ޖިންސީ ގޯނާގެ މައްސަލަތަކުގައި ފުލުހުން ޒިންމާ އަދާނުކުރާ ކަމަށް ބުނާތީ ފުލުހުން ކަންބޮޑުވުން ފާޅުކޮށްފި
އަންހެނުންނާއި ކުޑަކުދިންނަށް ކުރާ ޖިންސީ ގޯނާގެ މައްސަލަތަކުގައި ފުލުހުން ޒިންމާ އަދާނުކުރާ ކަމަށް ބުނާތީ ފުލުހުން ކަންބޮޑުވުން ފާޅުކޮށްފިއެވެ. ފުލުހުން ވަނީ މި ފަދަ މައްސަލަތަކުގައި ހިޔާލު ފާޅުކުރުމުގައި އިތުރަށް ޒިންމާދާރުވުމަށް ވެސް އެދިފައެވެ.
މިކަމާއި ގުޅިގެން ފުލުހުން މިއަދު ނެރުނު ބަޔާނެއްގައި ބުނެފައިވަނީ އަންހެނުންނަށާއި ކުޑަކުދިންނަށް ކުރާ ޖިންސީ އަނިޔާގެ މައްސަލަތަކަކީ ފުލުހުން އަބަދުވެސް ވަރަސް ސީރިއަސް މައްސަލައެއްގެ ގޮތުގައި ބަލާ ތަހުގީގު ކުރަމުންދާ މައްސަލަތަކެއް ކަމަށާއި މިފަދަ ކުށްތަކާމެދު ހޭލުންތެރިކަން އިތުރު ކޮށް، އަންހެނުންނާއި ކުޑަކުދިން ރައްކާތެރިކުރުމަށް ވަރަށް ބޮޑު އިސްކަމެއް ދޭކަމަށާއި އަދި ގިނަގުނަ މަސައްކަތްތަކެއް ކުރެވެމުން އަންނަ ކަމަށެވެ.
"އެގޮތުން، ކުޑަކުދިންނާއި އަންހެނުންނާ ދެކޮޅަށް ކުރާ ކުށްތަކުގެ މައްސަލަތައް ތަހުގީގުކުރުމަށް ވަކިބަޔަކު ކަނޑައެޅި އެބާވަތްތަކުގެ މައްސަލަތައް ތަހުގީގުކުރުމަށް ބޭނުންވާ ހާއްސަ ހުނަރުތައް ދަސްކޮށްދީ، އެހުނަރުތައް ޒަމާނާއި ކުށާއި ކުށްކުރުމުގެ ވައްޓަފާޅިއަށް އަންނަ ބަދަލުތަކާ އެއްގޮތަށް ތަރައްގީކުރުމާއި، އެފަދަ ތަހުގީގުތައް ހިންގުމުގެ ނިޒާމު ބޭނުންވާ ވަސީލަތްތައް އިތުރުކުރުމަކީ އަބަދުވެސް ސަމާލުކަންދޭ، އަދި މިހާރު އަމަލުކުރެވެމުންދާ ސްޓްރެޓީޖިކް ޕްލޭންގައިވެސް އިތުރު އިސްކަމެއް ދީފައިވާ ކަންކަމެވެ." ބަޔާނުގައިވެ އެވެ.
އަދި ކުޑަކުދިންނާއި އަންހެނުން ރައްކާތެރިކޮށް އެ ކުށާއި ކުށުގެ ބިރުވެރިކަން ކުޑަ ކުރުމަށްޓަކައި އިތުރަށް ކުރަން ޖެހޭ ކަންކަން ހުރިކަން ފާހަގަކޮށް، އެ ކަންކަން ހައްލުކުރުމަށް ގުޅިގެން މަސައްކަތް ކުރަން ޖެހޭ ކަމަށް ވެސް ފުލުހުންގެ ބަޔާނުގައި ފާހަގަކޮށްފައިވެއެވެ.
ހަމައެހެންމެ މި މައްސަލައާ ގުޅިގެން މަދަނީ ޖަމިއްޔާ ތަކުން އަޑު އުފުލައި ހައްގުތައް ހޯދައި ދިނުމަށް ކުރަމުން އަންނަ މަސައްކަތަށް ވެސް ފުލުހުން ތަރުހީބުދީފައިވެއެވެ.
ނަމަވެސް ހިޔާލު ފާޅުކުރުމުގައި އިތުރަށް ޒިންމާދާރުވުމަށް ފުލުހުން ވަނީ އެދިފައެވެ. އަދި މި މައްސަލަތަކުގައި ފުލުހުން ގެ ޒިންމާ އަދާނުކުރާ ކަމަށް ބުނާތީ ވަނީ ކަންބޮޑުވުން ވެސް ފާޅުކޮށްފައެވެ.
ފުލުހުން ބުނީ ޒިންމާދާރު ގޮތަކީ ކޮންމެކަމެއްގައިވެސް އެކަމެއްގެ ފުރިހަމަ މައުލޫމާތު އެކަމަކާ ގުޅޭ ފަރާތްތަކުން ސާފުކުރެއްވުމަށް ފަހުގައި ނޫނީ އެކަމަކާ ގުޅޭގޮތުން ވާހަކަ ނުދެއްކެން ކަމަށެވެ. އަދި ކުޑަކުދިންނާއި އަންހެނުންނަށް ޖިންސީ ގޯނާކުރުމާއި ޖިންސީ ފުރައްސާރަކުރުންފަދަ މުޖުތަމައުގެ ކަންބޮޑުވުން ވަރަށް މަތީ ދަރަޖައަކަށް އޮތް، މިފަދަ ހައްސާސީ ކަންކަމުގައި، ވަކިން ހާއްސަކޮށް، ކަމުގެ ހަގީގަތް ނުއޮޅޭނޭގޮތަށް ވާހަކަދެއްކެވުމަށް އެންމެހާ ފަރާތްތަކަށް އިލްތިމާސްކުރާ ކަމަށެވެ.
ކުޑަކުދިންނާއި އަންހެނުންގެ ހައްގުތައް ރައްކާތެރިކޮށް، ޖިންސީ ގޯނާކުރުމާއި ޖިންސީ ފުރައްސާރައާ ދެކޮޅަށް މަސައްކަތްކުރުމުގައި މަތިކުރެވިފައިވާ ގާނޫނީ ޒިންމާތައް އަދާކުރުމުގައި އެއްވެސް ފަސްޖެހުމެއްނެތި، އިސް ސަފުގައި މަސައްކަތްކުރަމުން ގެންދާނޭކަމުގެ ޔަގީންކަން ވެސް ފުލުހުންގެ ބަޔާނުގައި ވަނީ ދީފައެވެ.
