ރައީސް ޔާމީންގެ އިސްތިއުނާފު މައްސަލައިގެ ހުކުމް އިއްވުން މާދަމާ
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ހަސް އަހަރާއި ހަ މަސް ދުވަހަށް ޖަލަށް ލައި ޖޫރިމަނާ ކުރި ހުކުމުގެ އިސްތިއުނާފު މައްސަލައިގެ ހުކުމް އިއްވުން މާދަމާ އަށް ތާވަލު ކޮށްފިއެވެ.
މިމައްސަލައިގެ ހުކުމް އިއްވުން ކުރިން ތާވަލު ކުރީ މިމަހުގެ 14 ވަނަ ދުވަހު ބޭއްވުމަށެވެ. ނަމަވެސް އެދުވަހުގެ އަޑުއެހުން ފަހުން ވަނީ ފަސްކޮށްފައެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ކޮރަޕްޝަންގެ މައްސަލައިގެ ތެރެއިން އެސްއޯއެފް އެކައުންޓް މެދުވެރިކޮށް، ރައީސް ޔާމީންގެ އެކައުންޓަށް އެއް މިލިއަން ޑޮލަރު ޖަމާކޮށްފައިވާތީ އެ މައްސަލައިގެ ޝަރީއަތް ނިމެންދެން އެމަނިކުފާނު ބަންދުގައި ބަހައްޓަން ކްރިމިނަލް ކޯޓުން ވަނީ އަމުރު ކޮށްފައެވެ. ކްރިމިނަލް ކޯޓުން އަމުރު ނެރުނީ ރައީސް ޔާމީން ހެއްކަށް ނުފޫޒު ފޯރުވާ ކަަމަށް ދައުލަތުން ހުށަހެޅުމުންނެވެ.
އެޖަލު ހުކުމް ތަންފީޒު ކުރައްވަމުން ގެންދަވާތާ މިހާރު އަހަރަކަށްވުރެ ގިނަ ދުވަސް ވެފައިވާއިރު، ހައިކޯޓުގައި އެހުކުމުގެ އިސްތިއުނާފު ޝަރީޢަތުގެ އަޑުއެހުންތައް މިދިޔަ މަހުގެ އެއްވަނަ ދުވަހު ވަނީ ނިންމަވާލައްވާފައެވެ.
