މީރު މަސް ކާއްޓެއް ނުކެވިގެން މިހާރު މަޑު ކުރާކަށް ނުޖެހޭނެ، ދާންވީ ގާޑިޔާ ކެފޭއަށް!
ހަވީރު ފިންޏަށް ލޯބިވެރިޔާ ގޮވައިގެން ދުއްވާލަން ގޮސް އުޅެފައި، ގާޑިޔަލަކަށް މަޑުކޮށް މަސްކާއްޓެއް ކާ ހަނދާން އައު ކޮށްލަބަލާށެވެ. ލޯބިވާ އާއިލާއާ އެކު ވަގުތު ހޭދަކޮށްލާ މަޖާކޮށްލުމަށް ގާޑިޔަލަކަށް ގޮސް ފޮނިފޮނި މީރު ކުރުނބައެއް ބޯ ހަނދާން އައު ކޮށްލަބަލާށެވެ. ނުވަތަ ރައްޓެހިންނާއެކު މަޖާ މާހައުލެއްގައި މީރު، ކުޅި އަދި އަސަރުގަދަ މަޖާގަނޑެއް ކާން ގޮސް އުޅުނު ހަނދާން ވެސް އައު ކޮށްލަބަލާށެވެ. އެއީ މާލޭގެ އެކި ހިސާބުތަކުގައި ގާޑިޔާތައް ހުންނަ ދުވަސްވަރެވެ. މިއަދު އެ ގާޑިޔާތައް ވުޖޫދަކު ނެތެވެ. އިސްވެ ދެންނެވުނު ހުރިހާ ކަމަކީ ވެސް މީގެ ދެތިން އަހަރެއް ކުރީގެ ހަނދާންތަކެވެ. އެ ހަނދާންތައް މިއަދު މާޒީއާ އެކުވެގެން ހިނގައްޖެއެވެ.
މިއަދު ވެސް ލޯބިވެރިޔާ ގޮވައިގެން ފިނި ބުރެއް ޖަހާލަން ނުކުމެ އުޅުމަށްފަހު މަޖައެއް ކާލަން ނުވަތަ މަސްކާށްޓެއް ކާލަން ދާ ހިތްވާނެ ކަން ޔަގީނެވެ. ނުވަތަ އާއިލާއާއެކު ހިތްފަސޭހަ މާހައުލެއްގައި ކުނރުބައެއް ބޯލަން ބޭނުންވާނެ ކަން ގައިމެވެ. އެ ފުރުސަތު ނުލިބިފައި ގިނަ ދުވަސްތަކެއް ވަންދެން އެތައް ބަޔަކު ތިބެއްޖެއެވެ. އެހެން ނަމަވެސް އެކަމާ މިހާރު ހާސްވާކަށް ނުޖެހޭނެއެވެ. އެކަމުގެ ހައްލު "ގާޑިޔާ ކެފޭ" އިން ހޯދައިދީފިއެވެ. މަޖާ، މަސްކާށި، ކުރުނބާ އަދި މޮޅު ބިލެތް ފަދަ ދިވެހިވަންތަ އެތައް ކެއުމެއް ނަން ހުސްކޮށް ހެޔޮ އަގެއްގައި ގާޑިޔާ ކެފޭއިން ލިބިގެންދާނެއެވެ.
ގާޑިޔާ ކެފޭއާ ބެހޭގޮތުން އިތުރު މައުލޫމާތު ހޯދާލުމަށް، އެ ކެފޭގެ ވެރިޔާ ކަމުގައިވާ، އަބްދުއްނޫރު މުޙައްމަދުއާ "ދެން" އިން ވާހަކަ ދައްކާލީމެވެ.
ދެން އިމޭޖްސް/ ޢާލިމް އަބްދުއްލަތީފް
ގާޑިޔާ ކެފޭ، ކިހިނެއް އައި ޚިޔާލެއް؟
ގާޑިޔާ ކެފޭ އަކީ ވަރަށް ވެސް ތަފާތު ކޮންސެޕްޓަކަށް ތައްޔާރު ކޮށްފައިވާ ކުޑަކުޑަ ވިޔަފާރިއެކެވެ. އެގޮތުން މިފަދަ ތަފާތު ވިސްނުމެއް ގެނެސް ތަފާތު ވިޔަފާރިއެއް ފަށައިގަތުމުގެ ސިއްރަކީ ކޮބައިތޯ ކުރި ސުވާލަށް ޖަވާބު ދެމުން ނޫރު ބުނީި، މިފަދަ ވިސްނުމެއް ގެންގުޅޭތާ، ވާނީ ގާތްގަނޑަކަށް ތިން ވަރަކަށް މަސް ކަމަށެވެ. އަދި މީގެ ކުރިން މުޅި މާލޭގައި ވަށައިގެން ގާޑިޔާތައް ވީނަމަވެސް، ސާފުތާހިރު ނުވުމުގެ ސަބަބުން، ގާޑިޔާތައް ބަންދު ކުރަން ޖެހުނީ ކަމަށާއި، އޭގެ ސަބަބުން އާންމުންނަށް މަސްކާށި ފަދަ ތަކެތި ކެއުމަށް އޮތް މަގު ބަންދުވެގެން ދިޔައީކަމަށެވެ. އެހެންކަމުން ގާޑިޔާ ކެފޭ އަކީ އެފުރުސަތު އާންމުންނަށް އަނެއްކާވެސް ހޯދައިދީ އެ ޚިދުމަތްތައް އެއަށް ވުރެ މާ ސާފުތާހިރުކަންމަތީގައި ދިނުމަށް ފެށި ވިޔަފާރިއެއް ކަމުގައި ނޫރު ފާހަގަކުރިއެވެ.
