އިންޑިއާއިން ހަދިޔާ ކުރާ ކޮވިޑް-19 ވެކްސިން ރާއްޖެ ގެނެސްފި
އިންޑިއާއިން ރާއްޖެއަށް ހަދިޔާ ކޮށްފައިވާ ވެކްސިން ރާއްޖެ ގެނެސްފިއެވެ.
ވެކްސިން ގެނައި އިންޑިއާގެ ޤައުމީ އެއަރލައިން އެއަރއިންޑިއާގެ ފްލައިޓް ދެންމެ ވަނީ ވެލާނާ އިންޓަރނޭޝަނަލް އެއާޕޯޓްގައި ޖައްސާފައެވެ.
ރާއްޖެއަށް ގެނެސްފައި ވަނީ، ސީރަމް އިންސްޓްޓިއުޓް އޮފް އިންޑިއާއިން އުފައްދާފައިވާ އޮކްސްފޯރޑް - އެސްޓްރެޒެނެކާގެ ކޮވިޑް ޝީލްޑް ވެކްސިނެވެ.
އެނގިފައިވާ ގޮތުގައި މި ވެކްސިން ޑޯޒްތައް ރާއްޖެ ގެނައުމާ ގުޅިގެން އެއާޕޯޓްގައި ހާއްސަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ. މި ރަސްމިއްޔާތުގައި ބައިވެރިވުމަށް ފޮރިން މިނިސްޓަރ އަބްދުﷲ ޝާހިދާއި ސަރުކާރުގެ ބައެއް އިސް ބޭފުޅުން މިހާރު ވެސް ތިއްބެވީ ވެލާނާ އެއާޕޯޓްގައެވެ.
ވެކްސިން އާ ގުޅުން ހުރި އެޕްރޫވަލްތައް މިހާރު ދިވެހި ސަރުކާރުން ދީފައިވާ ކަމަށް އިންޑިއާގެ "ވިއޮން" ނޫހުން ރިޕޯޓު ކޮށްފައިވެއެވެ.
ރާއްޖެއަކީ އިންޑިއާއިން ވެކްސިން ފޯރު ކޮށްދިން ފުރަތަމަ ޤައުމެވެ.
ނަމަވެސް ރާއްޖެއަށް ގެންނަން އުޅޭ ކަމަށް އިންޑިއާގެ ނޫސްތަކުން ބުނާ ވެކްސިންގެ އެއްވެސް މައުލޫމާތެއް ދިވެހި ސަރުކާރުން ވެސް އަދި އެޗްއީއޯސީން ވެސް ހާމަ ކޮށްފައެއް ނުވެއެވެ.
ރާއްޖެއަށް ބޭނުންވާ ކޮވިޑް-19 ވެކްސިން ވަރަށް އަވަހަށް އިންޑިއާއިން ފޯރުކޮށްދޭނެ ކަމަށް އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވަނީ މިހަފްތާގެ ތެރޭގައި ވިދާޅުވެފައެވެ.
