މުނީބާ މަޒާރީ: ނުރައްކާތެރި އެކްސިޑެންޓަކަށްފަހު ހިނގުމުން މަޙްރޫމްވި ނަމަވެސް، ނުހަނު ހިތްވަރުގަދަ ކަނބަލެއް!
ޕާކިސްތާނަށް އުފަން މުނީބާ މަޒާރީ އަކީ އެތައް ހުނަރެއް ލިބިފައިވާ ފަންނާނެކެވެ. އާޓިސްޓެއްގެ އިތުރުން އޭނާއަކީ މޮޑެލްއެކެވެ. އެކްޓިވިސްޓެކެވެ. މީގެ އިތުރުން މީހުންނަށް ހިތްވަރު ދިނުމުގެ ގޮތުން އެކިއެކި ޙަފްލާތަކުގައި ވާހަކަ ދައްކާ "މޮޓިވޭޝަނަލް ސްޕީކަރ" އެކެވެ.
މިހުރިހާ ސަބަބަކާހުރެ މީހުން އޭނާއަށް ދީފައިވާ ލަޤަބަކީ "އަޔަން ލޭޑީ އޮފް ޕާކިސްތާން" އެވެ. އެއީ އޭނާގެ ދިރިއުޅުމުގައި ދިމާވި ހިތްދަތި ހާދިސާތަކަކަށް ފަހު ވެސް، ނުހަނު ހިތްވަރު ގަދަކޮށް އައު އުންމީދުތަކަކާ އެކީ އަމިއްލަ ބުރަ މަސައްކަތުން އޭނާގެ ދިރިއުޅުން އަލުން ކޮޅަށް ޖެހުމުންނެވެ.
"އަހަރެންގެ އުމުރުން 18 އަހަރުގައި އަހަރެން އަލަތު ކައިވެންޏެއް ކުރިން. އެއީ އަހަރެންގެ މައިންބަފައިން ބުނި ބުނުމަށް. އަހަރެން އުފަންވީ މައިންބަފައިން ބުނާ ކޮންމެ ކަމަކަށް ވެސް 'އާނ' ބަސް ބުނާ އާއިލާއަކަށް" އޭނާގެ ޙަޔާތާ ބެހޭ ގޮތުން މުނީބާ ކިޔައިދީފައި ވެއެވެ.
މުނީބާ ކިޔައިދިން ގޮތުގައި އެކައިވެނިން އޭނާއަކަށް އެއްވެސް އުފަލެއް ނުލިބެއެވެ. އަދި އެކައިވެނިން އޭނާއަށް ލިބުނު އެންމެ ބޮޑު ހިތްދަތިކަމަކީ، އަދި އޭނާގެ މުޅި ދިރިއުޅުން ބަދަލު ކޮށްލީ، އޭނާގެ ފިރިމީހާގެ އަތުން ވީ އެކްސިޑެންޓެވެ.
"އެއީ މީގެ 13 އަހަރު ކުރިންނެވެ. އަހަރުމެންގެ ކައިވެންޏަށް އެއިރު ދެއަހަރެވެ. ފިރިމީހާއާއެކު ކާރެއްގައި އިންދާ، އޭނާއަށް ނިދުނީއެވެ. އަދި ކާރު ގޮސް މަގުގައި ކޮނެފައި އޮތް ވަޅުގަނޑެއްގެ ތެރެއަށް ވެއްޓުނެވެ. އެވަޅުގަނޑު ތެރެއަށް ކާރު ވެއްޓެން ދިޔުމުން، ފިރިމީހާ އޭނާގެ އަމިއްލަ ނަފްސު އަވަހަށް ސަލާމަތް ކުރަން ކާރުން ބޭރަށް ފުންމާލިއެވެ. އެކަމަކު އަހަރެން އިނީ ކާރުގައި ތާށި ވެފައެވެ."
