ޤައުމީ އެއްވެސް ރުކުނަކަށް އުނިކަމެއް އަންނާނެ ކަމެއް ނުކުރައްވާނެ ކަމުގެ ޔަޤީންކަން ރައީސް ދެއްވައިފި
ރާއްޖޭގެ އިސްލާމްވަންތަކަމާއި މިނިވަންކަމަށް އުނިކަމެއް އަންނާނެ އެއްވެސް ކަމެއް ނުކުރައްވާނެ ކަމުގެ ޔަގީންކަން ނަސްރުގެ ދުވަހުގެ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު…

ރާއްޖޭގެ ސައްތައިން ސައްތަ އިސްލާމްވަންތަކަމާއި، ދިވެހީންގެ މިނިވަންކަމާއި އަމިއްލަވަންތަކަމަށް އުނިކަމެއް އަންނާނެ އެއްވެސް ކަމެއް ނުކުރައްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭ ދެއްވައިފިއެވެ.
ނަސްރުގެ ދުވަހުގެ މުނާސަބަތުގައި ޖުމްހޫރީ މައިދާނުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ވެރިކަމާ ހަވާލުވެވަޑައިގަތުމަށް ފަހު އެ މައިދާނުގައި ދެއްކެވި ވާހަކަފުޅުތައް ފުރިހަމައަށް ހަނދާނުގައި އެބަހުރި ކަމަށެވެ. އަދި ޤައުމީ އެއްވެސް ރުކުނަކަށް ދެރައެއް ލިބޭނެ ކަމެއް ނުކުރައްވާނެ ކަމަށް ވިދާޅުވިއެވެ.
"އަޅުގަނޑު ތިޔަ ބޭފުޅުންނަށް އަރުވާ ފުރިހަމަ ޔަޤީން ކަމަކީ ދިވެހިރާއްޖޭގެ ސައްތައިން ސައްތަ އިސްލާންވަންތަކަން، ދިވެހީންގެ ފުރިހަމަ މިނިވަންކަން، ދިވެހީންގެ އަމިއްލަވަންތަކަން ފަދަ ޤައުމީ އެއްވެސް ރުކުނަކަށް ކުޑަވެސް އުނިކަމެއް އަންނާނެ ގޮތަކަށް އަޅުގަނޑު އެއްވެސް ކަމެއް ނުކުރާނަން،" ރައީސް ވިދާޅުވިއެވެ.
ތަރައްޤީއަކީ ކޮންމެ ދިވެއްސެއްގެ ޙައްޤެއްކަން ފާހަގަކުރައްވައި ރައީސް ވިދާޅުވީ، އެމަނިކުފާނު ނިންމަވާ ކޮންމެ ނިންމުމެއްގެ ބޭނުމަކީ ޤައުމީ ބަހާތަކަށް ދިރުންދީ، ރައްކާތެރިކަން ކަށަވަރުކޮށްދިނުން ކަމަށެވެ. އަދި އެއީ ކޮންމެ ދިވެއްސެއްގެ އުންމީދު ކަމުގައި ވެސް ވިދާޅުވިއެވެ.
މީގެ އިތުރުން ރައީސް ވިދާޅުވީ، ހަތިޔާރުގެ އަޅުވެތިކަމުން ޤައުމު ސަލާމަތްކުރި ފަދައިން، މިއަދު ދަރަނީގެ އަޅުވެތިކަމުން ވެސް ޤައުމު މިނިވަންކުރަން ޖެހޭ ކަމަށެވެ. އަދި އަމިއްލަ ދީނާއި ގޮތްތައް ރައްކާތެރިކުރެވެނީ އެހެން ބައެއްގެ ގާތުގައި ސަލާންޖަހަން ނުޖެހޭ ފަދަ އިޤުތިޞާދެއް އޮވެގެން ކަމަށް ވެސް އެމަނިކުފާނު ވިދާޅުވިއެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.