15ގެ ފަހުން ވެސް ވެކްސިންގެ ފުރަތަމަ ޑޯޒް ޖަހައިދޭނެ
މާލެ ސަރަޙައްދުގައި ކޮވިޑް-19 ވެކްސިންގެ ފުރަތަމަ ޑޯޒު ދިނުން އަންނަ ހަފްތާގެ ހޯމަ ދުވަހާ ހަމައަށް (15 މާރޗް 2021) ކުރިއަށް ގެންދާގޮތަށް ނިންމާފައި ވީ ނަމަވެސް މިތާރީހުގެ ފަހުން ވެސް ބައެއް ފަރާތްތަކަށް ވެކްސިންގެ ފުރަތަމަ ޑޯޒު ޖެހުން ކުރިއަށް ގެންދަން ނިންމައިފިއެވެ.
ހެލްތު އެމަޖަންސީ އޮޕަރޭޝަން ސެންޓަރ (އެޗްއީއޯސީ) އިން މިއަދު ބުނީ، މާލެ ސަރަޙައްދުގައި ކޯވިޑް-19 ވެކްސިންގެ ފުރަތަމަ ޑޯޒު ދިނުން އަންނަ ހަފްތާގެ ހޯމަ ދުވަހާ ހަމައަށް (15 މާރޗް 2021) ކުރިއަށް ގެންދާގޮތަށް ނިންމާފައިވީ ނަމަވެސް މިތާރީހުގެ ފަހުން ވެސް އަންނަނިވި ފަރާތްތަކަށް ވެކްސިންގެ ފުރަތަމަ ޑޯޒު ޖެހުން ކުރިއަށް ގެންދެވޭނެ ކަމަށެެވެ.
އެއީ:
▪︎ ބަލިން ރައްކާތެރިކުރުމަށް ޚާއްޞަ އިސްކަމެއް ދޭ ފަރާތްތައް (އުމުރުން ދުވަސްވީ މީހުންނާއި ބަލިތަކުގައި އުޅޭ މީހުން)
▪︎ ޕޮސިޓިވްވެ މިހާރު އެކަހެރިވެފައިވާ މީހުން (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)
▪︎ ކޮންޓެކްޓަށްވެ ކަރަންޓީންގައި ތިބި މީހުން (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)
▪︎ ރާއްޖެއިން ބޭރުން ދަތުރުކުރުމަށްފަހު ކަރަންޓީންގައި ތިބި މީހުންނާއި މާލެއިން ދަތުރު ކުރުމަށް ފަހު ކަރަންޓީނުގައި ތިބި މީހުން
▪︎ ބައްޔެއްގެ ސަބަބުން، ޞިއްޙީ ޙާލަތެއްގެ ސަބަބުން ވެކްސިން ޖެހުން ލަސްކުރަން ޖެހުނު މީހުން
ކޮވިޑް-19 އިން ރައްކާތެރިވުމަށް ޖަހާ ވެކްސިންގެ ފުރަތަމަ ޑޯޒް ދިނުން، މާލެ ސަރަހައްދުގައި މިމަހުގެ 15 ދުވަހު ނިންމާލާނޭ ކަމަށާއި މާލޭގައި ވެކްސިންގެ ދެވަނަ ޑޯޒް ޖަހަން ފަށަން ތައްޔާރުވަމުން އަންނަ ކަމަށް ހެލްތު މިނިސްޓަރ އަހުމަދު ނަސީމް ވަނީ މިމަހުގެ 8ވަނަ ދުވަހު އިއުލާނު ކުރައްވާފައެވެ.
"އެހެންވީމާ މިމަހުގެ 15 ވަނަ ދުވަހާ ހަމައަށް، އަޅުގަނޑުމެން ޚިޔާލު ކޮށްގެން މިތިބީ 15 ވަނަ ދުވަހު މާލޭގައި ފުރަތަމަ ޑޯޒް ޖެހުން ނިމުމަކަށް ގެންނަން. ދެން އަޅުގަނޑުމެން މާލޭގައި ފައްޓާނީ ދެވަނަ ޑޯޒް ޖެހުން" މިނިސްޓަރ ނަސީމް ވިދާޅުވިއެވެ.
މިނިސްޓަރ ނަސީމް ވިދާޅުވީ ބަލިން ރައްކާތެރިވުމަށް ވެކްސިންގެ ދެވަނަ ޑޯޒް ޖެހުން މުހިންމު ކަމަށާއި މިމަސައްކަތް ފައްޓަވަން ޖެހޭ ކަމަށެވެ. މީގެ އިތުރުން ރާއްޖޭގެ ސިއްހީީ ނިޒާމުގައި ދުވާލެއްގެ މައްޗަށް 10،000 ވެކްސިން ޑޯޒްް ޖެހުމުގެ ޤާބިލްކަން އެބަހުރި ކަމަށް ވެސް ހެލްތު މިނިސްޓަރ ވިދާޅުވިއެވެ. އަދި މާލޭގައި 15 ވަނަ ދުވަހާ ހަމައަށް ހުރިހާ ރައްޔިތުންނަށް މެކްސިމަމް ކެޕޭސިޓީގައި ވެކްސިން ދީ ނިންމާލެވޭނެކަން ވެސް ފާހަގަ ކުރެއްވިއެވެ.
