ފަތުރުވެރިކަމުގެ ދާއިރާގެ މުވައްޒަފުންނަށް ވެކްސިން ދޭން ފަށައިފި
ފަތުރުވެރިކަމުގެ ދާއިރާގެ މުވައްޒަފުންނަށް ކޮވިޑު ވެކްސިން ދޭން ފަށައިފިއެވެ.
ފަތުރުވެރިކަމުގެ ދާއިރާގެ މުވައްޒަފުންނަށް ކޮވިޑު ވެކްސިން ދޭން ފެށުމަށް ސޯޝަލް ސެންޓަރުގައި މިއަދު ވަނީ ޚާއްސަ ހަފްލާއެއް ބާއްވާފައެވެ. މި ހަފްލާގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ ބައިވެރިވެ ވަޑައިގެންފައެވެ
މިއަދު ބޭއްވި ހަފުލާގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ، މިއަދު މާލެއިން 25 މުވައްޒަފަކަށް އަދި ހުޅުމާލެއިން 100 މުވައްޒަފަކަށް ވެކްސިން ދޭނެ ކަމަށެވެ. އަދި ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުންނަށް ބޭނުންވާ ސަލާމަތާއި ރައްކާތެރިކަން ފޯރުކޮށްދިނުމަކީ ވަރަށް ބޮޑު ޒިންމާއެއް ކަމަށް މިނިސްޓަރ ފާހަގަ ކުރެއްވިއެވެ.
ރާއްޖޭގެ އިގްތިސާދު ބިނާކުރުމުގައި އެންމެ އިސް ރޯލެއް އަދާކުރާ ބަޔަކީ ފަތުރުވެރިންގެ ސިނާއަތުގައި މަސައްކަތްކުރާ މުވައްޒަފުން ކަމަށް ފާހަގަކުރަމުން މިނިސްޓަރ ވިދާޅުވީ ރާއްޖޭގައި މިހާރު ކުރިއަށްދާ ވެކްސިން ޖެހުމުގެ ފުރަތަމަ ބުރުގައި ފަތުރުވެރިކަމުގެ ސިނާއަތުގައި މަސައްކަތްކުރާ 10،000 މުވައްޒަފަކަށް ވެކްސިން ދޭނެ ކަމަށެވެ.
އަދި ކުރިއަށް އޮތްތަނުގައި ބޮޑެތި ރިސޯޓުތަކަށް މެޑިކަލް ޓީމުތައް ގޮސް ވެކްސިން ދިނުމުގެ ކަންކަން ކުރިއަށް ގެންދެވޭނެ ކަމަށް ވިދާޅުވި އެވެ. ހަމައެހެންމެ ފަތުރުވެރިންނާ ކައިރިން ފްރަންޓްލައިންގައި މަސައްކަތްކުރާ މުވައްޒަފުންނަށް އިސްކަންދީގެން ވެކްސިން ދިނުމުގެ ކަންތައްތައް ކުރިޔަށް ގެންދާނެ ކަމަށް ވެސް މިނިސްޓަރ ވިދާޅުވިއެވެ.
Ads by STO
