ބައްޕަގެ އަމިއްލަ ހިތްހަމަ ޖެހުމުގެ މައްޗަށް އިސްކުރަނީ ހަމަ ތިބާގެ ދިރިއުޅުމުވެ. ތިބާގެ ހިތްހަމަޖެހުމާއި ތިބާގެ އެދުންތަކެވެ.
ބައްޕައެއްގެ ލޯތްބަކީ ވަރަށް ވެސް ތަފާތު ލޯތްބެކެވެ. ތާ އަބަދު ގާތުގައި ހީ ސަމާސާ ކުރަން ނުހުރެދާނެއެވެ. އެހެންނަމަވެސް އެހެން މީހަކަށް ވުރެ ބޮޑަށް ތިމާދެކެ އިންތިހާ ލޯބިވާނެއެވެ. އެ ބައްޕަ އަބަދުވެސް މަސައްކަތް ކުރާނީ ތިބާއާއި މުޅި އާއިލާގެ ލޮލުން އެންމެ ކަރުނަ ތިއްކެއް ވެސް ނުފައިބާ ވޭތޯއެވެ. ބައްޕަގެ ނަސޭހަތުގައި އަބަދުވެސް ތަފާތު ގޮތެއް ހުންނާނެއެވެ. އެތައް އަސަރުތަކެއް އެ ފުރިހަމަ ނަސޭހަތުގެ ބަސްތަކުގެ ތެރޭގައި ފޮރުވިފައި ވާނެއެވެ.
ބައްޕަ ކަމަކާ ދެރަވެފައި ހުއްޓަސް އެކަން އާއިލާއަށް ފޮރުވަން މަސައްކަތް ކުރާނެއެވެ. ކީއްވެގެން ހެއްޔެވެ؟ އާއިލާ ވާނެ ދެރައަކާ އެމީހުންގެ ހިތަށް ކުރާނެ އަސަރުތަކަކާ ދޭތެރޭ ވިސްނާފައެވެ. އަސްލު ހަގީގަތުގައި ބައްޕައެއްގެ ޤުރުބާނީ އަކީ ކިހާ ބޮޑު އެއްޗެއްކަން އެނގޭ މީހާ އެ ބައްޕަ ކުރަމުންދާ މަސައްކަތާ ދޭތެރޭ ފަޚުރުވެރިވެ އެކަމާ ރޯނެކަން ގައިމެވެ.
ދުޢާއަކީ ހުރިހާ ބައްޕައިންނަށް ވެސް ދެދުނިޔޭގެ ބާއްޖަވެރިކަން ދެއްވައި ހެޔޮ ރަޙުމަތް ލެއްވުމެވެ. އާމީން!
ބައްޕަ ނެތް ކުދިންގެވެސް ހީރޯ އަކީ ހަމަ ބައްޕަތަ؟