މުޒާހަރާގެ ބައިވެރިންނާ ދެކޮޅަށް ޕެޕަރ ސްޕްރޭ ބޭނުންކުރާނެ ކަމަށް ބުނެ ފުލުހުން އިންޒާރު ދީފި
އިދިކޮޅު ފަރާތްތަކުން "އިންސާފު ކޮބާ"ގެ ނަމުގައި މާލޭގައި މިވަގުތު ހިންގަމުންދާ އިހުތިޖާޖުގައި، ސޯސަން މަގު ސަރަހައްދުގައި ޖަމާވެ، މުޒާހަރާ ކުރަމުންދާ މީހުންނާ ދެކޮޅަށް ޕެޕާ ސްޕްރޭ ބޭނުން ކުރާނެ ކަމުގެ އިންޒާރު ފުލުހުން ދީފިއެވެ.
ސޯސަން މަގުގެ ހަތަރު އަނގޮޅިއާ ވި ހިސާބުގައި، މަޖީދީމަގުގައި އެއްވެ ތިބި މުޒާހަރާ ވެރިންނާ މުޚާތަބު ކުރަމުން ފުލުހުން ބުނީ، ފުލުހުންނާ އެއްވެސް މިންވަރަކަށް ކޮންޓެކްޓު ވެއްޖެނަމަ، ފުލުހުން ބާރުގެ ބޭނުން ކުރާނެ ކަމަށެވެ. އެ ސަރަހައްދުގައި މުޒާހަރާ ކުރަމުން ގެންދާ ބައެއް މީހުން މިހާރު ތިބީ މަގުމަތީގައި އިށީންދެގެންނެވެ.
ޕީޕީއެމް އޮފީސް ދޮށުގައި ފެށިގެން ދިޔަ މި މުޒާހަރާގެ ބައިވެރިން ހެންވޭރު ޕީޕީއެމް ސަރަހައްދުގައި އެއްވާން ފެށުމާއެކު ފުލުހުން ވަނީ ޕީޕީއެމް އޮފީސް ކުރިމަތީގައި ބެރިކޭޑުތަކެއް ޖަހައިފައެވެ. އެހެންނަމަވެސް އެ ބެރިކޭޑުތައް ހުރަސްކޮށް މަގުތަކަށް މުޒާހަރާވެރިން ނުކުމެ، މާފަންނަށް ދިއުމަށްފަހު އަނބުރާ ހެންވޭރަށް އައިސް ސޯސަން މަގު ހަތަރު އަނގޮޅި ކަންމަތީގައި މަޑުކޮށްގެން ތިބީ ފުލުހުން ހުރަސް އެޅުމުންނެވެ.
Ads by STO
