ސަލްމާން މިސްކިތް ހުޅުވުން ލަސްވާތީ ޑރ. މުޢިއްޒު ކަންބޮޑުވުން ފާޅުކުރައްވައިފި
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގެ ވެރިކަމުގައި އިމާރާތް ކުރަން ފެށި ސަލްމާން މިސްކިތް ހުޅުވުން ލަސްވާތީ ކުރީގެ ހައުސިންގ މިނިސްޓަރ ޑރ. މުޙައްމަދު މުޢިއްޒު ކަންބޮޑުވުން ފާޅު ކުރައްވައިފިއެވެ.
އެގޮތުން ސަލްމާން މިސްކިތް ނުހުޅުވާ ލަސް ވަނީ އަދިވެސް ހަދާ ނުނިމޭތީތޯ، ޑރ. މުޢިއްޒު މިއަދު ކުރެއްވި ޓްވީޓެއްގައި ސުވާލު ކުރައްވާފައި ވެއެވެ.
ކުރިން ޝެޑިއުލް އޮތް ގޮތުންނަމަ 2019 ޖުލައިގައި މަސައްކަތް ނިމޭނެ ކަމަށް، މާލެ މޭޔަރު ކަމަށް ވެސް މިފަހަރު ވާދަ ކުރައްވާ ޑރ. މުޢިއްޒު ވިދާޅުވިއެވެ.
"ކުރިން ނިންމާފަ އޮތް ގޮތާ ޚިލާފަށް ޤުރްއާންއާ ބެހޭ މަރުކަޒު އެތަނަށް ބަދަލު ނުކުރުން ފަދަ ބޮޑެތި ބަދަލުތަކެއް ގެންނަ ކަމުގެ މައުލޫމާތު ވެސް ލިބޭ" ޑރ. މުޢިއްޒުގެ ޓްވީޓުގައި ވިދާޅުވެފައިވެއެވެ.
ސަލްމާން މިސްކިތަކީ، ސައުދީގެ ސަލްމާން ރަސްގެފާނުގެ އެހީއާއި އެކު ދިވެހި ސަރުކާރުން ޚަރަދު ކޮށްގެން އެޅި މިސްކިތެކެވެ. މި މިސްކިތް ހުޅުވަން އެކިއެކި ތާރީހު މިހާރުގެ ސަރުކާރުން ދީފައިވީ ނަމަވެސް، އަދިވެސް އެ މިސްކިތް ހުޅުވާފައެއް ނުވެއެވެ.
Ads by STO
