ވެކްސިން ޖަހައިގެން ހާލުދެރަވި މެދު އުމުރުގެ އަންހެނަކަށް ފަރުވާދީފި
ކޮވިޑް-19 އިން ދިފާޢުވުމަށް ޖެހި ވެކްސިނުން މެދުރާއްޖެތެރޭ ރަށެއްގެ އަންހެނެއްގެ ހާލު ދެރަވެއްޖެއެވެ.
އެނގިފައިވާ ގޮތުގައި އެ އަންހެން މީހާއަށް އެރަށު ސިއްޙީ މަރުކަޒުން ފަރުވާ ދީފައިވަނީ، ވެކްސިން ޖެހިފަހުން އެމީހާއަށް ނޭވާލާން އުނދަގޫވެ، ވަރުބަލިވެސް ވާތީއެވެ.
ވަނަވަރު ހާމަނުކުރަން އެދި، އެއަންހެން މީހާގެ އާއިލާއިން މައުލޫމާތު ދެމުން ބުނީ، އެމީހާ އެންމެ ފުރަތަމަ ނޭވާ ހާސްވެ، އޯކަށް ދެމިފައި ތުރުތުރު އަޅަން ފެށި ކަމަށެވެ.
ކޮވިޑް ވެކްސިން ޖެހުމަށް ފަހު ހާލުދެރަ ވެގެން ފަރުވާ ދިނުމަށްފަހު ދޫކޮށްލާފައިވީ ނަމަވެސް، އޭނާގެ ހާލު އަދިވެސް އެއްކޮށް ރަނގަޅު ނޫން ކަމަށް މައުލޫމާތު ލިބެއެވެ.
ވެކްސިން ޖެހުމަށްފަހު ހާލު ދެރަވާ ފަރާތްތައް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދަނީ ގާތުން ބަލަމުންނެވެ. އެގޮތުން ވެކްސިން ޖެހިފަހުން ނިޔާވި އުމުރުން ދުވަސްވީ ދެމަފިރިއެއްގެ ކޭސް ވެސް ބަލަމުން އަންނަ ކަމަށް އެޗްޕީއޭއިން ބުންޏެވެ.
ރާއްޖޭގައި އަދި ދެމުން އަންނަނީ އިންޑިއާގެ ސެރަމް އިންސްޓިޓިއުޓުން ހަދިޔާކުރި ކޮވިޝީލްޑް އަސްޓްރާޒެނެކާ ވެކްސިނެވެ. މި ވެކްސިންގެ ފުރަތަމަ ޑޯޒް ދިނުން މިހާރު ނިންމާލާފައިވާއިރު މިހާތަނަށް ރާއްޖޭގައި 214،486 މީހުން ވެކްސިން ޖަހާފައިވެއެވެ.