"ގާޑިޔާ ކެފޭ އަަށް އައިސް ވަރަށް ސާފުތާހިރުކޮށް މީރު ކުރުނބައެއް ބޯލާ، މަސްކާށްޓެއް ކާލާ މުޑި ކާއްޓެއް ކާލުމުގެ ފުރުސަތު ދިނުން މީ އެންމެ ބޮޑު މަޤުސަދަކީ"
ނޫރު
މީގެ އިތުރުން މި ވިޔަފާރިއަކީ މަދު ދުވަސްކޮޅެއްގެ ތެރޭގައި ފަށައިގެން ވިޔަފާރިއެއް ކަން ފާހަގަކޮށް ނޫރު ބުނެފައި ވަނީ، ވިޔަފާރި ފެށުމުގައި އެއްވެސް ކަހަލަ ގޮންޖެހުމަކާ ކުރިމަތިލާން ނުޖެހޭ ކަމަށެވެ.
އާންމުންގެ ޚިޔާލުތައް
މި ވިޔަފާރިއާ ބެހޭގޮތުން އާންމުންގެ ޚިޔާލުތައް ނުވަތަ "ފީޑްބެކް" ލިބެމުން ދަނީ ކިހިނެއްތޯ ކުރި ސުވާލަށް ޖަވާބު ދެމުން ނޫރު ބުނީ އާންމުންގެ ފަރާތުން ލިބެމުންދާ ޚިޔާލުތައް އާދަޔާ ޚިލާފަށް ރަނގަޅު ކަމަށެވެ. އަދި ވިޔަފާރި ފެށިތާ ދެތިން ދުވަހެއް ވެފައި ވަނިކޮށް އާންމުންގެ ފަރާތުން މިކަހަލަ "ފީޑްބެކް" ލިބިގެން ދިއުމަކީ ވިޔަފާރިއަށް ލިބިގެން ދިޔަ ހިތްވަރެއް ކަމަށާއި، ކުރިއަށް އޮތް ތަނުގައި، މިއަށް ވުރެ ވެސް ޚިދުމަތް ރަނގަޅުކޮށް އާންމުންނަށް ތަފާތު އެކި ދިިވެހި ވަންތަ އެއްޗެހި ލިބޭނެ ގޮތް ހަދައިދޭނެ ކަމުގައި ވެސް އޭނާ ބުންޏެވެ.
ނެސްކެފޭ ބްލެކް، އެންމެ 2 ރުފިޔާއަށް!
ގާޑިޔާ ކެފޭގެ ވެރިޔާ އަބްދުއްނޫރު "ދެން" އާ ވާހަކަ ދައްކަމުން ބުނި ގޮތުގައި، މިދުވަސްވަރަކީ ގިނަ ބަޔަކު މާލީ ގޮތުން ގޮންޖެހުނަތަކަކާ ކުރިމަތިލަމުން އަންނަ ދުވަސްވަރެއް ކަމަށާއި، އަމާޒަކީ ވީހާ ވެސް ގިނަ ބަޔަކަށް "އެފޯޑަބްލް" އަގެއްގައި ކެފޭއިން ތަކެތި ލިބިގެންދާނެ މަގު ފަހި ކޮށްދިނުން ކަމުގައެވެ.
