އިންޑިއާގެ ކޮވިޝީލްޑް ވެކްސިން މާދަމާ ސްރީލަންކާގައި ޖަހަން ފަށަނީ
މުޅި ދުނިޔެއަށް ފެތުރިފައިވާ ނުރައްކާތެރި ކޮވިޑް-19 ގެ ވަބާއިން ސަލާމަތް ވުމަށް ޓަކައި އިނގިރޭސިވިލާތުގެ އޮކްސްފޯޑް ޔުނިވާސިޓީއާއި އަސްޓްރާޒެނީކާ ކުންފުނި ގުޅިގެން ތަރައްގީ ކޮށް، ސީރަމް އިންސްޓިޓިއުޓް އޮފް އިންޑިއާއިން ތައްޔާރު ކުރި ވެކްސިން ކެމްޕެއިން އަވައްޓެރި ސްރީ ލަންކާގައި ފެށުމަށް ހަމަޖެހިއްޖެއެވެ.
އެގޮތުން އެ ވެކްސިންގެ 5 ލައްކަ ޝިޕްމެންޓު މިއަދު ވަނީ ލަންކާއަށް ގެންގޮސްފައެވެ. މި ވެކްސިން ލަންކާއަށް ޚާއްސަ ފްލައިޓެއްގައި ގެންދެވިފައިވާއިރު، މި ޝިޕްމެންޓަކީ "ފުރަތަމަ އަވަށްޓެރިޔާ" ސިޔާސަތުގެ ތެރެއިން، އިންޑިއާ ސަރުކާރުން ސްރީލަންކާއަށް ހަދިޔާކުރި ވެކްސިން ޝިޕްމަންޓެކެވެ.
މާދަމާ ލަންކާގައި ވެކްސިން ދޭން ފަށާނީ 6 ހޮސްޕިޓަލެއްގައި ކަމަށާއި، އެގޮތުން ފުރަތަމަ ބުރުގައި ވެކްސިން ދިނުމަށް ހަމަޖެހިފައި ވަނީ ހޮސްޕިޓަލުތަކުގައި މަސައްކަތް ކުރާ މުވައްޒަފުންނަށް ކަމަށް ސްރީލަންކާގެ ސިއްހަތާ ބެހޭ ވުޒާރާއިން މައުލޫމާތު ދެއެވެ.
މީގެ އިތުރުން ކޮލަމްބޯ ނޭޝަނަލް ހޮސްޕިޓަލް، ކޮލަމްބޯ ސައުތު ޓީޗިންގް ހޮސްޕިޓަލް، ކޮލަމްބޯ ނޯޓު ޓީޗިންގް ހޮސްޕިޓަލް، ހޮމަގަމަ ބޭސް ހޮސްޕިޓަލް، ކޮލަމްބޯ އީސްޓް ބޭސް ހޮސްޕިޓަލް އަދި އަންގޮޑާގައި ހިންގާ ނޭޝަނަލް އިންސްޓިޓިއުޓް އޮފް އިންފެކްޝަސް ޑިޒީޒަސް (އައިޑީއެޗް)ގެ މުވައްޒަފުންގެ ތެރެއިން ހޮވާލެވޭ ބަޔަކަށް ވެކްސިން ދިނުމަށް ހަމަޖެހިފައި ވާ ކަމަށް ސިއްހަތާ ބެހޭ ވުޒާރާގެ ޑެޕިއުޓީ ޑައިރެކްޓާ ޖެނެރަލް، ޑރ ހިމާންތާ ހީރާތު ވިދާޅުވިއެވެ.
ހަމައެއާއެކު ވެކްސިން ޕްރޮގްރާމް ފެށުމުގެ ގޮތުން، މި ހޮސްޕިޓަލުތަކުން 25 ޕަސެންޓް މުވައްޒަފުންނަށް ވެކްސިން ޖަހާނެ ކަމަށް ޑރ ހީރާތު ވިދާޅުވެފައި ވާއިރު، ބާކީ ތިބި މުވައްޒަފުންނަށް ވެސް ކުރިއަށް އޮތް ދުވަސްތަކުގައި ވެކްސިން ދޭނެ ކަމަށް ޑރ ހީރާތު ވަނީ ފާހަގަ ކުރައްވާފައެވެ.
