ހިޔާ ފްލެޓް ލިބޭ މީހުންގެ ދާއިމީ ލިސްޓު އިއުލާންކޮށްފި
ރައީސް ޔާމީންގެ ސަރުކާރުގައި ހިންގި ހިޔާ މަޝްރޫއަށް ކުރިމަތިލި ފަންސަވީސް ހާހަށްވުރެ ގިނަ މީހުންގެ ތެރެއިން ފްލެޓް ލިބޭ 6،720 މީހުންގެ ދާއިމީ ލިސްޓު ފްލެޓް ކޮމިޓީއިން މިރޭ ގެޒެޓްގައި އާންމު ކޮށްފިއެވެ.
ހިޔާ މަޝްރޫއުގެ ފްލެޓްތަކުގެ އަދަދަކީ 7،000 ކަމުގައި ކުރީގެ ސަރުކާރުން ކަނޑައަޅާފައި އޮތް ނަމަވެސް ފްލެޓް ތަކުގެ ގްރައުންޑް ފްލޯ، ޓަވަރުތަކުގައި ދިރިއުޅޭ މީހުންގެ އަސާސީ ބޭނުންތަކުގެ ވިޔަފާރިއަށް މި ސަރުކާރުން ހާއްސަ ކުރުމުން އެ އަދަދު ވަނީ 6،720 އަށް ކުޑަވެފައެެވެ.
ފްލެޓް ލިބޭ މީހުންގެ ދާއިމީ ލިސްޓު ގެޒެޓުގައި އާންމު ކޮށްފައިވާއިރު، އެ ލިސްޓުގައި ހިޔާ މަޝްރޫއުގައި ހުޅުވާލި 12 ކެޓަގަރީ އާއި ސިވިލް ސާވިސް މުވައްޒަފުންގެ ތެރެއިން ފްލެޓް ޔަގީންވި މީހުން ވަކިން އެނގޭނެ ގޮތަށް ހިމަނާފައިވެއެވެ.
ފްލެޓް ލިބޭ މީހުންގެ ދާއިމީ ލިސްޓު އާންމު ކުރުމަށްފަހު ފުލެޓް ކޮމިޓީއިން ބުނީ ދާއިމީ ލިސްޓު އިއުލާން ކޮށްފައި ވިޔަސް ފުލެޓް ދިނުމުގެ ކުރިން ހައުސިންގ މިނިސްޓްރީ އިން ބަލާނެ ކަމަށެވެ.
ކުރީގެ ސަރުކާރުން ފްލެޓް ދޫކުރި ގޮތާ ގުޅޭގޮތުން ކުރި ޝަކުވާތައް ބެލުމަށްފަހު ފްލެޓް ކޮމިޓީން ބުނީ އެ ފޯމްތައް އަލުން އިވެލުއޭޓް ކޮށް ޕޮއިންޓް ދީފައިވާ ކަމަށެވެ. އަދި ޕޮއިންޓް ދިނީ ކުރީގެ ސަރުކާރުގައި އިއުލާން ކޮށްފައިވާ ކްރައިޓީރިއާއަށް ކަމަށާއި ބަދަލު އައީ ދިރިއުޅުމުގެ ހާލަތުގެ ބަޔަށް ކަނޑައެޅި 30 ޕޮއިންޓަށް ކަމަށް ވެސް އެ ކޮމިޓީ އިން ބުނެއެވެ.
މި މަޝްރޫއު އަކީ ރާއްޖޭގައި މިހާތަނަށް ހިންގުނު ބޯހިޔާވަހިކަމުގެ އެންމެ ބޮޑު މަޝްރޫއެވެ.