އެއެކްސިޑެންޓުގެ ސަބަބުން މުނީބާއަށް ވަރަށް ބޮޑެތި އަނިޔާތަކެއް ވިއެވެ. އޭނާގެ އުނަގަނޑުން ތިރި ވާގިނެތުމުގެ އިތުރުން، މައިބަދައަށް ގެއްލުން ލިބި، އަތުގެ އެކި ހިސާބުން ބިންދައިގެން ވެސް ދިޔައެވެ. ލިބުނު ޒަހަމްތަކަށް ފަރުވާ ކުރުމަށް ދެމަހާއި ބައި ވަންދެން ހޮސްޕިޓަލުގައި އޮންނަން ޖެހުނު ކަމަށް މުނީބާ ބުންޏެވެ. އަދި އެކި ދުވަސްމަތިން ޑޮކްޓަރު އޭނާ ކައިރިއަށް ގޮސް، ހިތާމަވެރި ޚަބަރުތައް ދިން ކަމަށް ވެސް ބުންޏެވެ.
"އެއްދުވަހު ޑޮކްޓަރެއް އައިސް އަހަރެން ގާތު ބުނި، އަހަރެން އާޓިސްޓަކަށް ވާން ބޭނުންވިކަން އޭނާއަށް އެނގިފައިވާ ކަމަށް. ނަމަވެސް ދެނެއް އަހަންނަކަށް އެއްވެސް އެއްޗެއް ނުކުރެހޭނެ ކަމަށް ޑޮކްޓަރު ބުނި. އެކަމާ އަހަރެން ވަރަށް ހިތާމަ ކުރިން ނަމަވެސް ހިތްވަރު ކޮށްފައި އޯކޭ އޭ ބުނިން. އޭގެ އަނެއް ދުވަހު ޑޮކްޓަރު އައިސް ބުނީ އަހަރެންގެ މައިބަދައަށް ލިބިފައިވާ އަނިޔާގެ ސަބަބުން ދެން އަހަންނަށް ނުހިނގޭނެ ކަމަށް. އެކަމަށް ވެސް ހިތްވަރު ކޮށްފައި އަހަރެން އޯކޭ އޭ ބުނިން. ނަމަވެސް އޭގެ އަނެއް ދުވަހު އަނެއްކާވެސް ޑޮކްޓަރު އައިސްފައި ބުނީ މައިބަދައަށާއި ބުރަކައްޓަށް ލިބުނު ގެއްލުމުގެ ސަބަބުން، އަހަންނަކަށް ދަރިއެއް އުފަން ނުކުރުވޭނެ ކަމަށް. އެކަމާ އަހަރެން ވަރަށް ބޮޑަށް ދެރަވި" މުނީބާ ކިޔައިދިނެވެ.
އެވަގުތު މުނީބާ ދިރިއުޅުން މަތިން އެއްކޮށް ފޫހިވިއެވެ. ނަމަވެސް އޭނާ ބޭނުންވީ އޭނާގެ ދިރިއުޅުމުގައި އަމިއްލައަށް ކުލަތަކެއް ޖައްސާށެވެ. އެގޮތުން އޭނާގެ ބޭބެ އޭނާގެ ގާތަށް ހޮސްޕިޓަލަށް ދިޔުމުން، އޭނާ އަލުން ކުރަހަން ބޭނުން ކަމަށް ބުނެ ކެންވާސްއަކާއެކު ކުލަ ގެނެސް ދިނުމަށް މުނީބާ އެދުނެވެ. މުނީބާ ކުރެހި ކުރެހުންތަކަށް އެތައް ބަޔަކު ސަނާ ކިޔެވެ. އެކުރެހުންތަކުގައި ފޮރުވިފައިވާ ހިތާމައާއި މޮޅިވެރިކަން ހަމައެކަނި އެނގެނީ މުނީބާ އަށެވެ.
އެދުވަހަށް ފަހު މުނީބާ ގަސްދު ކުރީ އޭނާގެ ހުރިހާ ހިތާމައަކާ ކުރިމަތިލާށެވެ. އެގޮތުން ފުރަތަމަ އޭނާ ހިތްވަރާއެކު ކުރިމަތިލާން ޖެހުނީ ، އޭނާގެ އަލަތު ކައިވެނި ރޫޅާލުމާއެވެ. ވަރިވުމަކީ މުނީބާ ބޭނުންވި ކަމަކަށް ނުވި ކަމުގައި ވިޔަސް، ވަރި ކުރުމުން އެކަމާ ހިތްވަރާއެކު ކުރިމަތިލުމުގެ އިތުރުން އޭނާގެ ކުރީގެ ފިރިމީހާއަށް ވެސް އުފާވެރި ޙަޔާތެއް ދެއްވުން އެދި އަބަދު ވެސް މުނީބާ ދުޢާ ކުރެއެވެ.
