ކެންޕެއިން ކުރަން ވަގުތު ނެތް ކަމަށް ބުނެ އެމްޑީޕީގެ ކެނޑިޑޭޓަކު ވާދަ ނުކުރަން ނިންމައިފި
ވާދަވެރިކަމާއެކު ކެންޕެއިން ކުރުމަށް އެކަށީގެންވާ ވަގުތު ނެތް ކަމަށްބުނެ މިއަންނަ މަހު 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި ލ.ފޮނަދޫ ރަށު ކައުންސިލްގެ ރައީސް ކަމަށް ވާދަ އެމްޑީޕީގެ ޓިކެޓްގައި ވާދަ ކުރައްވާ ހުސެއިން ޝާރިފް (ޑޮކޭ) އިންތިޚާބުގައި ވާދަ ނުކުރަން ނިންމައިފިއެވެ.
ޑޮކޭގެ ކެންޕެއިން ޕޭޖުން ކޮށްފައިވާ ޕޯސްޓެއްގައި ބުނެފައިވަނީ، އިންތިޚާބު ލަސްވުމާ ގުޅިގެން ހާލަތަށް ބަދަލު އައުމާއި ގުޅިގެން ކައުންސިލް އިންތިޚާބަށް ކެންޕެއިން ކުރުމުގެ ފުރުސަތު ނެތް ކަމަށް ޤަބޫލުފުޅު ނުކުރައްވާތީ ނަން އަނބުރާ ނެގުމަށް ގަސްދު ކުރާ ކަމަށެވެ. އަދި މި އިންތިޚާބުގައި އަމިއްލަ ގޮތުން ވާދަ ކޮށްފައިވާ ހަސަން ދީދީ، އެންޑޯޒް ކުރާ ކަމަށާއި މިއީ ޕާޓީއަށް އެންމެ ރަނގަޅު ގޮތް ކަމަށް ދެކިވަޑައިގަންނަ ކަމަށްވެސް ޑޮކޭގެ ޕޯސްޓްގައިވެއެވެ.
ފޮނަދޫ ރަށު ކައުންސިލްގެ ރައީސް ކަމަށް ޕީޕީއެމްގެ ކެނޑިޑޭޓެއްގެ އިތުރުން އަމިއްލަ ގޮތުން ކެނޑިޑޭޓަކު މި އިންތިޚާބުގައި ބައިވެރިވެ ވަޑައިގަންނަވައެވެ. މިހާރު ފޮނަދޫ ކައުންސިލްގެ ރައީސް ކަން ކުރައްވަމުން ގެންދަނީ ޕީޕީއެމްގެ ޓިކެޓްގައި އިންތިޚާބު ކާމިޔާބު ކުރެއްވި ކެނޑިޑޭޓެވެ.
Ads by STO
