ރޭޕްގެ ވާހަކައެއް: މަންމައަށް ކުށަކަށްވީ ޅައުމުރުގައި "ބިޓެއް" ނެގުން އެކަނި!
މިއީ ރޭޕްއާއި ދެކޮޅަށް ހިންގަމުން އަންނަ ހަރަކާތްތަކުގެ ތެރޭގައި، ރޭޕް އަދި ޖިންސީ ފުރައްސާރައާއި ކުރިމަތިވެފައިވާ ކުދިން/މީހުން މީސްމީޑިއާގައި ހިއްސާ ކޮށްފައިވާ ވާހަކަތަކުން ވާހަކައެކެވެ. މިވާހަކަ ތަރުޖަމާކޮށް ޝާއިއުކޮށްފައި މިވަނީ ނަންހާމަ ނުކުރާގޮތަށް އެމީހުންގެ އިޒުނައާއި އެކުގައެވެ.
"އެންމެ ފުރަތަމަ ޅައުމުން ފަށަމާ ހިނގާށެވެ. އަހަންނަކަށް ދުވަހަކުވެސް އުފާވެރި، ހަމަޖެހޭ ޅައުމުރެއް ލިބިފައެއް ނުވެއެވެ. އަބަދުވެސް އިވެމުންދިޔައީ މައިންބަފައިންގެ ޒުވާބުގެ އަޑެވެ. ބައެއް ފަހަރު އެމީހުންގެ ޒުވާބުގެ ތެރެއަށް އަހަރެން ވެސް ވައްދައެވެ.
ބޮޑުދައިތަ ބުނީ މަންމައާއި ބައްޕަ އެވަރަށް ޒުވާބުކުރަނީ އަހަންނާއި ހެދި ކަމަށެވެ. އަހަރެން މިއީ މަންމަމެންގެ އެންމެ ހަވު ކުއްޖާއެވެ. މަންމަމެން ބޭނުންވެސް ނުވި ކުއްޖާއެވެ.
މަންމަ އަހަރެން އެބޯޓު ކޮށްލެވޭތޯވެސް އުޅުނެވެ. ނަމަވެސް އެކަން ކާމިޔާބު ނުވީއެވެ. ރުޅިއައިސްގެން ބައެއް ފަހަރު ބައްޕަ ބުނަމުން ދިޔައީ އަހަރެން މިއީ ބައްޕަގެ ދަރިއެއްވެސް ނޫން ކަމުގައެވެ. އެއިރު އަހަންނަށް އެންމެ 10 އަހަރެވެ. ނަމަވެސް އެކަންކަމުގެ ސަބަބުން އަހަރެން ދެރަވެ ޑިޕްރެޝަނަށް ދިޔައެވެ.
އުމުރުން 13ވއަހަރު ފުރުނުއިރު މަންމައާއި ބައްޕަ ވަރިވެއްޖެއެވެ. އަހަރެން އުޅުނީ މަންމަ ކައިރީގައެވެ. ނަމަވެސް ހަމަޖެހޭ އުފާވެރި ދިރިއުޅުމެއް ނުލިބުނެވެ.
އަހަރެން އެންމެ ފުރަތަމަ ކުއްޖަކާއި ރަށްޓެހިވީ އުމުރުން 16 އަހަރުގައެވެ. ފުރަތަމަ ތިންމަހު ވަރަށް ރަނގަޅަށް ކަންތައް ގޮސްފައި ފަހުން އޭނަގެ ކަންކަން ބަދަލުވިއެވެ.
އޭނަ އަހަންނަށް އެހެން އެކުވެރިން ގެންގުޅުމާއި އެހެން މީހުންނާއި ވާހަކަ ދެއްކުން މަނާ ކުރިއެވެ. އަހަރެންގެ ދެބެންގެ ދެދަރި ކުއްޖަކާއި އަޅުވާވެސް ކިއެވެ. އޭގެ އިތުރުން އަހަރެން ކައިރީ ޝަޚުވާނީ ވާހަކަ ދައްކާ، އެކަމަށް އިންކާރު ކުރުމުން އަހަންނާއި ވާހަކަ ނުދައްކަން ފެށިއެވެ. އަދި ފަހުން ފަހުން އަހަރެން ގައިގައި ޖަހަންވެސް ޖެއްސެވެ.
އެގުޅުމުން އެއިރު ސަލާމަތްވާން ބޭނުންނުވީ އެކަނިވެރި ވެދާނެ ކަމުގެ ބިރަށެވެ.
އެއްރޭ އޭނަ އަހަރެންލައްވާ އޭނަގެ ޖިންސީ ގުނަވަނުގައި އަތްލިއެވެ. ބިރުން އަހަރެން ތެޅިފޮޅިގަތީމަ ރުޅިއައިސްގެން އަހަރެންގެ މޫނުމަތީގައި ޖަހާފައި އަނގަމަތީގައި ފޮތިގަނޑެއް އެޅިއެވެ. އޭނަ އެރޭ ހުރީ މަސްތުގެ ހާލަތުގައި ކަންނޭނގެއެވެ. އަހަރެން ގައިގާ ތަޅަތަޅާފައި އޭނަ އަހަރެން ރޭޕް ކުރިއެވެ.
އެރެއަށްފަހު އަހަރެން އޭނައާއި ބައްދަލެއް ނުކުރަމެވެ. ނަމަވެސް އަބަދު ހުރީ ރޮވިރޮވިއެވެ.
އަހަރެން ރޯ އަޑު އިވިގެން މަންމަ އައިސް އަހަރެން ގާތު ވީކީއްތޯ އެއްސެވެ. އެރޭ ކިޔާ ނުދެވުނު ކަމުގައިވިޔަސް އަނެއް ދުވަހު ކިޔައި ދިނީމެވެ.
މަންމައަށް ކުށްވެރިވީ އަހަންނެވެ. މަންމަ ބުނީ އެހާ ކުޑައިރު "ބިޓެއް" ނެގީ ކީއްވެތޯއާއި އެގޮތަށް ދިމާވީ އެހެންވެގެން ކަމަށެވެ. އެކަންތަށް އަޅާނުލުމަށް ވެސް ބުންޏެވެ. އެހެންކަމުން އެއީ ކިތަންމެ ހިތްދަތި ވާހަކައަކަސް އަހަރެން އެވާހަކަ ހަނދާން ނުކޮށްވޭތޯ ވަރަށް ބަލަމެވެ.
މިހާރު އަހަންނަށް 20 އަހަރެވެ. މިއުޅެނީ ވަރަށް އަވަހަށް ކައިވެނިވެސް ކުރާށެވެ."
