އެމްޑީޕީގެ ފިކުރަކީ އިސްރާއީލުގެ އެހީއާ އެކު އުފެދުނު ފިކުރެއް: ޝުޖާއު
އެމްޑީޕީގެ ފިކުރު އުފެދިގެން އައީ އިސްރާއީލުގެ އެހީތެރިކަމާއެކު ކަމަށާއި، އެ ޕާޓީގެ ކިބައިގައި ހުންނަނީ ޔަހޫދީންގެ ފިކުރު ކަމަށް ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ފިކުރު އުފެދިގެން އައީ އިސްރާއީލުގެ އެހީތެރިކަމާ އެކު ކަމަށް ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިމިގްރޭޝަންގެ އައު ބިލަށް ބަހުސްކުރައްވަމުން ޝުޖާއު ވިދާޅުވީ، އިސްރާއީލުގެ ޕާސްޕޯޓު މަނާކުރުމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް މީގެ ކުރިން ހުށަހެޅުއްވި އިސްލާހަކީ ސިޔާސީ މަގުސަދެއް އޮވެގެން ހުށަހެޅި އެއްޗެއް ކަމަށެވެ. އަދި އެމްޑީޕީގެ އިހުލާސްތެރިކަމެއް ހުރި ނަމަ، އެހެން ގައުމުތަކުގެ ޕާސްޕޯޓު ބޭނުންކޮށްގެން ރާއްޖެ އެތެރެވާ އިސްރާއީލު މީހުން ވެސް ހުއްޓުވޭނެ ގޮތަށް އެ ބިލު ފަރުމާކުރީސް ކަމަށް އޭނާ ފާހަގަކުރެއްވިއެވެ.
"ހަގީގަތުގައި އެމްޑީޕީގެ ފިކުރު އުފެދިގެން އައީ އިސްރާއީލު މީހުންގެ އެހީތެރިކަމާ އެކު. އެހެންވީމަ އަބަދުވެސް ކަންކަމުގައި މިއޮންނަނީ މަކަރުވެރި ހީލަތްތެރި ވިސްނުން. އެއީ ޔަހޫދީންގެ ފިކުރު މި މީހުންގެ ކިބައިގައި ހުންނަނީ،" މަޖިލީހުގެ ތަޅުމުގައި ޝުޖާއު ވިދާޅުވިއެވެ.
ޝުޖާއު އިތުރަށް ވިދާޅުވީ، ސަރުކާރުން މިހާރު ހުށަހަޅާފައިވާ އިމިގްރޭޝަން ބިލަކީ ހެޔޮ ނިޔަތުގައި ހުށަހަޅާފައިވާ ފުރިހަމަ ބިލެއް ކަމަށެވެ. އަދި އިމިގްރޭޝަންގެ ހިދުމަތަކީ ވަކި މަދަނީ ހިދުމަތެއްގެ ގޮތުގައި ގާއިމުކުރަން ނިންމީ، ކުރިން އެ ނިޒާމުގެ ތެރެއިން ހިންގަމުންދިޔަ ނޭދެވޭ ކަންކަމަށް ދާއިމީ ހައްލެއް ހޯދުމަށް ކަމަށް އޭނާ ބަޔާންކުރެއްވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި އިރު، ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ އޮތީ ޤައުމީ ސަލާމަތަށް ނުރައްކާވާ ހިސާބުގައި ކަމަށާއި، ނަމަވެސް މި ސަރުކާރުން އެކަން ހައްލުކުރުމަށް ބޮޑެތި ކާމިޔާބީތަކެއް ހޯދާފައިވާ ކަމަށް ވެސް ޝުޖާއު ވިދާޅުވިއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.