މި ފެންނަނީ އެންމެން ގުޅިގެން ކުރާ ވައްކަން: އުޝާމް
ކޮވިޑް-19 ގެ ހާލަތާ ގުޅިގެން ރާއްޖެއަށް ގެންނަން ހަވާލުކުރި ވެންޓިލޭޓަރުތައް ގެނައުމުގައި ކޮރަޕްޝަން ހިންގާފައިވާ ކަމަށް ބެލެވޭ ކަމަށް ވިދާޅުވެ އެންޓި ކޮރަޕްޝަން ކޮމިޝަން (އޭސީސީ) އިން ހުށަހެޅި މައްސަލަ ނުބެލޭނެކަމަށް ޕްރިސެކިއުޓާ ޖެނެރަލް (ޕީޖީ) އޮފީހުން ނިންމެވުމުން، ވިލިމާލޭ ދާއިރާގެ މެމްބަރު އަހުމަދު އުޝާމް ފާޑު ވިދާޅުވެއްޖެއެވެ.
ވެންޓިލޭޓަރު ތަކުގެ ޚިޔާނާތާ ގުޅިގެން ދައުވާ ކުރަން އޭސީސީން ފޮނުވި މީހުންނަށް ދައުވާ ކުރެވޭނެ ހެކި ލިބިފައި ނުވާތީ ޕީޖީ އޮފީހުން ކުރިން ވަނީ އެމައްސަލަ ނުބަލަން ނިންމާފައެވެ. އެކަން އަލުން ރިވިއު ކުރަން އެދުމުން ވެސް ޕީޖީ އޮފީހުން ވަނީ އެނިންމުން ބަދަލު ނުކުރާނެ ކަމަށް ވިދާޅުވެފައެވެ.
އެކަމަށް އިޝާރާތް ކުރައްވާ އެމްޕީ އުޝާމް ވިދާޅުވީ މި ފެންނަނީ އެންމެން ގުޅިގެން ކުރާ ވައްކަން ކަމަށެވެ.
"ވެންޓިލޭޓަރުތައް ވީތަނެއް ނޭނގޭ. ވެންޓިލޭޓަރުތައް ގަންނަން ކަމަށް ބުނެ ގާނޫނާ ހިލާފަށް ދެއްކި ފައިސާތައް އަނބުރާ ހޯދޭނެ ގޮތެއް ނެތް. މިކަމާ ޒިންމާވާނެ ފަރާތެއް ނެތް. ޒިންމާ ކުރުވޭނެ ގޮތެއް ނެތް. މި ފެންނަނީ ހަމަ އެންމެން ގުޅިގެން ކުރާ ވައްކަން" އުޝާމް ވިދާޅުވެފައިވެއެވެ.
ހެލްތު މިނިސްޓްރީއަށް ވެންޓިލޭޓަރު ގަތުމުގައި ކޮރަޕްޝަން ހިންގާފައިވާ ކަމުގެ ތުހުމަތުކުރެވި 11 ފަރާތަކަށް ދައުވާ ކުރަން ފޮނުވިއެވެ. ނަމަވެސް އެ މައްސަލައިގައި ދައުވާ ކުރާނެ ހެއްކާއި ގަރީނާ ނެތް ކަމަށް ބުނެ ޕީޖީ އޮފީހުން ފަހުން ނިންމީ ދައުވާ ނުކުރާށެވެ.
Ads by STO
