ޤައިދީންނަށް ޙާއްސަ ކޮށްގެން ކުރިއަށްގެންދާ ކޯހެެއްގެ ކިޔެވުން ފަށައިފި
ޤައިދީންނަށް އަމާޒުކޮށްގެން ކުރިއަށް ގެންދާ ކޯހެއްގެ ކިޔެވުން ފަށައިފިއެވެ.
މާފުށީ ޖަލުގައި ފަސް ހަފްތާގެ މުއްދަތަށް ކުރިއަށްގެންދާ މި ކޯހުގައި 12 ގައިދީންނާއި 15 ޕްރިޒަން އޮފިސަރުން ވަނީ ބައިވެރިވެފައެވެ. މި ކޯހަކީ މޯލްޑިވްސް ކަރެކްޝަނަލް ސަރވިސް(އެމްސީއެސް) އިން ޤައިދީންނަށް އަމާޒުކޮށްގެން ކުރިއަށް ގެންދާ “ސެޓްފިކެޓް 1 އިން ހައުސް ވަޔަރިންގ އެންޑް އިލެކްޓްރިޝަން” ކޯހެވެ. މި ކޯހުގެ ހަވަނަ ބެޗްގެ ކިޔެވުން އިއްޔެ ވަނީ ފަށާފައެވެ.
މި ކޯހުގެ މަގްސަދަކީ ކޯހުގެ ބައިވެރިންނަށް ކަރަންޓު ވައިރުކުރުމާ ބެހޭ މައުލޫމާތު ދިނުމާއި، ވައިރު ކުރުމުގައި ބޭނުންކުރާ އާލާތްތަކާއި، ތަކެތި ކިޔައިދީ، ކަރަންޓާ ބެހޭ އެންމެހާ މަސައްކަތްތައް ކުރުމުގައި ވިސްނަންވީ ކަންތައްތައް އަންގައިދީ، ބޭސިކް ކަރަންޓު ވައިރު ކުރާނެ ގޮތްތައް ދަސްކޮށްދިނުމުގެ އިތުރުން، ޖަލުގެ މާޙައުލުން ނުކުތުމަށްފަހު ގޯތި ގެދޮރާއި އެހެނިހެން އިމާރާތްތަކާއި ތަންތަން ވައިރު ކުރާނެ ގޮތްތައް ދަރިވަރުންނަށް ދަސްކޮށްދިނުމެވެ.
މި ކޯސް ފުރިހަމަ ކުރާ ފަރާތްތަކަށް އެމް.ކިއު.އޭއިން ލެވަލް 01 ގެ ފެންވަރަށް ޤަބޫލުކުރާ ސެޓްފިކެޓެއް ލިބޭނެއެވެ. އަދި މި ކޯހުގައި ކިޔަވައި ދެއްވަނީ އެމްސީއެސް ގެ އިންސްޓިޓިއުޓް ފޯކަރެކްޝަނަލް ސްޓަޑީޒް (އައިކޯސްޓް) ގެ މުދައްރިބުންނެވެ.
Ads by STO
