ދުންޔާގެ ތާއީދު މުޢިއްޒަށް
ކުރިއަށް އޮތް ލޯކަލް ކައުންސިލް އިންތިޚާބުގައި މާލޭ މޭޔަރު ކަމަށް ވާދަ ކުރައްވާ ކުރީގެ ހައުސިން މިނިސްޓަރ ޑރ.މުޙައްމަދު މުޢިއްޒަށް ތާއީދު ކުރައްވާ ކަމަށް އެމަނިކުފާނާއެކު ރައީސް ޔާމީންގެ ކެބިނެޓްގައި ހިމެނިވަޑައިގެންނެވި ކުރީގެ ފޮރިން މިނިސްޓަރ ދުންޔާ މައުމޫން ހާމަ ކުރައްވައިފިއެވެ.
ދުންޔާ މިއަދު ކުރެއްވި ޓްވީޓެއްގައި ވިދާޅުވީ ޑރ.މުޢިއްޒަކީ ސަރުކާރުގެ ޕަޕެޓްކަށް ނުވާނެ ކަމުގެ ޔަގީންކަން އެބައޮތް ކަމަށާއި އެމަނިކުފާނަކީ ބޯހިޔާވަހި ކަމުގެ ޙައްޤު ހޯދައި ދިނުމަށް މަސައްކަތް ކުރާނެ ޤާބިލް ޚާދިމެއް ކަމަށެވެ.
"މާލޭގެ މޭޔަރ ކަމަށް ކުރިމަތި ލައްވާފައިވާ ފަރާތްތަކުގެ ތެރެއަން، ޑރ. މުއިއްޒަކީ، މާލޭގެ ރައްޔިތުންގެ ކަނބޮޑުވުންތަކާއި އިހުސާސްތައް އަޑުއަހައި، ސަރުކާރުގެ ޕަޕެޓަކަށް ނުވާނެ ކަމުގެ ޔަޤީންކަން އޮތް، ބޯހިޔާވަހިކަމުގެ ހައްޤު ހޯދައިދިނުމަށް މަސައްކަތް ކުރާނެ ޤާބިލް ހާދިމެކެވެ." ދުންޔާ ވިދާޅުވެފައި ވެއެވެ.
ޕީޕީއެމްގެ ނައިބު ރައީސްކަން ވެސް ކުރައްވާ މުޢިއްޒުގެ ވަޢުދުތަކުގެ ތެރޭގައި ހިމެނެނީ ހިތްފަސޭހަ މަގުމައްޗާއި ފުދުންތެރި ދިރިއުޅުމުގެ އިތުރުން ޗާލު މާލެ ސިޓީއާއި ބިންވެރި ރައްޔިތެއްގެ ވައުދެވެ. މި ވައުދުތަކުގެ ދަށުން މާލޭގައި ހަދާފައިވާ ހިތްފަސޭހަ މައިޒާން ތަކާއި ޕާކްތައް ވީރާނާވާން ދޫކޮށް ނުލުމާއި ، ހިތް ފަސޭހަ ގޯޅިތައް ހެދުމާއި ،ގުޅީފަޅަކީ މާލޭ ރައްޔިތުންގެ ބޯހިޔާވަހި ކަމަށް ޚާއްޞަ ރަށަކަށް ހެދުމަށް މުޢިއްޒު ދަނީ ގޮވާލައްވަމުންނެވެ.
މީގެ އިތުރުން ޕާކިން ފީގެ ގޮތުގައި ނަންގަވާ 3000 ރުފިޔާގެ ބޮޑުފީ ކުޑަ ކުރުމަށާއި މަސައްކަތަށް މަގުތައް ބަންދުކުރާއިރު އެކަމަށް އެންމެ އެކަށީގެންވާ ވަގުތުތަކުގައި އެކަން ކުރުމަށް ވެސް މުއިއްޒު ދަނީ އަޑު އުފުލަމުންނެވެ. މުއިއްޒު ވިދާޅުވާ ގޮތުގައި އެމަނިކުފާނު މަގާމަށް އިންތިޚާބު ވެއްޖެނަމަ މިދެންނެވި ކަންކަން ބަދަލު ކުރައްވާނެއެވެ. އެގޮތުން ޕާކިން ސްލޮޓްތަކުގެ ފީއަކީ 1000 އާއި 650 އާ ދެމެދުގެ އަގަކަށް ހައްދަވާނެ ކަމަށް އެމަނިކުފާނު ވައުދުވެ ވަޑައިގެންފައި ވެއެވެ.
