އެއް މަސް ދުވަހަށްފަހު ފުވައްމުލައް އާންމު ހާލަތަށް ގެނެސްފި
ކޮވިޑް-19 ފެތުރުމާ ގުޅިގެން މޮނީޓަރިންގެ ހާލަތަށް ގެނެވުނު ފުވައްމުލަކު ސިޓީ، އެއް މަސް ދުވަހަށްފަހު މިއަދު އާންމު ހާލަތަށް ގެނެސްފިއެވެ.
ފުވައްމުލަކު ސިޓީ އާންމު ހާލަތަށް ގެނެސްފައިވާކަން "ދެން" އަށް ކަށަވަރު ކޮށްދެއްވަމުން، އެ ސިޓީގެ ޑެޕިއުޓީ މޭޔަރު މުޙައްމަދު ޟިރާރު ވިދާޅުވީ، އާންމު ހާލަތަށް ފުވައްމުލައް ގެނެވުނީ މިއަދު މެންދުރުފަހުގެ ވަގުތެއްގައި ކަމަށެވެ.
އެއްމަސް ދުވަސް ފަހުން މިއަދު ފުވައްމުލަކުގެ މޮނީޓަރިންގެ ހާލަތު އުވާލާފައިވާއިރު، މި ފާއިތުވީ މަސް ދުވަހު އެ ސިޓީއަށް މާބޮޑު ދަތިތަކަކާ ކުރިމަތިނުވާ ކަމަށާއި، ޒަރޫރީ ބޭނުންތަކަށް ބޭނުން ވާނެ މުދާ ވެސް ލިބުނުކަމަށް ޟިރާރް ވިދާޅުވިއެވެ. އެހެންނަމަވެސް އަމިއްލަ ބައެއް ފަރާތްތަކުގެ ވިޔަފާރި ބަންދުކުރަން ޖެހުމުން، އެކަމާ ބައެއް ފަރާތްތަކުން ކަންބޮޑުވުން ފާޅުކުރިކަން ޟިރާރް ފާހަގަ ކުރެއްވިއެވެ.
ކޮވިޑްގެ ހާލަތާ ގުޅިގެން ގިނަ ދުވަސްތަކެއް ވަންދެން މޮނީޓަރިންގެ ހާލަތުގައި އޮތުމަށްފަހު އާންމު ހާލަތަށް އެ ސިޓީ ގެނައުމުން، މި ބަލިން ރައްކާތެރިވުމުގެ ފިޔަވަޅެއްގެ ގޮތުން އަވަހަށް ވެކްސިން ޖެހުމަށް ޟިރާރް އިލްތިމާސް ކުރެއްވިއެވެ.
"ޚާއްސަކޮށް ހައިރިސްކު ބޭފުޅުން (65 އަހަރުން މަތީގެ ހުރިހާ ބޭފުޅުން) ވެކްސިން ގެ ފުރަތަމަ ޑޯޒް އަވަހަށް ނެންގެވުމަށް އިލްތިމާސް ކުރަން. ފުރަތަމަ ޑޯޒް އަވަހަށް ނެންގެވީމަ ދެވަނަ ޑޯޒް ނަންގަވަން ވަގުތު ލިބެނީ. ދެ ޑޯޒް ފުރިހަމަ ކުރީމަ އެންމެންނަށް ވެސް މިނިވަންކަމާއެކީ ރާއްޖެއިން ބޭރަށް ވެސް ދެވޭ ގޮތަށް ގިނަ ޤައުމުތަކުން ވެސް ތައްޔާރުވަމުން ދަނީ" ޟިރާރް ވިދާޅުވިއެވެ.
މީގެ އިތުރުން ޟިރާރް ވިދާޅުވީ ފުވައްމުލައް މޮނީޓަރިންގެ ހާލަތުގައި އޮތްއިރު ރައްޔިތުންގެ ފަރާތުން ކައުންސިލާއި ހެލްތު ސެކްޓާއަށް ވެސް އެހީތެރިކަމާއި އެއްބާރުލުން ދެއްވި ކަމަށާއި އެކަމަށްޓަކައި ހުރިހާ ރައްޔިތުންނަށް ކައުންސިލު ޓީމުގެ ނަމުގައި ޚާއްސަ ޝުކުރެއް އަދާކުރައްވާ ކަމަށެވެ.
