އޭ ލެވެލް އިމްތިޙާން އޮންނާނީ މިއަހަރު އޮކްޓޯބަރ މަހު
މެއި/ޖޫންގައި އޭ ލެެވެލް އިމްތިޙާން ނުބާއްވާނެ ކަމަށާއި އެންމެ އަވަހަށް އޭ ލެވެލް އިމްތިޙާނެއް ބާއްވާނީ އޮކްޓޯބަރ މަހުގެ ތެރޭގައި ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.
އެޑިއުކޭޝަން މިނިސްޓްރީން ނެރެފައިވާ ބަޔާނެއްގައި ބުނެފައިވަނީ، މެއި/ޖޫން މަހު އޭ ލެވެލް އިމްތިޙާން ނުބާއްވަން ނިންމާފައިވާ ކަމަށާއި މިއަހަރުގެ މެއި/ޖޫން މަހު އޭ ލެވެލް އިމްތިޙާނުގައި ބައިވެރިވާ ދަރިވަރުންގެ ފެންވަރު ވަޒަން ކުރުމާއި ސެޓްފިކެޓް ދިނުން ކުރިޔަށް ދާނެ ގޮތެއް، ފެބްރުއަރީ މަހު 22 ގައި އިޢުލާން ކުރާނެ ކަމަށެވެ.
އަދި މިއަހަރު އޮކްޓޯބަރު/ނޮވެންބަރު މަހަށް ތާވަލްކޮށްފައިވާ އިމްތިޙާން ތާވަލާ އެއްގޮތަށް ކުރިޔަށް ދާނެ ކަމަށް އެފަރާތުން ހާމަކުރެއެވެ.
މިނިންމުމާ ގުޅިގެން ޑިޕާޓްމަންޓް އޮފް ޕަބްލިކް އެގްޒޭމިނޭޝަންސް އިން ކުރިއަށް ގެންދާ އޭއެސް/އޭ ލެވެލް ގެ އެޕްލިކޭޝަން މަރުހަލާ އަށް އެއްވެސް ބަދަލެއް ނާންނާނެ ކަމަށް ވެސް އެޑިއުކޭޝަން މިނިސްޓްރީން ބުނެފައިވެއެވެ.
އެމިނިސްޓްރީން އިތުރަށް ބުނެފައިވަނީ އޭއެސް/އޭ ލެވެލް އިމްތިހާނުތަކަށް ދަރިވަރުން ތައްޔާރުވަމުން ދިޔަ ގޮތަށް އެއްވެސް ބަދަލެއް ނުގެނެސް ކުރިއަށް ގެންދިޔުމަށް ސްކޫލް ތަކަށާއި އަމިއްލަ ގޮތުން ބައިވެރިވާ ދަރިވަރުންނަށް އަންގާ ކަމަށެވެ.
