ވާހަކައިގެ މެދުތެރެއިން ވާހަކައިގެ ފެށުން ބަދަލެއް ނުކުރެވޭނެއެވެ. ނަމަވެސް ނިމުން ބަދަލު ކުރެވޭނެކަން ގައިމެވެ.
ބައެއް މީހުން ދިރިއުޅުން ސިފަ ކުރަނީ ވާހަކަ ފޮތެއްގެ މިސާލުންނެވެ. އަހަރެންނަކީ ވެސް އޭގެ ތެރެއިން އެކެކެވެ. އަހަރެންގެ ވާހަކައިގައި ވެސް އެކިކަހަލަ ކަންތައްތައް ވެފައި އެބަހުއްޓެވެ. ވާހަކައިގެ ބައެއް ބާބުތަކުގައި އަހަރެން ހިތްނޭދޭ ފަދަ ކަންތައްތަކާ ވެސް ކުރިމަތިލާން ޖެހިފައި އެބަހުއްޓެވެ. ދެރަވެ ހިތާމަ ކުރަން ޖެހޭ އެތައް ކަންތައްތަކާ ވެސް ދިމާވެފައި އެބަހުއްޓެވެ. ވާހަކައިގެ ކުރިއަށް އޮތް ބަޔައިގެން ކުރިއަށް ނުދެވޭނެ ކަމަށް ހީވި އެތައް ކަމެއް ތަޖުރިބާ ވެސް ކުރެވުނެވެ.
ބައެއް ވާހަކަތަކުގެ ފެށުމުގައި މާތައް ފަރިވެ ފޮޅެއެވެ. ބަހާރު މޫސުމުގައި އުފާވެރިކަމުގައި އެތައް މަޖަލަކާއި ސަކަރާތެއް ޖަހައެވެ. ނަމަވެސް ވާހަކައިގެ މެދަކާއި ހިސާބަށް ދާން ވާއިރަށް އޮންނަނީ، ބަހާރު މޫސުން ނިމި ޚަރީފު މޫސުމާ ކުރިމަތި ލާން ޖެހިފައެވެ. ބަހާރުގައި ފޮޅުނު މާމެލާމެލި މޯޅިވެ ގަސްތަކުން ފަތްފައިބާ ހިސާބަށް ގޮސްފައެވެ. އެހިސާބުން ދިިރިއުޅުމުގައި ކުރިއަށް ދާނެ ގޮތެއް ނޭނގި ދިރިއުޅުމާމެދު އުއްމީދު ކަނޑާލަނީ ވެސް މަދު ބައެއް ނޫނެވެ.
ބައެއް ވާހަކަތަކުގައި އެންމެ ދެރަވެ ހިތާމަކުރަން ޖެހޭ ކަމަކީ ވާހަކަ ފަށާއިރު ވާހަކައިގައި "ލީޑް" ރޯލްގައި އުޅޭ ކޮންމެވެސް މީހަކު ވާހަކައިގެ ވަކި ހިސާބަކުން ވާހަކައިން ބޭރުވުމެވެ. ކޮންމެވެސް ކަހަލަ މައްސަލައެއް ޖެހިގެންނެވެ. ނުވަތަ ކޮންމެވެސް ކަހަލަ ހިތާމަވެރި، ނުރައްކާތެރި ހާދިސާއެއް ހިނގައިގެންނެވެ. އެހިސާބުން އެވާހަކައިގައި އޭނާއެއް ނޫޅޭނެއެވެ. އެހިސާބުން އެމީހަކު އެ ވާހަކައިން އަލްވަދާއު ކިޔާނެއެވެ. ކިތަންމެ ވަރަކަށް ވާހަކައިގެ ތެރެއަށް އޭނާ ގެންނަން ބޭނުން ވިޔަސް، ހަގީގަތަކީ އޭނާ އަނބުރާ ނާންނާނެ ކަމެވެ. އަންނަންޏާ އަންނާނީ ވެސް އޭނާގެ ޚިޔާލުތަކާއި ހަނދާންތައް ކަމެވެ. އެހެންކަމުން ވާހަކަޔައިގެން ކުރިއަށް ދިއުމަށް އޭނާގެ މަތިން ހަނދާން ނައްތާލަން މަޖުބޫރު ވާ ފަހަރުތައް ވެސް މަދެއް ނޫނެވެ.
