ރައީސް ޔާމީންގެ މައްޗަށް އުފުލާފައިވާ ދައުވާތަކަށް އެމަނިކުފާނު އިންކާރު ކުރައްވައިފި
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް އުފުލާފައިވާ ދައުވާތަކަށް އެމަނިކުފާނު އިންކާރު ކުރައްވައިފިއެވެ.
ރައީސް ޔާމީންގެ މައްޗަށް ދައުލަތުން އުފުލާފައިވާ މަނީ ލޯންޑަރިންނާއި ރިޝްވަތު ގަބޫލު ކުރުމުގެ ދައުވާއަށް އެމަނިކުފާނު ޖަވާބުދާރީ ވުމަށް މިއަދު ކްރިމިނަލް ކޯޓުގައި ބާއްވާފައިވާ ޝަރީއަތުގެ މަޖިލިހުގައި، އެމަނިކުފާނު ފަރާތުން ބުނެފައި ވަނީ ކޮށްފައިވާ ދައުވާތަކަށް އިންކާރު ކުރައްވާ ކަމަށެވެ.
ރައީސް ޔާމީންގެ ވަކީލުންގެ ޓީމުންގެ ފަރާތުން ، އިސް ވަކީލު ޑރ. މުޙައްމަދު ޖަމީލު އަހުމަދު މިއަދުގެ ޝަރީޢަތުގެ މަޖިލީހުގައި ވިދާޅުވެފައި ވަނީ މިސަރުކާރުން ރައީސް ޔާމީންގެ މައްޗަށް އުފުލާފައިވާ ދެ ދައުވާއަކީ ވެސް "ހަސަދައެއް ފިލުވަން" އުފުލާފައިވާ ދެ ދައުވާ ކަމަށެވެ.
މަނީ ލޯންޑަރިންނާއި ރިޝްވަތު ގަބޫލުކުރުމުގެ ދައުވާއަށް އެމަނިކުފާނު ޖަވާބުދާރީވުމަށް ބާއްވާ ޝަރީއަތުގެ މަޖިލިސް އަޑުއެހުން ބާއްވާފައިވަނީ މެންދުރު 2:00 ގައެވެ.
ދައުލަތުން މިދައުވާ ރައީސް ޔާމީންގެ މައްޗަށް އުފުލާފައި ވަނީ ރިސޯޓެއްގެ ގޮތުގައި ފުއްގިރި ތަރައްގީކުރަން ކުއްޔަށް ދޫކުރުމުގެ މުއާމަލާތުގައި މަގާމުގެ ނުފޫޒު ބޭނުން ކޮށްގެން 1.1 މިލިއަން ޑޮލަރު ހޯދައި ސަން ކޮންސްޓްރަކްޝަން އެންޑް އިންޖީނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކުރިކަމުގެ ތުހުމަތުގައެވެ.
ރައީސް ޔާމީންގެ އިތުރުން މިދައުވާ އުފުލާފައި ވަނީ އ. ކުރިކީލަހިޔާ، އަހްމަދު ކްރިކް ރިޒާ އާއި ސަން ކޮންސްޓްރަކްޝަނާއި ސަން އިންވެސްޓްމެންޓްގެ މައްޗަށެވެ.
މިމައްސަލައިގައި މިހާތަނަށް ތިން އަޑުއެހުމެއް ބާއްވާފައިވާއިރު، އެންމެ ފަހުން އަޑުއެހުމެއް ބާއްވާފައި ވަނީ މިމަހުގެ 7 ގައެވެ. އެ އަޑުއެހުމުގައި ރައީސް ޔާމީން ވަނީ އެމަނިކުފާނުގެ މައްޗަށް ކުރާ ދައުވާ، ލިޔެކިޔުންތައް ނުލިބޭތީ ސާފު ނުވާ ކަމަށް ތަކުރާރުކޮށް ވިދާޅުވެފައެވެ. ނަމަވެސް ދައުލަތުގެ ވަކީލާ ވިދާޅުވީ އެ މައްސަލައާ ގުޅިގެން ހުރިހާ ލިޔެކިޔުމެއް ވެސް ހަވާލު ކޮށްފައިވާ ކަމަށެވެ.
އެއަޑުއެހުމުގައި ދައުލަތުން ވަނީ ރައީސް ޔާމީންގެ މިލްކިއްޔާތުގައި ހުރި އާމްދަނީ އާއި ނުބައްދަލު މުދާ ދައުލަތަށް ނެގުމުގެ އަމުރަކަށް ވެސް އެދިފައެވެ.
Ads by STO
