ރާއްޖެއަށް ގެނައީ އެއް ލައްކަ ޑޯޒް ވެކްސިނެއް ނޫން، ވެކްސިން ޖެހުމަށް ބޭނުންކުރާ އެއް ލައްކަ ސިރިންޖު: އެޗްޕީއޭ
ރާއްޖެއަށް މިއަދު ގެނައީ އެއް ލައްކަ ޑޯޒްގެ ވެކްސިން ނޫން ކަމަށާއި، މިއަދު ރާއްޖެއަށް ގެނައީ ވެކްސިން ޖެހުމަށް ބޭނުން ކުރާ އެއް ލައްކަ ސިރިންޖު ކަމަށް ހެލްތު ޕްރޮޓެކްޝަން އޭޖަންސީ (އެޗްޕީއޭ) އިން ވިދާޅުވެއްޖެއެވެ.
އެޗްޕީއޭ އިން މިހެން ވިދާޅުވީި، ފާއިޒާ ވެކްސިންގެ އެއް ލައްކަ ޑޯޒް މިއަދު ރާއްޖެއަށް ލިބޭނެ ކަމަށް އޮންލައިން ނޫހަކުން ބުނެ ދޮގު ޚަބަރުތަކެއް ފަތުރަމުން ދިއުމާ ގުޅިގެންނެވެ. އެގޮތުން އެ ނޫހުން މިއަދު މެންދުރު ނެރުނު ޚަބަރެއްގައި ބުނެފައި ވަނީ، ފާއިޒާގެ ވެކްސިންގެ އެއްލައްކަ ޑޯޒް ވެކްސިން މިއަދު ރާއްޖެ ގެންނާނެ ކަމުގެ މައުލޫމާތު އެ ނޫހަށް ލިިބިފައިވާ ކަމަށެވެ.
މީގެ އިތުރުން މި ވެކްސިން ރާއްޖެއަށް ލިބިގެން ދަނީ ދުނިޔޭގެ ސިއްހަތު ޖަމިއްޔާ (ޑަބްލިވްއެޗްއޯ)ގެ ހުރިހާ ގައުމުތަަކަށް ހަމަހަމަކަމާއެކު ކޮވިޑް ވެކްސިން ފޯރު ކޮށްދިނުމަށް އެކުލަވާލާފައިވާ ކޮވެކްސް ފެސިލިޓީގެ ދަށުން ކަމަށް ވެސް އެ ނޫހުން ގެނައި ޚަބަރުގައި ބުނެފައި ވެއެވެ.
މިކަމާ ގުޅިގެން އެޗްއީއޯސީގެ އޮފިޝަލަކު ވިދާޅުވީ، މިއަދު ރާއްޖެއަށް އެއްވެސް ވެކްސިންއެއް ނުލިބޭ ކަމަށެވެ. އަދި މިއަދު ލިބުނީ ވެކްސިން ޖެހުމަށް ބޭނުން ކުރާ 100،000 ސިރިންޖް ކަމަށާއި މި ސިރިންޖުތައް ލިބުނީ ކޮވިޑް ވެކްސިން ފޯރު ކޮށްދިނުމަށް އެކުލަވާލާފައިވާ ކޮވެކްސް ފެސިލިޓީގެ ދަށުން ކަމަށް އެ އޮފިޝަލް ވިދާޅުވިއެވެ.
