ރާއްޖެއަށް އެންމެ ގިނަ އަދަދަކަށް ފަތުރުވެރިން ދަތުރު ކޮށްފައިވަނީ އެމިރޭޓްސްއިން
އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތް ކޮށްފައިވަނީ އެމިރޭޓްސް ގެ ފްލައިޓުތަކުން ކަމަށް ޓޫރިޒަމް މިނިސްޓްރީން ހާމަ ކޮށްފިއެވެ.
އެމިނިސްޓްރީން ނެރުނު "މޯލްޑިވްސް ޓޫރިޒަމް އަޕްޑޭޓް" ރިޕޯޓުގައިވާ ގޮތުގައި މިހިނގާ ޖެނުއަރީ މަހުގެ އެއްވަނަ ދުވަހުން ފެށިގެން 18 ވަނަ ދުވަހާ ހަމައަށް ރާއްޖެއަށް އެމިރޭޓްސްގެ ފްލައިޓުތަކުގައި 11504 ފަސިންޖަރުން ވަނީ ދަތުރުކޮށްފައެވެ. މިއީ ފްލައިޓު މޫވްމަންޓަށް ބަލާނަމަ 134 ދަތުރުކަމަށް ޓޫރިޒަމް މިނިސްޓްރީން ހާމަކުރެއެވެ.
ދުބާއީ އާއި ރާއްޖެއާއި ދެމެދު އެމިރޭޓްސް އިން ދަތުރުތައް ބާއްވާފައިވާއިރު، ހަފްތާއަކު ހަތް ދަތުރު އެފްލައިޓުތަކުން ރާއްޖެއަށް ބާއްވައެވެ.
މިމުއްދަތުގައި ރާއްޖެއަށް ދެވަނައަށް އެންމެ ގިނަ ދަތުރުކޮށްފައި ވަނީ ޤަތަރު އެއާވޭސްގެ ފްލައިޓުތަކުން ނެވެ. އެއެއާލައިނުގެ ފްލައިޓުތަކުގައި 6951 ފަސިންޖަރުން ވަނީ ދަތުރުކޮށްފައިވާއިރު ޤަތަރު އެއަރވޭސްއިން ރާއްޖެއަށް ދަތުރުތައް ބާއްވަނީ ޤަތަރުގެ ވެރިރަށް ދޯހާއިން ސީދާ ވެލާނާ އިންޓަރނޭޝަނަލް އެއަރޕޯޓަށެވެ.
ރާއްޖެއަށް ތިންވަނައަށް އެންމެ ގިނަ ދަތުރު ކޮށްފައިވަނީ ރަޝިޔާގެ އޭރޯފްލޯޓުގެ ފްލައިޓުތަކުގައެވެ. ރަޝިއާއާއި ރާއްޖެއާ ދެމެދު ދަތުރުތައް ބާއްވާ އޭރޯފްލޯޓުގެ ފްލައިޓުގައި ރާއްޖެއަށް މިއަހަރުގެ ފުރަތަމަ 18 ދުވަސްތެރޭގައި ވަނީ 6362 ފަތުރުވެރިން އައިސްފައެވެ.
