މާދަމާ އިން ފެށިގެން ރާއްޖޭގެ ހުރިހާ ރަށެއްގައި މާސްކް އެޅުން މަޖުބޫރު، ނާޅާނަމަ 1،000 ރުފިޔާއިން ޖޫރިމަނާ ކުރާނެ

އަތޮޅުތެރޭގެ ރަށްތައް ހިމެނޭހެން ރާއްޖޭގެ ހުރިހާ ރަށެއްގައި މާސްކް އެޅުން މަޖުބޫރު ކުރި ކުރުން މާދަމާއިން ފެށިގެން ތަންފީޒް ކުރަން ފެށޭނެއެވެ.

Ads by Sosun Fihaara

އެޗްޕީއޭއިން މިމަހު 2 ވަނަ ދުވަހު ގަޒެޓް ކުރި އުސޫލުގައިވާ ގޮތުން، 7 ފެބްރުއަރީން ފެށިގެން، ވަކިގޮތެއް އަންގަންދެން، ގެއިން ބޭރުގައި އުޅޭއިރު، އަނގަޔާއި ނޭފަތާއި ދަތްދޮޅި ނިވައިވާ ގޮތަށް މާސްކު އެޅުމަށް ވަނީ އަންގާފައެވެ. އެ އުސޫލުގައިވާ ގޮތުން އަންނަނިވި ހާލަތް ތަކުގައިވާ ފަރާތްތައް، ގެއިން ބޭރުގައި އުޅޭއިރު މާސްކް އެޅުމުން އިސްތިސްނާވާނެއެވެ؛

2 އަހަރުން ދަށުގެ ކުޑަކުދިން.
ކަސްރަތު ކުރަން އުޅޭ މީހުން ކަސްރަތުކުރާ ވަގުތު.
އެހެން މީހެއްގެ އެހީއާ ނުލައި މާސްކު އަޅައި، މާސްކު ނުނެގޭ މީހުން.
.ހޮޓާ،ކެފޭ، ރެސްޓޯރަންޓް، ފަދަ ކާބޯތަކެތީގެ ޚިދުމަތްދޭ ތަންތަނުން ޚިދުމަތް ހޯދާ ފަރާތްތައް، ޚިދުމަތް ހޯދާ ވަގުތު

އެޗްޕީއޭގެ އުސޫލާ ޚިލާފުވާ ފަރާތްތަކަށް އިންޒާރު ދިނުމަކާ ނުލާ، 1،000 ރުފިޔާ އިން ޖޫރިމަނާ ކުރާނެ ކަމަށް ފުލުހުން ވަނީ ބުނެފައެވެ. އަދި ފުލުހުން ހަރަކާތްތެރި ނުވާ ރަށްތަކުގައި އެރަށެއްގައި ޤާއިމް ކޮށްފައިވާ ކޮވިޑް-19 އަށް ޚާއްސަ ޑެސްކް އިން ޖޫރިމަނާ ކުރުމުގެ ކަންތައް ކުރިޔަށް ގެންދާނެ ކަމަށް މީގެ ކުރިން ފުލުހުން ވަނީ ބުނެފައެވެ.

ރާއްޖޭގައި ކޮވިޑް-19 ޖެހޭ މީހުންގެ އަދަދު ކުއްލިއަކަށް ވަނީ ވަރަށް ބޮޑުތަން އިތުރު ވެފައެވެ. އެޗްޕީއޭއިން މީގެ ކުރިން ބުނެފައި ވަނީ ކޮވިޑް-19 ޖެހޭ މީހުން ކުއްލިއަކަށް އިތުރުވެފައި ވަނީ، ކޮވިޑް ގެ އާ ވޭރިއަންޓެއްގެ ސަބަބުންނެވެ. ރާއްޖޭގައި މިހާރު ވެކްސިން ޖަހަން ފަށާފައިވާއިރު، 4،000 އަށް ވުރެ ގިނަ މީހުންނަށް މިހާރު ވެކްސިން ދީފައި ވެއެވެ.