މަޖިލިހުގެ ޓިކްޓޮކް އެކައުންޓު ވެރިފައި ކޮށްފި
ރައްޔިތުންގެ މަޖިލީހުގެ ރަސްމީ ޓިކްޓޮކް އެކައުންޓު ވެރިފައި ކޮށްފިއެވެ.
ދުނިޔޭގެ އެތައް ބަޔަކު އާންމުކޮށް މުނިފޫހިފިލުވުމަށް ވީޑިއޯ ތައްޔާރުކުރާ ޓިކްޓޮކްގެ އެކައުންޓެއް ރައްޔިތުންގެ މަޖިލީހުން ހުޅުވީ އިއްޔެއެވެ.
އެއެކައުންޓު ހުޅުވިކަން އިއުލާނު ކުރަމުން، ޓްވިޓާގައި އާންމުކޮށް އެދިފައި ވަނީ އެއެކައުންޓު ފޮލޯ ކުރުމަށެވެ. އިއްޔެ މަޖިލިސް އެކައުންޓު ޓިކްޓޮކްގައި ވެރިފައި ކޮށްފައި ނެތް ނަމަވެސް، މިއަދު އެއެކައުންޓު ވަނީ ވެރިފައި ކޮށްފައެވެ.
މިހާތަނަށް 800 އަށްވުރެ ގިނަ މީހުން މަޖިލިސް ޓިކްޓޮކް އެކައުންޓު ފޮލޯ ކޮށްފައިވެއެވެ.
މަޖިލިހުން ޓިކްޓޮކް އެކައުންޓެއް ހުޅުވުމުން، އެ ނިންމުމާ މެދު ވަރަށް ބޮޑަށް ހިތްހަމަޖެހިވަޑައިގެން މަޖިލީހުގެ ރައީސް، ކުރީގެ ރައީސް މުހައްމަދު ނަޝީދު ޓްވީޓެއް ވެސް ކުރެއްވިއެވެ.
އެގޮތުން ރައީސް ނަޝީދު ކުރެއްވި ޓްވީޓެއްގައި ވިދާޅުވީ ދިވެހި ޒުވާނުންގެ ގިނަ ބަޔަކަށް މީގެ ފަހުން ޓިކްޓޮކް މެދުވެރިކޮށް މަޖިލީހުގެ މަސައްކަތްތައް ފެނިގެންދާނެ ކަމަށާއި މިއީ ވަރަށް ރަނގަޅު ފިޔަވަޅެއް ކަމަށެވެ.
ރައްޔިތުންގެ މަޖިލީހުގެ ޓިކްޓޮކް އެކައުންޓު ވެރިފައިވީ ނަމަވެސް، މިހާތަނަށް ހިއްސާ ކޮށްފައި ވަނީ އެންމެ ވީޑިއޯ އެކެވެ. އެއީ މިދިޔަ އަހަރުގެ ރައްޔިތުންގެ މަޖިލިސް ޖަލްސާތައް ރައީސް އިބްރާހިމް މުޙައްމަދު ޞާލިޙު ފައްޓަވާ ދެއްވުމުގެ ގޮތުން ދެއްކެވި ވާހަކަފުޅަށް ހަދާފައިވާ ކުރު ވީޑިއޯ ކޮޅެކެވެ.
Ads by STO