ވާހަކައިގެ ވަކި ހިސާބަކުން، ގަސްދުގައި ނުވަތަ ގަސްދަކާ ނުލާ ނަމަވެސް ހިތްނޭދޭ ކަންތައްތައް ކުރެވޭ ފަހަރު އާދެއެވެ. ވާހަކައިގެ ކުރިއަށް އޮތް ބާބުތަކުގައި ދެރަވެ ހިތާމަކުރަން ޖެހޭ ކަންކަން ކުރެވޭ ފަހަރު ވެސް އާދެއެވެ. އެކަމެއް ތިމަންނާއަށް ނުކުރެވުނު ނަމައޭ ހިތަށް އަރާ ފަހަރު ވެސް އާދެއެވެ. އެފަދަ ބައެއް ކަންކަމަކީ ވާހަކައިގެ ފެށުމުގައި ވެސް ކުރެވޭ ކަންކަމެވެ. އެހިސާބުން، ދެން ވާ ގޮތަކީ ވާހަކައިގެ ކުރިއަށް އޮތްބަޔަށް ވިސްނުމުގެ ބަދަލުގައި އިސްވެދިޔަ ބާބުތަކާ ދޭތެރޭ ވިސްނެނީއެވެ. އެކަމާ ދެރަވެ ހިތާމަ ކުރެވެނީއެވެ. ކުރެވުނު މޮޔަ ކަންތަކަކާ ހެދި އަމިއްލަ ނަފްސު ދެކެ ރުޅި އަންނަނީއެވެ. ވާހަކައިގެ ކުރިއަށް އޮތްބަޔައިގެން ކުރިއަށް ދާން ފަސް ޖެހެވެނީއެވެ. ވާނެ ގޮތެއް ނޭނގޭތީއެވެ. ކުރިއަށް އޮތް ބާބުތަކަށް ވެސް އުއްމީދެއް ނެތީމައެވެ.
އެކުވެރިޔާއެވެ. އެއްވެސް ވާހަކައެއްގައި މުޅިން އުފާވެރި ވާހަކަތަކެއް ނުހުންނާނެއެވެ. އަދި އެއްވެސް ވާހަކައެއްގައި މުޅިން ހިތާމަވެރި ވާހަކަތަކެއް ވެސް ނުހުންނާނެއެވެ. ވާހަކައެއް ފުރިހަމަ ވާނީ އޭގައި އުފަލާއި ހިތާމަ ހިއްސާވެގެންނެވެ. ކަރުނައާއި ހިނިތުންވުން އެކުވެގެންނެވެ. ނަމަވެސް ވާހަކައިގެ ފެށުން ހިތާމަވެރި ވުމަކީ ތިބާއަށް ވާހަކަޔައިގެން ކުރިއަށް ނުދެވެންވީ ސަބަބެއް ނޫނެވެ. ވާހަކައިގެ މެދަކާ ހިސާބަށް ދިއުމަށްފަހު ވާހަކައިގެ ހިތާމަވެރި ފެށުމަށް ވިސްނާ ފަސް ނުޖެހޭށެވެ. އަދި އެ ހިތާމަވެރި ފެށުމަށް ވިސްނާ ކަރުނަ އަޅާ ނުރޯށެވެ. އެ ފެށުން ތިބާއަށް ބަދަލު ކުރެވޭނެ އެއްވެސް ގޮތެއް ނޯންނާނެއެވެ. އެހެނީ އެ ދުވަސްތައް ތިބާ ފަސްދީ ގޮސްފިއެވެ. ނަމަވެސް ވާހަކައިގެ ނިންމުން ރީތިކޮށް، އުފާވެރި ކުރުމުގެ ފުރިހަމަ ގާބިލިއްޔަތުކަން ތިބާއަށް ލިބިގެން ވެއެވެ. އެެހެންކަމުން، ވާހަކައިގެ ހިތާމަވެރި ފެށުމާ ދޭތެރޭ ނުވިސްނާ ވާހަކައިގެ ނިންމުން އުފާވެރި ކުރަން މަސައްކަތް ކުރާށެވެ.
Ads by STO
