އިންޑިއާއިން އުފެއްދި ވެކްސިން ގެނައީ ހުއްދަ ލިބުމާއެކު ވަގުތުން ވެކްސިން ޖަހަން ފަށަން: މަބްރޫކް
ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގެ ހުއްދަ ނުލިބެނީސް، ކޮވިޑް-19 އިން ރައްކާތެރިވުމަށް އަވައްޓެރި އިންޑިއާއިން އުފެެއްދި ވެކްސިން ގެނައީ، އެހުއްދަ ލިބުމާއެކު ވެކްސިން ޖަހަން ފަށަން ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
ފެތުރެމުން އަންނަ ކޮވިޑް-19 ހުއްޓުވުމަށް ރާއްޖޭގެ ބައެއް މީޑިއާތައް ގުޅިގެން ފެށި "ކޮވިޑް ހުއްޓުވާނީ އަހަރެން" ކެމްޕޭނު ނިންމާލުމުގެ ގޮތުން ރޭ ބޭއްވި ޚާއްސަ ރަސްމިއްޔާތު ޝަރްފުވެރި ކޮށްދެއްވަމުން މަބްރޫކު ވިދާޅުވީ ވެކްސިން ނުޖަހައި އެ ބަލިން އަރައި ގަނެވެން މިވަގުތު ނެތް ކަމަށާއި ސިއްޙީ މާހިރުން ވެސް ކޮވިޑް-19 އިން ރައްކާތެރިވުމަށް ވެކްސިން ޖަހަން ލަފާ ދެއްވާ ކަމަށެވެ.
އިންޑިއާގެ ސެރަމް އިންސްޓިޓިއުޓުން އުފެއްދި "ކޮވިޝީލްޑް" ވެކްސިންގެ އެއް ލައްކަ ޑޯޒް އެޤައުމުން ވަނީ ރާއްޖެއަށް ހިލޭ ހަދިޔާ ކޮށްފައެވެ.
މިވެކްސިނަށް ދުނިޔޭގެ ސިއްޙަތު ޖަމިއްޔާގެ ފަރާތުން ހުއްދަ ނުލިބެނީސް އެވެކްސިން ރާއްޖެއަށް ގެނައުމުން، ބައެއް ފަރާތްތަކުން ވަނީ ސުވާލު އުފައްދާފައެވެ.
"ގާތްގަނޑަކަށް ދުނިޔޭގައި އުފެއްދި ހުރިހާ ވެކްސިނެއް އުފައްދަން ފައްޓައިފި އެއްވެސް އެޕްރޫވަލްއެއް ނުލިބެނީސް. އަދި ސްޓޮކް ކުރަން ފަށައިފި އެއްވެސް އެޕްރޫވަލްއެއް ނެތި. ބޭނުމަކީ އެ އެޕްރޫވަލް ލިބޭ ވަގުތު، ސިއްހީ ރައްކާތެރިކަން ކަށަވަރުވާ ވަގުތު އަތުގައި ސްޓޮކް ހުރުން. ވަގުތުން ވަގުތަށް ވެކްސިން ޖަހަން ފެށޭ މިންވަރަށް." އެކަމާ ގުޅޭ ގޮތުން މަބްރޫކް ވިދާޅުވިއެވެ.
