މިހާރު ފެންނަނީ ކުރު ދޮށިން މަސްބާނާހެން ރައްޔިތުން ޖޫރިމަނާ ކުރާތަން: ޣައްސާން
މިހާރު ފެންނަމުން ދަނީ ދަހިވެ، ކަވާފައި އޮތް އައިނަކުން ކުރު ދޮށިން މަސް ބާނާހެން ރައްޔިތުން ޖޫރިމަނާ ކުރާ ތަން ކަމަށް ރައްޔިތުން މަޖިލީހުގެ ގުރައިދޫ ދާއިރާގެ މެމްބަރު މުޙައްމަދު ޣައްސާން މައުމޫނު ވިދާޅުވެއްޖެއެވެ.
ޣައްސާން މިހެން ވިދާޅުވީ ވިލިމާލެ ކައުންސިލަށް ވާދަ ކުރައްވާ ޕީޕީއެމްގެ ކެންޑިޑޭޓް ނަހުލާ އަލީގެ ކެމްޕެއިން ޖަގަހަ ހުޅުވުމުގެ ރަސްމިއްޔާތުގައި މިއަދު ވާހަކަ ދައްކަވަމުންނެވެ.
ޣައްސާން ވިދާޅުވީ، ޕާކު ކުރާނެ ތަނެއް ނުދައްކާ ރައްޔިތުންގެ އަތުން ޖޫރިމަނާއެއް ނުނަގާނެ ވާހަކަވެސް މި ސަރުކާރުން ބުނެފައިވާ ކަމަށާއި އެހެން ނަމަވެސް މިހާރު ފެންނަނީ ދަހިވެ، ކަވާފައި އޮތް އައިނަށް ކުރު ދޮށިން މަސްބާނާހެން ރައްޔިތުން އަތުން ޖޫރިމަނާ އަތުލާ ތަން ކަމަށެވެ.
ދިވެހިރާއްޖޭގެ މުސްތަގުބަލަށްޓަކައި އަންނަންއޮތް ޖީލުތަކުގެ ހިމާޔަތުގައި ލޯން ނަންގަވައިގެން އެއްވެސް ކަހަލަ އިގްތިސާދީ މަޝްރޫއުއެއް ވެސް ކުރިއަށް ނުގެންދަވާނެ ކަމަށް މި ސަރުކާރުން ވައުދު ވީނަމަވެސް، މި ދެއަހަރު ދުވަހަކީ ރާއްޖޭގެ ތާރީހުގައި ދެއަހަރެއްގެ ތެރޭގައި ދައުލަތުގެ ދަރަނި އެންމެ ބޮޑުވި ދެއަހަރު ކަމަށް ވެސް ޣައްސާނު ވިދާޅުވިއެވެ.
"މިއަދުވެސް މިރަށަށް ވެސް މިއައީ ފެރީގަ. ކަނޑައެއް ޖަހާލާތަނެއް ބޮޑެތި މަޝްރޫއުތަކުގެ އަދިއެއް ކުލަވަރެއް ނުފެނޭ. އެމްޑީޕީއިން އަބަދުވެސް ވެރިކަމަށް އަންނަނީ ދިވެހި ރައްޔިތުންގެ އުންމީދުތަކާ ކުޅެގެން ރައްޔިތުންގެ އިހްސާސްތަކާ ކުޅެގެން ނުފުއްދޭ ވަރުގެ ވައުދުތަށް ވެގެން" ޣައްސާން ވިދާޅުވިއެވެ.
މީގެ އިތުރުން ޣައްސާން ވިދާޅުވީ، އެމްޑީޕީން ވެރިކަމަށް އައުމަށް ފަހު ދެން ފެންނަނީ އެހެން ދިމާލަކަށް ގައުމު ގެންދިޔުމަށް މަސައްކަތް ކުރާ ތަން ކަމަށެވެ.
Ads by STO
