ޤައުމަށް ޚިދުމަތް ކުރެއްވި ދެބެން، ނިޔާވީ ހާޓް އެޓޭކެއް ޖެހިގެން!
މިއަދު ލިބުނު އެއް ހިތާމަވެރި ޚަބަރަކީ ދ. ކުޑަހުވަދޫ ޕޮލިސް ސްޓޭޝަންގައި މަސައްކަތް ކުރެއްވި ޓީޑީ އޮފިސަރ އިސްމާއިލް ރިޒާ ނިޔާވި ޚަބަރެވެ.
ރިޒާ އާއި ބެހޭ ގޮތުން އިތުރަށް މައުލޫމާތު އޮޅުން ފިލުވާލުމުން އެނގުނީ މީގެ އެއް އަހަރެއް ކުރިން އޭނާގެ ބޭބެ އަލީ ރިޔާޒް ވެސް ނިޔާވެފައިވާ ކަމެވެ. އަލީ ރިޔާޒް އުޅުއްވީ އެމްއެންޑީއެފް ގައެވެ.
އެދެބޭފުޅުންނާއި ބެހޭގޮތުން "ދެން" އަށް މައުލޫމާތު ދެއްވަމުން ކުޑަހުވަދޫ ކައުންސިލްގެ ރައީސް ވިދާޅުވީ އެދެބެންނަކީ ވެސް ވަރަށް އަޚްލާޤު ރަނގަޅު މަޑުމައިތިރި ދެބެން ކަމުގައެވެ. ނަމަވެސް އިތުރަށް ދެން އިވުނީ ވަރަށް ހައިރާން ކުރުވަނިވި، ހިތާމަވެރި ވާހަކަ ތަކެކެވެ.
"އެދެބެން ވެސް ނިޔާވީ ހާޓް އެޓޭކެއް ޖެހިގެން. އަލީ ރިޔާޒް ނިޔާވީ މިދިޔަ އަހަރު. އެމްއެންޑީއެފް ގައި މަސައްކަތް ކުރެއްވީ. ނިޔާވީ ހާޓް އެޓޭކެއް ޖެހިގެން. މިއަދު ފަތިހު ނިޔާވީ އިސްމާއިލް ރިޒާ. އޭނާ މަސައްކަތް ކުރެއްވީ ފުލުހުގައި. ނިޔާވީ ހާޓް އެޓޭކެއް ޖެހިގެން." ޝާމް ވިދާޅުވިއެވެ.
މިހައިރާން ކަމުގައި އިންދާ ދެން އިވުނީ ވެސް ވަރަށް ހިތާމަވެރި ޚަބަރެކެވެ.
ރިޔާޒް އާއި ރިޒާ ގެ މައިންބަފައިންނަށް މުޅިއަކު ނުވަ ކުދިން ލިބުނެވެ. ނަމަވެސް އެހުރިހާ ކުދިން ވެސް މިހާރު ވަނީ ނިޔާވެފައެވެ.
"ނުވަ ކުދިން ލިބުނު ކަމަށް އަޅުގަނޑަށް މައުލޫމާތު ލިބިފައިވަނީ. އޭގެ ތެރެއިން އެންމެ ފަހުން ދުނިޔޭގައި ތިބި ދެކުދިން އެއީ. ނަމަވެސް އެދެކުދިން ވެސް މިހާރު ނިޔާވީ" ވަރަށް ހިތާމައާއެކު ޝާމް ފާހަގަ ކުރެއްވިއެވެ.
ރިޒާގެ ކުއްލި މަރާއި ގުޅިގެން ފުލުހުން ވެސް ވަނީ ތައުޒިޔާ ފޮނުވައިފައެވެ.
މާތް ﷲ އެ މަރްޙޫމުންގެ ފުރާނައަށް ހެޔޮ ރަޙްމަތް ލައްވާ ސުވަރުގޭގެ މަތިވެރި ނިޢުމަތް ދެއްވާށި. އާމީން. އަދި މިފަދަ ހިތްދަތި ވަގުތެއްގައި އެއާއިލާއަށް ހިތްވަރާއި ކެތްތެރިކަން ދެއްވާށި. އާމީން.
إِنَّا لِلّهِ وَإِنَّـا إِلَيْهِرَاجِعُون
Ads by STO
