އަބުރު ކަތިލަން އުފައްދާ ޑޮކިއުމެންޓްރީތަކުގެ ސަބަބުން ލިބޭނީ ސަވާބު ކަމަށް ރައީސް މުއިއްޒު ވިދާޅުވެއްޖެ

ވެރިކަން ކުރާ މައި ޕާޓީ، ޕީއެންސީން ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން، އެމަނިކުފާނުގެ އަބުރުފުޅު ނަގާލުމުގެ ބޭނުމުގައި ހަދަމުންދާ ޑޮކިއުމެންޓްރީތަކާ މެދު އުފާކުރައްވާ ކަމަށާއި، އެފަދަ ދޮގު ތުހުމަތުތަކުގެ ސަބަބުން އާހިރަތުގައި ލިބިވަޑައިގަންނަވާނީ ސަވާބާއި ދަރުމަ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ސަރުކާރުން ހިންގަމުންދާ މަޝްރޫއުތަކާއި ގެންގުޅޭ ސިޔާސަތުތަކަށް ފާޑުކިޔާނެ ޖާގައެއް ނެތުމުން، އިދިކޮޅު ފަރާތްތަކުން މިހާރު މަސައްކަތްކުރަނީ ހަގީގަތާ ހިލާފު ވާހަކަތައް ފަތުރައިގެން އެމަނިކުފާނުގެ އަބުރުފުޅު ކަތިލުމަށް ކަމުގައި ރައީސް ފާހަގަކުރެއްވިއެވެ. ނަމަވެސް، ތެދު މައުލޫމާތުގެ މައްޗަށް ބިނާކޮށް ނެރޭ އެއްވެސް އުފެއްދުމަކުން އެމަނިކުފާނުގެ ނަންފުޅަށް ހުތުރެއް ނުގެނެވޭނެކަމުގެ ފުރިހަމަ ޔަގީންކަން އޮތްކަން އެމަނިކުފާނު ހާމަކުރެއްވިއެވެ.

ޒުވާނުންނާ އެކު ދާދިފަހުން ބޭއްވެވި ބައްދަލުވުމަކަށް އަލިއަޅުއްވާލައްވަމުން ރައީސް ވިދާޅުވީ، ސިޔާސީ ގޮތުން ކުރިމަތިކުރުވާ ފިއްތުންތަކާއި ދޮގު އިލްޒާމުތަކުގެ ކުރިމަތީގައި ސާބިތުވެ ހުންނެވުމުގެ ސިއްރަކީ އަމިއްލަ ނަފްސަށް އޮންނަ އިތުބާރާއި މާތްﷲއަށް ކުރާ އަޅުކަން ކަމުގައެވެ. އަދި އިސްލާމްދީނުގައި އަންގަވާފައިވާ ގޮތުގެ މަތިން، މީހަކާ މެދު ދޮގު ވާހަކަ ދައްކައި ފުރައްސާރަކުރާ ހިނދު ކެތްތެރިވުމަކީ މަތިވެރި ސަވާބު ލިބޭނެ ކަމަކަށް ވުމުން، އެފަދަ ޑޮކިއުމެންޓްރީތައް އިތުރަށް އުފެއްދުމަށް އެމަނިކުފާނު ގޮވާލެއްވިއެވެ.

ރައީސް މުއިއްޒު މި މޭރުމުން ވާހަކަފުޅު ދައްކަވާފައި މިވަނީ، އޮންލައިން ނޫސް "އަދަދު" އިން އާންމުކުރި ހާއްސަ ޑޮކިއުމެންޓްރީއަކާ ގުޅިގެން އެ ނޫހުގެ ބައެއް އިސް ނޫސްވެރިންގެ މައްޗަށް ޝަރީއަތް ހިންގަމުންދާ ދަނޑިވަޅެއްގައެވެ. މި މައްސަލައާ ގުޅިގެން، ކްރިމިނަލް ކޯޓުން ނެރެފައިވާ އަމުރަކާ ހިލާފުވި ކަމަށް ބުނެ، އެ ނޫހުގެ ދެ ނޫސްވެރިޔަކު ވަނީ ޖަލަށްލައިފައެވެ.