ވަކި ޕާޓީއެއް އަަޅުގަނޑަކަށް މުހިންމެއް ނޫން، އަޅުގަނޑުގެ ހިތުގައި އޮތީ އައްޑޫސިޓީ: މުޙައްމަދު ލަތީފް
ލޯކަލް ކައުންސިލު އިންތިހާބު ކައިރިވެފައިވާއިރު، އައްޑޫ ރައްޔިތުން ތިބީ ވަރަށް ބޮޑަށް ނިކަމެތިވެފައި ކަމަށް އިދިކޮޅު ޕްރޮގްރެސިވް ކޯލިޝަންގެ ފަރާތުން ވާދަކުރާ އައްޑޫސިޓީ މޭޔަރ ކެންޑިޑޭޓް މުޙައްމަދު ލަތީފު ވިދާޅުވެއްޖެއެވެ.
"މިއީ މަގޭ ރާއްޖެ" ނަމުގައި މިރޭ އިފްތިތާޙްކުރި ކައުންސިލް ކެމްޕޭނު ޖަލްސާގައި ވާހަކަ ދައްކަވަމުން މުޙައްމަދު ލަތީފު ވިދާޅުވީ އައްޑޫގެ ގިނަ ރައްޔިތުންގެ ވަޒީފާ ވަނީ ގެއްލިފައި ކަމަށާއި، ރިސޯޓުތައް ވެސް ބަންދުވެފައިވާ ކަމަށެވެ. އަދި އާމްދަނީ ހޯދޭނެ ހުރިހާ ވަސީލަތްތަކެއް ވަނީ ނެތިގެން ގޮސްފައި ކަމަށް ވެސް މުޙައްމަދު ލަތީފު ވިދާޅުވިއެވެ.
"ތަރައްޤީގެ ގިނަ މަޝްރޫޢުތައް ވަނީ ހުއްޓިފައި. ރައްޔިތުން ވަނީ މާޔޫސްވެފަ. ހިޔާވަހިކަމަށް އައްޑޫ ރައްޔިތުން ވަނީ އިންތިހާއަށް ބޭނުންވެފަ. މާލީ ފުދުންތެރިކަން ހޯދޭނެ މަގުތައް އައްޑޫ ރައްޔިތުން އެބަ ބޭނުންވޭ. ވަކި ޕާޓީއެއް ވަކި ކުލައެއް އަަޅުގަނޑަކަށް މުހިންމެއް ނޫން. އަޅުގަނޑުގެ ހިތުގައި އޮތީ އައްޑޫސިޓީ،" މުޙައްމަދު ލަތީފު ވިދާޅުވިއެވެ.
މީގެއިތުރުން މުޙައްމަދު ލަތީފް ވިދާޅުވީ އައްޑޫސިޓީގެ މޭޔަރުގެ ގޮތުގައި ފަސް އަހަރު ދުވަސް ހޭދަ ކުރާއިރު، ބޮޑެތި އަމާޒުތަކެއް އެމަނިކުފާނުގެ އެބަހުރި ކަމަށެވެ.
"ކީރިތި ﷲ ގެ ޙަޟްރަތުން ވާގި އެދި ހުރެ، ރައްޔިތުން މިއަދު މިހުރި ނިކަމެތި ހާލުން މިންޖުވާން އަަޅުގަނޑުމެން ކުރަންޖެހޭ މަސައްކަތް އަޅުގަނޑުމެން ކުރާނަން. ބަންދު ކޮށްފައިހުރި ރިސޯޓުތައް އަލުން އަޅުގަނޑުމެން ހުޅުވާނަން. ހުއްޓިފައިހުރި މަސައްކަތްތަށް އަލުން އަޅުގަނޑުމެން ފައްޓާނަން. ފައިސާ ލިބޭނެ މަގުތައް އަޅުގަނޑުމެން އައްޑޫ ރައްޔިތުންނަށް ތަނަވަސް ކޮށްދޭނަން. ވަޒީފާ ގެއްލިފައިތިބި އައްޑޫގެ ދަރިންނަށް ވަޒީފާ އަނބުރާ ހޯދައިދޭނަން. ހިޔާވަހިކަމަށް ބޭނުންވެފައިތިބި ރައްޔިތުންނަށް ގެދޮރު ހޯދައިދޭނަން." މުޙައްމަދު ލަތީފުގެ ވަޢުދުތައް ކިޔައިދެއްވަމުން ވިދާޅުވިއެވެ.
މުޙައްމަދު ލަތީފު އިތުރަށް ވިދާޅުވީ މީގެ ބައި ގަރުނު ކުރިން ރާއްޖޭގެ ވިޔަފާރީގެ މައިމަރުކަޒަކީ އައްޑޫސިޓީ ކަމަށެވެ. އެދުވަސް އައްޑޫގެ ރައްޔިތުން އަތުގުޅާލައިގެން އަލުން ޢިޔާދަ ކުރަން ޖެހޭ ކަމަށް މުޙައްމަދު ލަތީފު ވަނީ ވިދާޅުވެފައެވެ.
