ރައީސް ޔާމީން މިނިވަން ކުރަން އަވަށްޓެރި ޤައުމުތަކުގެ އެހީއަށް އެދިއްޖެ
މަނީ ލޯންޑަރ ކުރިކަމުގެ ކުށް ސާބިތުވެއްޖެ ކަމަށް ކަނޑައަޅާ ފަސް އަހަރާއި ހަ މަސް ދުވަހުގެ ޖަލު ހުކުމެއް އިއްވާފައިވާ ކުރީގެ ރައީސް އަދި އިދިކޮޅު ސިޔާސީ ލީޑަރ ޢަބްދުﷲ ޔާމީން ޢަބްދުލްޤައްޔޫމް މިނިވަން ކުރަން އަވައްޓެރި ޤައުމުތަކުގެ އެހީއަށް އެދިއްޖެއެވެ.
އިދިކޮޅުގެ ފަރާތުން މިކަމަށް ގޮވާލައްވާ، ރައީސް ޔާމީން ގެ ޤާނޫނީ ވަކީލުންގެ ޓީމުގައި އެންމެ އިސްކޮށް ހަރަކާތްތެރިވާ އަދި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވީ ރައީސް ޔާމީން ޖަލުގައި ބަހައްޓާފައި ހުންނެވީ، ސިޔާސީ ދައުވާތަކެއް ކޮށްގެން ކަމަށެވެ.
ޝަރުއީ ދާއިރާގެ މިނިވަންކަމަށް، ސިޔާސީ ކުލެޖެހިފައިވާ ޖުޑީޝަލް ސާވިސް ކޮމިޝަން (ޖޭއެސްސީ) އިން ހުރަސް އަޅަމުންދާ ކަމަށް ވެސް ޑރ. ޖަމީލު ކުރެއްވި ޓްވީޓެއްގައި ތުހުމަތު ކުރައްވާފައެވެ.
ޑރ. ޖަމީލުގެ ވާހަކަފުޅުގައި، އިދިކޮޅު ސިޔާސީ ލީޑަރުން ހައްޔަރު ކުރަމުން ގެންދާކަން ވެސް ވަނީ ފާހަގަ ކުރައްވާފައެވެ.
މުޅި ރާއްޖެ ހަމަނުޖެހުމެއްގެ ތެރެއަށް ވެއްޓުމުގެ ކުރިން، ރައީސް ޔާމީން މިނިވަން ކުރުމަށް ދިވެހި ސަރުކާރަށް ބާރު އަޅައިދިނުމަށް، އަވަށްޓެރި ސްރީލަންކާ، އިންޑިއާގެ އިތުރުން ޕާކިސްތާނުގެ ލީޑަރުން ޓެގް ކުރައްވައި، ޑރ.ޖަމީލް ކުރެއްވި ޓްވީޓެއްގައި ގޮވާލައްވާފައިވެއެވެ.
