ކޮރަޕްޝަނާ ދެކޮޅަށް ރާއްޖެ އަށް ބޮޑު ކުރިއެރުމެއް، ރައީސް ވިދާޅުވީ މަސައްކަތް އަދި ނުނިމޭ ކަމަށް
ކޮރަޕްޝަން ހުއްޓުވަން ކުރާ މަސައްކަތް ނިމުމަށް އަދި ގާތް ނުވި ނަމަވެސް، ކުރާ މަސައްކަތުން ރަނގަޅު ނަތީޖާއެއް ފެންނަމުން ދިޔުމަކީ ލިބޭ ހިތްވަރެއް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ކޮރަޕްޝަން ޕާސެޕްޝަން އިންޑެކްސް ގައި ދުނިޔޭގެ ނިސްބަތުން ރާއްޖެއިން ހޯދި ބޮޑު ކުރިއެރުމަށް އިޝާރާތް ކުރައްވައި ރައީސް ވިދާޅުވީ ކޮރަޕްޝަނާ ދެކޮޅަށް ސަރުކާރުން ކުރަމުންދާ މަސައްކަތުގެ ހެޔޮ ނަތީޖާތައް ފެންނަމުން ދިޔަ ނަމަވެސް، އެ މަސައްކަތް ނިމުމާ އަދި ގާތް ވެސް ނުވާ ކަމަށެވެ.
"ކޮރަޕްޝަން ހުއްޓުވަން ކުރާ މަސައްކަތް ނިމުމަށް އަދި ގާތްވެސް ނުވި ނަމަވެސް، ކުރާ މަސައްކަތުން ރަނގަޅު ނަތީޖާއެއް ފެންނަމުން ދިޔުމަކީ ލިބޭ ހިތްވަރެއް،" ރައީސް ކުރެއްވި ޓްވީޓެއްގައި ވިދާޅުވިއެވެ.
ޓްރާންސްޕޭރެންސީ އިންޓަރނޭޝަނަލް (ޓީއައި) ގެ ފަރާތުން ނެރުނު 2020 ވަނަ އަހަރުގެ ކޮރަޕްޝަން ޕަރސެޕްޝަން އިންޑެކްސް (ސީޕީއައި) ގައި ދިވެހިރާއްޖެ 55 ދަރަޖަ މައްޗަށް ވަނީ ޖެހިފައެވެ.
މިކަމާ ގުޅިގެން ޓްރާންސްޕޭރެންސީ މޯލްޑިވްސްއިން ނެރުނު ބަޔާނެއްގައި ބުނީ 2020 ވަނަ އަހަރުގެ ސީޕީއައި ހެދުމުގައި ބަލާފައި ވާނީ ދުނިޔޭގެ 180 ގައުމާއި ދަޢުލަތްތައް ހިންގުމުގައި ކޮރަޕްޝަން އަށަގަނެފައިކަމަށް ގަބޫލުކުރެވޭ މިންވަރު ބެލުމަށް ކޮށްފައިވާ ސަރވޭތަކަށާއި ފަންނީ މާހިރުންގެ ހޯދުންތަކުގެ އަލީގައި ޝާއިރުކުރާ ދިރާސާތަކުގެ މައްޗަށް ކަމަށެވެ.
މިފަހަރުގެ ސީޕީއައި އިން ދައްކާގޮތުގައި 43 ޕޮއިންޓާއެކު ރާއްޖެ އޮތީ 183 ގައުމުގެ ތެރެއިން 75 ވަނައިގައެވެ. 2019 ވަނަ އަހަރު ގައުމުތައް ދަރަޖަ ކުރެވުނުއިރު ރާއްޖެއަށް ލިބުނީ 130 ވަނައެވެ. އެ އަހަރުގެ ސީޕީއައި ގައި ރާއްޖެއަށް ލިބިފައި ވަނީ އެންމެ 29 ޕޮއިންޓެވެ.
ޓްރާންސްޕޭރެންސީން އިތުރަށް ބުނެފައި ވަނީ މިއީ ގައުމުތަކުގެ ކޮރަޕްޝަން އަށަގަނެފައިވާ މިންވަރު ދެނެގަތުމުގައި މަގުސަދުގައި ޓްރާންސްޕޭރެންސީން ހިންގި ދިރާސާއެއް ކަމަށެވެ. އަދި މިހާރު ދިމާވެގެން އުޅޭ ކޮވިޑުގެ ހާލަތުގައި އެ ބަލިމަޑުކަމާ ދެކޮޅަށް އެޅޭ އެންމެ ބޮޑު ހުރަހަކީ ވެސް ކޮރަޕްޝަން ކަމަށް ޓްރާންސްޕޭރެންސީން ބުނެފައި ވެއެވެ.
ކޮރަޕްޝަނާ ދެކޮޅަށް ފުރިހަމަ ކަމާއެކު މަސައްކަތް ކުރުމަށް އަދިވެސް ނުކުޅެދިފައިވާކަން މި ދިރާސާއިން ދައްކާ ކަމަށް ޓްރާންސްޕޭރެންސީން ބުނެއެވެ. އަދި ރާއްޖެ އަދިވެސް ހިމެނެނީ މިއިންޑެކްސްގައި 50 އަށް ވުރެ ދަށުން ޕޮއިންޓް ލިބުނު ތިންބައިކުޅަ ދެބައި ގައުމުތަކުގެ ތެރޭގައިކަން އެ ޖަމިއްޔާއިން ފާހަގަ ކުރިއެވެ.
