ކޮވިޑް ވެކްސިންގެ ދެވަނަ ޑޯޒް އެންމެ އަވަހަށް ވެސް ދޭން ފަށާނީ އަންނަމަހު: އެޗްއީއޯސީ
ކޮވިޑް-19 އިން ރައްކާތެރިވުމަށް ޖަހާ ވެކްސިންގެ ދެވަނަ ޑޯޒް އެންމެ އަވަހަށް ވެސް ދޭން ފަށާނީ އަންނަ އޭޕްރިލް މަހުގެ އެއްވަނަ ދުވަހު ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ވިދާޅުވެއްޖެއެވެ.
"ދެން" އަށް މައުލޫމާތު ދެއްވަމުން އެޗްއީއޯސީގެ އޮފިޝަލަކު ވިދާޅުވީ ވެކްސިން ޓެކްނިކަލް އެޑްވައިޒަރީ ގްރޫޕުން އިރުޝާދު ދެއްވާފައި ވަނީ ވެކްސިންގެ ފުރަތަމަ ޑޯޒް ދޭން ފަށާތާ 8 ހަފްތާ ފަހުން ދެވަނަ ޑޯޒް ދިނުމަށް ކަމަށެވެ.
"ފެބްރުއަރީ މަހުގެ 1 ގައި އަޅުގަނޑުމެން ފުރަތަމަ ވެކްސިން ދޭން ފެށީ، އެހެންވީމަ 8 ހަފްތާ ވާނީ އޭޕްރިލް މަހުގެ 1 އަށް ކަމަށް މިބަލަނީ. އެހެންކަމުން އެންމެ އަވަހަށް ވެސް ދެވަނަ ޑޯޒް ދޭން ފެށޭނީ އެދުވަހު ކަމަށް ބޮޑަށް ބެލެވެނީ" އޮފިޝަލު ވިދާޅުވިއެވެ.
ވެކްސިންގެ ދެވަނަ ޑޯޒް އަންނަ މަހު ދޭން ފަށާނެ ކަމަށް ބުނެފައިވާއިރު، އެޗްއީއޯސީން މިއަދު ބުނީ، މާލެ ސަރަޙައްދުގައި ކޮވިޑް-19 ވެކްސިންގެ ފުރަތަމަ ޑޯޒު ދިނުން އަންނަ ހަފްތާގެ ހޯމަ ދުވަހާ ހަމައަށް (15 މާރޗް 2021) ކުރިއަށް ގެންދާގޮތަށް ނިންމާފައިވީ ނަމަވެސް މިތާރީހުގެ ފަހުން ވެސް އަންނަނިވި ފަރާތްތަކަށް ވެކްސިންގެ ފުރަތަމަ ޑޯޒު ޖެހުން ކުރިއަށް ގެންދެވޭނެ ކަމަށެެވެ.
އެއީ:
▪︎ ބަލިން ރައްކާތެރިކުރުމަށް ޚާއްޞަ އިސްކަމެއް ދޭ ފަރާތްތައް (އުމުރުން ދުވަސްވީ މީހުންނާއި ބަލިތަކުގައި އުޅޭ މީހުން)
▪︎ ޕޮސިޓިވްވެ މިހާރު އެކަހެރިވެފައިވާ މީހުން (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)
▪︎ ކޮންޓެކްޓަށްވެ ކަރަންޓީންގައި ތިބި މީހުން (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)
▪︎ ރާއްޖެއިން ބޭރުން ދަތުރުކުރުމަށްފަހު ކަރަންޓީންގައި ތިބި މީހުންނާއި މާލެއިން ދަތުރު ކުރުމަށް ފަހު ކަރަންޓީނުގައި ތިބި މީހުން
▪︎ ބައްޔެއްގެ ސަބަބުން، ޞިއްޙީ ޙާލަތެއްގެ ސަބަބުން ވެކްސިން ޖެހުން ލަސްކުރަން ޖެހުނު މީހުން
ކޮވިޑް-19 އިން ރައްކާތެރިވުމަށް ޖަހާ ވެކްސިންގެ ފުރަތަމަ ޑޯޒް ދިނުން، މާލެ ސަރަހައްދުގައި މިމަހުގެ 15 ދުވަހު ނިންމާލާނޭ ކަމަށާއި މާލޭގައި ވެކްސިންގެ ދެވަނަ ޑޯޒް ޖަހަން ފަށަން ތައްޔާރުވަމުން އަންނަ ކަމަށް ހެލްތު މިނިސްޓަރ އަހުމަދު ނަސީމް ވަނީ މިމަހުގެ 8ވަނަ ދުވަހު އިއުލާނު ކުރައްވާފައެވެ.