"ރައްޔިތުން މިވަގުތު ވަރަށް ބޮޑަށް އިނދަޖެހިފައި ހުރި ވަގުތެއްގަ، އެންމެ އާދައިގެ ނިކަމެތި މީހާ ވެސް އައިސް ދެރުފިޔާ ދީފަ ކޮފީއެއް ބޯލުމުގެ ފުރުސަތު ދިނުން ބޭނުމީ. ރައްޔިތުން ހާލަތަށް ވިސްނާ މިވަގުތު ފައިދާއަށް ވުރެ ބޮޑަށް ރައްޔިތު މީހާއަށް އަގުހެޔޮކޮށް އެއްޗެއް ދިނުމަކީ އެއީ މުހިންމު ކަމެއް ކަމުގައި ދެކެނީ"
ނޫރު
ގާޑިޔާ ކެފޭއިން ނެސްކެފޭ ބްލެކެއް އެންމެ 2 ރުފިޔާއަށް ލިބޭއިރު ނެސްކެފޭ މިލްކު ކޮފީއެއް މި ކެފޭއިން 10 ރުފިޔާއަށް ލިބިގެން ދާނެއެވެ. އަދި ރާއްޖޭގެ ގިނަ ބައެއްގެ މެދުގައި މަގުބޫލުކަން ހޯދައިފައިވާ "ބާ 2000" ކޮފީ ވެސް އެންމެ ހެޔޮއަގެއްގައި ރާއްޖެއިން ލިބޭނީ ގާޑިޔާ ކެފޭއިން ކަމުގައި ނޫރު ފާހަގަ ކުރިއެވެ.
ގާޑިޔާ ކެފޭ ޓިކްޓޮކް ޗެލެންޖު، 3000 ރުފިޔާ ހޯދުމުގެ ފުރުސަތެއް!
"ގާޑިޔާ ކެފޭ ޓިކްޓޮކް ޗެެލެންޖު"އާ ގުޅިގެން މައުލޫމާތު ދެމުން ނޫރު ބުނީ، ޒުވާން ޓިކްޓޮކް ކުޅުންތެރިންނަކީ އައު ކުދިންތަކެއް ކަމަށާއި، އެކުދިންނަށް އިތުރު ހިތްވަރެއް ދިނުމުގެ ގޮތުން ގާޑިޔާ ކެފޭއިން ޓިކްޓޮކް ޗެލެންޖެއް ބާއްވަން ނިންމީ ކަމުގައެވެ. އެގޮތުން ގާޑިޔާ ކެފޭގައި ޓިކްޓޮކް ވީޑިއޯއެއް ތައްޔާރުކޮށް އެންމެ ގިނައިން ވިއުސް އަދި ލައިކް ލިބި، އެންމެ ރަނގަޅު ވީޑިއޯ ހަދާ ފަރާތެއް ހޮވުމަށް ފަހުގައި ގާޑިޔާ ކެފޭއިން ވަނީ 3000 ރުފިޔާގެ ފައިސާގެ އިނާމެއް ދޭން ނިންމާފައެވެ.
މީގެ އިތުރުން އެންމެ މޮޅު ވީޑިއޯ ހޮވުމުގައި ވީޑިއޯގެ އޮށްޓަރާއި، ލައިކްސް އަދި ވައުސް އަށް ބެލޭނެ ކަމަށާއި، ވީޑިއޯ ހޮވުމަށް ޚާއްސަ ޕެނަލެއް ތައްޔާރު ކުރެވިފައިވާނެ ކަމުގައި ވެސް ނޫރު ބުންޏެވެ. އަދި ވީޑިއޯ ނަގަން ބޭނުންވާނަމަ ގުޅާ، ވަކި ވަގުތެއް ހަމަ ޖެއްސުމުން ވީޑިއޯ ޝޫޓު ކުރެވޭނެ އިންތިޒާމް ހަމަޖައްސައިދޭނެ ކަމުގައި ވެސް އޭނާ ފާހަގަ ކުރިއެވެ.
ގާޑިޔާ ކެފޭއަކީ ސާފުތާހިރުކަމަށް ޚާއްސަ ސަމާލުކަމެއް ދީ، އާންމުންނަށް ހެޔޮ އަގެއްގައި ޚިދުމަތްތައް ފޯރުކޯށްދނުމުގެ އުއްމީދުގައި ފެށުނު ތަފާތު ވިޔަފާރިއެކެވެ. މި ވިޔަފާރި ފެށުނުތާ ގާތްގަނޑަކަށް ދެ ދުވަސް ވެފައިވާއިރު، އާންމުންގެ ފަރާތުން އާދަޔާ ޚިލާފަށް ރަނގަޅު "ފީޑްބެކް" އެއް ލިބިގެން ދިއުމަކީ ހަމަ ހަގީގަތުގައި ވެސް އާންމުންގެ ފަރާތުން ލިބެމުންދާ ޝައުގުވެރިކަމުގެ ހެއްކެއް ކަން ޔަގީނެވެ. ނޫރުގެ އުއްމީދަކީ އެތަނަށް ޚިދުމަތް ހޯދަން އަންނަ ފަރާތްތަކަށް ރަނގަޅު ޚިދުމަތެއް ލިބިގެން ދިއުމާއި، ވިޔަފާރި އިތުރަށް ފުޅާ ވެގެން ދިއުމެވެ.
އަބްދުލްނޫރު ވަރެއް ނެތޭ މަންޖެ ހިތަކުން..!
ކޮންތާކު ހުންނަނީ؟