އެމްޑީޕީއިން މަސައްކަތް ކުރަނީ އިސްރާއީލު މީހުން ރާއްޖެ އެރެކުރަން: ފަލާޙް
އިދިކޮޅު ފަރާތްތަކުން މަސައްކަތް ކުރަނީ އިސްރާއީލުގެ ރައްޔިތުން ރާއްޖެ އެތެރެވުން މަނާކުރުމުގެ ނިންމުމުގެ ތެރެއިން އެ މީހުންނަށް ވަދެވޭނެ މަގެއް ހޯދައިދޭން ކަމަށް މެންބަރު ފަލާޙް ވިދާޅުވެއްޖެއެވެ.
އިސްރާއީލުގެ ރައްޔިތުން ރާއްޖެ އެތެރެވުން މަނާކުރުމަށް ސަރުކާރުން ނިންމާފައިވާ ނިންމުމުގެ ތެރެއިން، އެ މީހުންނަށް ރާއްޖެއަށް ވަދެވޭނެ މަގެއް ހޯދައިދިނުމަށް އިދިކޮޅު ފަރާތްތަކުން މަސައްކަތް ކުރަމުންދާ ކަމަށް އިނގުރައިދޫ ދާއިރާގެ މެންބަރު އިބްރާހިމް ފަލާޙް ވިދާޅުވެއްޖެއެވެ.
ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ އިމިގްރޭޝަންގެ އައު ބިލަށް ބަހުސްކުރައްވަމުން ފަލާޙް ވިދާޅުވީ، ދުނިޔޭގެ މަސްރަހަށް އަންނަ ބަދަލުތަކާ އެކު އިމިގްރޭޝަން ޤާނޫނު ހަރުދަނާކުރުމަކީ ގައުމީ ފެންވަރުގައި ކުރަންޖެހޭ ކަމެއް ކަމަށެވެ. މިހާރު އޮތް ޤާނޫނަށް އެކި ފަހަރު މަތިން ގެނެސްފައިވާ ބަދަލުތަކުގެ ސަބަބުން އޮޅުންބޮޅުން ބޮޑުވެފައިވާތީ، ޒަމާނީ އައު ޤާނޫނެއްގެ މުހިންމުކަން އޭނާ ފާހަގަކުރެއްވިއެވެ.
ބިލުގެ ބަހުސްގައި އިދިކޮޅު މެންބަރުންގެ ވިސްނުން ހުރި ގޮތަށް ފާޑުވިދާޅުވަމުން ފަލާޙް ތުހުމަތުކުރެއްވީ، އިދިކޮޅު ފަރާތްތަކުގެ މައިގަނޑު އަމާޒަކީ އިސްރާއީލު މީހުންނަށް ރާއްޖެ އެތެރެވުމުގެ ފުރުސަތު ހޯދައިދިނުން ކަމަށެވެ.
"އިދިކޮޅު ފަރާތްތަކުން މި ބިލަށް ބަހުސްކުރެއްވިއިރު އެންމެ ބޮޑަށް ފާހަގަކުރެވުނީ، އިސްރާއީލު މީހުން ރާއްޖެ އެތެރެވުން މަނާކޮށްފައިވާ ކުރުމަށް ލުޔެއްދީ، އެ މީހުންނަށް ވަދެވޭނެ ގޮތެއް ހޯދުމަށް މަސައްކަތް ކުރާ މަންޒަރު،" ފަލާޙް ވިދާޅުވިއެވެ.
ސަރުކާރުގެ ފަރާތުން މަޖިލީހަށް ހުށަހަޅާފައިވާ އިމިގްރޭޝަންގެ އައު ބިލުގެ މަސައްކަތް ކުރިއަށްދާއިރު، އިސްރާއީލު ޕާސްޕޯޓު މަނާކުރުމާ ގުޅޭގޮތުން ސިޔާސީ މަސްރަހުގައި އަންނަނީ ތަފާތު ބަހުސްތަކެއް ކުރެވެމުންނެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.