ވަރިއަށް ފަހު ދެން އޭނާ ކުރިމަތިލީ އޭނާއަށް ދަރިއަކު ދިމާވެފައިވާ މައްސަލައާއެވެ.
"ޙަޤީޤަތުގައި ވެސް އެއީ އަހަރެން ވަރަށް ހިތާމަކުރި ކަމެއް. އެކަމަކު އެކަމާ އަހަރެން ރަނގަޅަށް ވިސްނާލުމުން އެނގުނީ، ދުނިޔޭގައި މައިންބަފައިން ނެތި އަޅާލާނެ މީހެއް ނެތިފައި ތިބި އެތައް ކުދިންނެއް އެބަތިބިކަން. އެކުދިންނަށް ބޭނުން ވަނީ އެކުދިންނާ ހަވާލުވާނެ މީހެއްކަން. އެހެންކަމުން އޭގެން ކުއްޖެއް އެޑޮޕްޓް ކުރަން އަހަރެން ނިންމިން. އެގޮތުން ވަރަށް ގިނަ ޔަތީމުޚާނާ އަށް އަހަރެންގެ ނަން ދީފައި އަހަރެން އިންތިޒާރު ކުރިން. އޭގެ ދެ އަަހަރުފަހުން އަހަންނަށް ކޯލެއް އައި. އެއީ ޕާކިސްތާނުގެ ކުޑަކުޑަ އަވަށަކުން. ފޯނުން ވާހަކަ ދެއްކި މީހާ ބުނީ އުމުރުން ދެދުވަހުގެ ތުއްތު ތުއްތު ފިރިހެން ކުއްޖަކު އޮތް ކަމަށް، އަދި އަހަރެން ގާތު އެހީ އެކުއްޖާ އެޑޮޕްޓް ކުރަން ބޭނުންތޯ. އެވަގުތު އަހަންނަށް ހީވީ ހަމަ ވިހެއުމުގެ އިޙުސާސް ކުރެވުނުހެން. އަހަރެން ބުނިން އާނއެކޭ އަހަރެން މިދަނީ އެކުއްޖާގެ ގެއަށް ގެންނަން އެކުއްޖާ ބަލައޭ. އެއިރު އޭނާއަށް އެންމެ ދެދުވަސް، މިހާރު އޭނާއަށް 10 އަހަރު"
މުނީބާ މަޒާރީ އަކީ ފުރޮޅުލީ ގޮނޑިއެއް ބޭނުންކުރާ، ޕާކިސްތާނުގެ އެންމެ ފުރަތަމަ މޮޑެލް އެވެ. އޭނާއަކީ މިހާރު ޔޫއެން ވިމެން ޕާކިސްތާނުގެ ޤައުމީ އެމްބެސެޑަރ ވެސް މެއެވެ. މުނީބާ ބުނިގޮތުގައި، އެކްސިޑެންޓު ވެގެން ހޮސްޕިޓަލުގައި އޮތް ދުވަސްކޮޅު، ހިތާމަވެރި ޚަބަރުތައް ލިބެމުން ދިޔުމުން، އޭނާ ނިންމީ ހުރިހާ ކަމަކާވެސް ހިތްވަރާއެކު ކުރިމަތިލުމަށާއި އެދުވަހަށް ފަހު ހަމައެކަނި އެހެން މީހުންނަށްޓަކައި އެމީހުންގެ ދިރިއުޅުން ފުރިހަމަ ގޮތުގައި ބަހައްޓަން މަސައްކަތް ނުކޮށް، އޭނާގެ އަމިއްލަ ދިރިއުޅުން ވެސް ފުރިހަމަ ކުރަން މަސައްކަތް ކުރުމަށް ވިސްނި ކަމަށެވެ.
