އިދިކޮޅު މުޒާހަރާ: 17 މީހަކު ފުލުހުންގެ ބެލުމުގެ ދަށަށް ގެންގޮސްފި
އިދިކޮޅު ޕީޕީއެމް/ޕީއެންސީ އިން އިސްނަގައިގެން މާލޭގައި މިއަދު ކުރިއަށް ގެންދާ މުޒާހަރާގެ ތެރެއިން މިހާތަނަށް 17 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ބުނެފިއެވެ.
އިދިކޮޅު ޕްރޮގްރެސިވް ކޯލިޝަނުން މުޒާހަރާ ކުރަމުންދަނީ ކޮވިޑް-19 އާއި ގުޅިގެން އެއްވެ އުޅުން މަނާ ކޮށްފައިވާ ދަނޑިވަޅެއްގައެވެ.
މިއަދުގެ މުޒާހަރާ ފަށާފައި ވަނީ ޕީޕީއެމް އޮފީސް ކުރިމަތީގައެވެ. ނަމަވެސް މުޒާހަރާ ފެށެން އިއުލާނު ކުރި ގަޑީގެ މާކުރިން ފުލުހުން އެސަރަޙައްދު ބަންދުކޮށްފައިވާ ކަމަށް މައުލޫމާތު ލިބެއެވެ.
ޕީޕީއެމް/ޕީއެންސީ ގެ ފަރާތުން މިއަދު މުޒާހަރާއެއް ކުރުމަށް ނިންމާފައިވާކަން މީގެ ތިން ދުވަސް ކުރިން އިދިކޮޅު ހަރަކާތްތަކުގައި އިސްކޮށް ހުންނެވި ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއީލް ވަނީ އިއުލާނު ކުރައްވާފައެވެ. އެގޮތުން އޭނާ ވިދާޅުވީ މިއަދުގެ މުޒާހަރާ ވެގެންދާނީ މިދިޔަ ހުކުރު ދުވަހު ބޭއްވި އިހުތިޖާޖަށްވުރެ ވެސް ވަރުގަދަ އިހުތިޖާޖަކަށް ކަމަށެވެ.
މިއަދުގެ އިހުތިޖާޖަކީ ޤާނޫނީ އިމުގެ ތެރެއިން ކުރިއަށްދާނެ އިހުތިޖާޖެއް ކަމަށާއި ކުއްލި ހާލަތުގައި ވެސް ނުހިފެއްޓޭނެ ހައްގުތަކެއްވާކަން ސަރުކާރުން ވެސް ގަބޫލު ކުރަން ޖެހޭ ކަމަށް އޭރު މުޙައްމަދު އިސްމާއިލް ވިދާޅުވިއެވެ.
