މިނިސްޓަރުގެ އިލްތިމާސް: ސަނަދެއްގެ ބޭނުމުގައި އެކަނި މަތީ ތަޢުލީމް ނުހޯދާ
ހަމައެކަނި ސަނަދެއްގެ ބޭނުމުގައި މަތީ ތަޢުލީމް ހާސިލް ނުކުރުމަށް، ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން، އިލްތިމާސް ކުރައްވައިފިއެވެ.
މިނިސްޓަރ މިހެން ވިދާޅުވީ ސަރުކާރުން ހިލޭ ޑިގްރީއަށް ކިޔެވުމަށް ހުޅުވާލި ފުރުޞަތުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ދިމާވާ ކާރިސާތަކުން އަރައިގަނެވޭނީ ވެސް އެކަންކަމާ ކުރިމަތިލާން ކެރޭ ބަޔަކު ތިބެގެން ކަމަށާއި އެހެން ގައުމުތަކާ އެއްވަރަށް ފައި ހަމަ ކުރެވޭނީ ތައުލީމު އުނގެނި، މަސައްކަތާއި ހުނަރު ވެސް ދަސްކޮށްގެން ކަމަށެވެ. އަދި ސެޓްފިކެޓެއް އެކަނި ހޯދަން ތައުލީމް ހާސިލް ނުކުރަން އިލްތިމާސް ކުރެއްވިއެވެ.
މިނިސްޓަރ އިތުރަށް ވިދާޅުވީ، ފުރަތަމަ ޑިގްރީއަށް ހިލޭ ކިޔެވުމަށް ހުޅުވާލި ފުރުޞަތު ކާމިޔާބުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އެ ރިޔާސީ ވަޢުދުގެ މުހިންމުކަމުގެ ސަބަބުންކަމަށެވެ. އެގޮތުން އެ ވަޢުދުގެ ސަބަބުން ތަޢުލީމަށް ލޯބިކުރާ ޒުވާނުން ތިބިކަން އެނގުނު ކަމަށް މިނިސްޓަރ ވިދާޅުވިއެވެ.
"ކޮވިޑްގެ ޙާލަތުގައި ޤައުމަށް އެންމެ ބޮޑަށް އިޤްތިޞާދުގެ ދަތިކަން ކުރިމަތިވެގެން ދިޔައިރު ވެސް އަޅުގަނޑުމެންގެ ފުރަތަމަ ޑިގްރީއަށް ކިޔެވުމުގެ ޕްރޮގްރާމަށް އެއްވެސް ލޮޅުމެއް ނާރާ. މި ސްކީމް ހަމަ ޑިޒައިން ކޮށްފައި އޮތް ގޮތަށް ކުރިއަށް ގެންދެވުނު. އޭގެ އެންމެ މުހިންމު ސަބަބަކީ ރައީސްގެ ހިތްޕުޅުގައި މަތީ ތަޢުލީމަށް ދެވިފައިވާ ލޯތްބާއި ދަރަޖަ." ހަޔަރ އެޑިއުކޭޝަން މިނިސްޓަރ ޑރ.އިބްރާހީމް ޙަސަން ވިދާޅުވިއެވެ.
ހިލޭ ޑިގްރީގައި މި ވަގުތު 7،173 ދަރިވަރުން ކިޔަވަމުން އަންނައިރު އޭގެ ތެރެއިން 68 ޕަސެންޓަކީ އަންހެން ކުދިންނެވެ.
